Gɛlatiyaa 6
6
Kɔkɔny Ɛkanɛɛkɛk
1Iinak manyaakak eeta sigɛ dooytaanakik, ɔkɔn lakɛ iɗit sinɔkɔ ijaag tikiyɛɛkiŋ, nɛ in jumurkɛɛ koɓiiɗ sinɔɔnɛ mentanŋɔŋk iinak dooytaanak sigɛ ɓaŋkaawakari ŋaadiyɛɛkɛk. Yakana seŋk kooru ɛɛk kɛnɔ kɔɔ kat ɗiiririn paariyɛɛka sigɔɔga ito sigik. 2In iɗit omaay diile diil mɛŋkoŋk. Dusanɛɛrkɔɔ higi Kereseek ant sinɔɔnɛ ito sinik. 3Iɗit sinɔ koɓu kɛ dɔɔska joope eetik, ma ki dɔɔskaak, raamɛ ɛɛk nɛɛk. 4In iɗit a omoŋ omoŋ mermen ijaag nɛɛk kɛnɔ paariɗ ma moko seedi baŋiya ari ɛɛk nɛɛk a arir arampɛ a iɗit, laŋkoy any sinɛ meriiɗ ɛɛkkiŋ, 5agut sinɔ ɗɛyɛɛɗ eta a omoŋ omoŋ a diile diil nɛɛk ɗumaak.
6Iɗit sinɛ barɛ ɛɛk pɛɛnii nɛɛkɛɛkik, nɛ in sɛɛn kaastan any sinɔ mentanŋɔŋk a rɔɔriytan nɛɛk agut omoŋ.
7Kat raaramari ɛkan goŋk. Kɛɛ Waakoyote ariiɗ anyaayi. Ɗootukoy iɗit sinɛɓa soowɛk. 8Iɗit sinɔ soowuɗi ma ari a yaageeɗ taar nɛɛkik, ɗootukoy taare nɛɛkɛ rer, ma iɗit sinɛ soowuɗi a ari wɛɛŋa a yaa sɛɛgaŋɔŋk ɗootukoy wɛɛŋakɛ bɔdɛ sinɛkoy nɔkoy nɔkoyk. 9Agut sini kat bɔɔlaakii ijaag any sinɔ mentanŋɔŋk. Ɔkɔn kii jibaatɛtiŋ, nɛkɔɔ ɗootiɗikii saakɔɔ gayɛɛɗ ɔɔtɛ ɗootaanoŋkuŋ. 10Ɔkɔn laŋii ɔɔtɛ sinɔ gayɛŋɔŋkuŋ, koy ijaagii any sinɔ mentanŋɔŋk joopa baŋɛ kɛ ɗɔm joopa sigaaga ŋaadtaanakik.
Rɔɔrɔkɔn A Digoy Sinɛ Pediyaak
11In dɛnɛɛ saakɔ kɔna taapɛrkiɗa ariit naakɛ taaptaanakɛ sigɔɔgɛ boobɛr a ɛtɛr ɛkik. 12Joop sigɛ kɔnu direr kɛnɔ kɔnu yayawɛɛk merirɗi ɛɛk any ɛɛk raŋan nɛɛkik. Arir any sini kɛnɔ maŋk mɛlki sɛɛga epapay agut laalawutan Kereseek. 13Ɗɛyɛr a kɔnu yayawɛɛ nɛ merir ɛɛk taarakɛ goŋk, ma sɛɛg sigɛkan yayawɛɛk kir dusanɛɛt higi. 14Mayakana inte yowɛɛɗir meri ɛɛkoŋk omaay laalawutant Keresee sinɛkanta laalawuguɗɛɛ ɗook, maɓɔrɛ laalawuguɗɛɛ eet agut ɗook. 15Agut sinɔ kɛygun yayawiikaayɛɛŋ kɛygun kiikaayɛ yayawiitiŋ kɛɛ any sinɔ kɔnykuk. Kɔnyɗi sinɔ gerkiɗɛɛ riiɓ sinɔ tɔɔnuk. 16In dakɛ a bɔdɛ a maariyeet joopa sigaaga nomɛr gopɛ sineenek, ɛ joopa Waakoyotoŋk Israeelik baŋɛ.
17Agut sinɔ kat lakɛ iɗit sinɔtu ooɗɛk. Laka diidi eek naakɛ. Nɛ yaaŋɛ diidi sini sinɔ kɛ arka Yeeseek.
18Iinak manyaakak eeta sigɛ dooytaanakik, in wookan Suumi naŋk Yeese Kereseek a wɛɛŋa goŋk agut omoŋ. Ameen.
Currently Selected:
Gɛlatiyaa 6: KSTM
Highlight
Share
Copy
Want to have your highlights saved across all your devices? Sign up or sign in
