Epesoon 6

Agut Tɔɔmɔk A Bɔɔlɔŋeer

1Iinak tɔɔmɔk, in tiiɗikɛɛ bɔɔlɔŋeera goŋk Suumii, agut sinɔ ege sini any sinɔ likik. 2Ege sigi sekiyɛ sigɛ tuktaanakik sigɛ latu ŋaadiyɛ sigɛ kookoriik sigɛ tonur kɛ, "Eemɛyi ŋaaŋa a ɓaaɓa, 3ɔkɔn eemɛyin ŋaaŋa a ɓaaɓaŋ, nɛkɔɔ jeeɗuwatu emeyi goonɛŋ. Ɛkɔɔ lakin geet sinɔ obiiŋɔŋk."

4Maɓɔrɛ iinak bɔɔlɔŋeer, kat lowɛɛ tɔɔmɔk goŋk a ariir sɛɛg a ŋadirŋ, ma in aawoyɛɛ sɛɛg rɔɔriyɔɔn Suumiyoŋk a koykoyɛt nɛɛkɛk.

Laaŋoyeer A Suumiyɛ

5Iinak laaŋoyeer, in tiiɗikɛɛ suumiyɛɛka goŋk taaroŋk eemɛyɔɔn a tuɓur a ɓayaay sinɔɔnɛ ɓɛɛlɛ kɛ ɗɔmk oko sinɛ tiiɗiɗɔ Kereseyaak. 6Moko tiiɗikar sɛɛga dɛnɛɛɗa a ariir joop a yaa sɛɛgaŋ, ma tiiɗikar sɛɛga oko laaŋoyeer Kereseek sigɔ arir ɗɛyan Waakoyotoŋk ɓayɛtunɛɛkɛ gɛŋkik. 7In ijaagɗikɛ ɓayɛtunɛɛkɛ goŋk baŋɛ a ito ijaagɗigiɗɔ Suumi a moko ijaagɗigiɗɔ joop, 8agut in ɗegerɛɛ kɛ iɗit a omoŋ omoŋ, kɛygun suumi kɛygun ijaagen laŋkoy koyi any sinɔ mentanŋɔŋk sinɛɓa ijaagɗigeeɗikiŋ sooy lak Suumi nɛɛkik.

9Maɓɔrɛ iinak suumiyɛ, in ɓɔrɔ ijaagɛɛ laaŋoyeera goŋk oko sinik. Kat epɛɛrɛ ɛɛk. In ɗegerɛ kɛ latukari iinak a sɛɛg Suumi rakaay sinɔ ki pakaatɛ joopuk.

Beya Waakoyotoŋk

10Pediya nɛɛka, in ɓaŋkaawurɛɛ Suumii a ɓaŋkawukaat nɛɛkɛk sinɔɔnɛ obiiŋɔŋk. 11In kadɛ beya Waakoyotoŋk baŋɛ nɔkɔɔ oolɛrɗɔ ɓooyan ɗɛgɛ diyabiloosuk. 12Moko kaarin naŋk a joop, ma kaarin naŋk a ɔɗɔweer sigɔ ŋɛɛwɛŋɔŋk, a ɓaŋkawukaatak sigɛ ɓalɗi nyuugurak sigɛ ɓalir ɗoo sinik, a wɛɛŋa sigɔ somkaanakik sigɔ atu darik. 13Agut sini in boŋɛɛ beya Waakoyotoŋk baŋɛ nɔkɔɔ oolɛɛr kolan ɛɛkoŋk kaarin gumakeeroŋk ɓeny saakɔɔ ŋɛɛwɛnŋɔŋk. Nɛ saakɔɔ kaararɗɔ nɔ lɔsiɗikarik, nɛkɔɔ ɛtɛɛr a ɓaŋkawuŋ.

14Sisɔ in ɛtɛɛ a ɓaŋkawuŋ kɛnɔ tusɛɛ teeɓɛ eekeeroŋk, a any sinɔ kolɗɛ kokomk mentanka taamɛkɛ Waakoyotoŋk. 15In gaɓɛɛ deraka Pɛɛni sinɔ Ɓɛlkɛɛstank bɔdɛɛɗoŋk okokɔ saamɛɛkoŋk. 16In boŋɛɛ gaasin ŋaadiyɛɛkoŋk ariita kɛnɔ kɔɔ oolɛrɗɔ kolan ɛɛkoŋk ɛrgint setanik sinɔɔnɛ boltiɗi a maɗik. 17In riiɓɛɛ dooroy awɛytoŋk bɔdɛɛɗoŋk aɗoy ɛ in boŋɛɛ aarɛ Wɛɛŋa sigɔ Geetitaanakik. Sɛɛn Pɛɛni Waakoyotoŋk. 18In ɗanɗamaakɛɛ ɓɛɛnyɔwɛ gɛɛŋk baŋɛ olaata baŋɛ Wɛɛŋakɛ sigɔɔgɛ Geetitaanakik, in ɓeɗɛɛ kɛnɔ ɗanɗamaakɛɛ dooytaanaka ɔgɔɔka baŋɛ. 19Ɛɓɔrɛ in ɗanɗamaakɛɛ agut eet, in kalɛyɛɛ Waakoyo kɛnɔta gaɓɛ dugtan nɛɛk, sinɛ Pɛɛni sinɔ Ɓɛlkɛɛstank sinɔ likik kɛnɔ waasa a kaa ɓuriit. 20Kɛygun aasi sisɔ arkaaya korkoɗɔɔn meltiikɛ awɛytiiroŋkuŋ nɛ eet wosɛytan Yeeseek kɛnɔ waasa Pɛɛni sini Bɛlkɛɛstank. Nɛ inta ɗanɗamaakɛɛ kɛnɔ tona any sinɛta ɗɛyɛk a kaa ɓuriit.

Digoy Sinɛ Pedtank

21Manya eteŋka Tikikoos sinɛ porɛɛk, ɛ ŋaadɛɛ ijaag Suumi Yeeseek, tonukɔɔ kɔna ola baŋɛ agut eet kɛnɔ ɗegerari kɛ ijajagakan jikon ɛɓɔrɛ kɛ ɓɛɛlakan ɛk. 22Wosɛyɛɛrakan sɛɛn son lak iinakik agut any sini, kɛnɔ ɗegerari kɛ ɓɛɛlii ɛk, ɛ kɛnɔ kɔnu ar a ɓaŋkaawurariŋ.

23In dakɛ a bɔdɛ, a mɛyin a ŋaadiyɛ agut omoŋ dooytaanaka sooy lak Baabɛ Waakoyok a Suumi Yeese Kereseek. 24In dakɛ a wookan mɛyin sinɔ koy ki yawuɗiitik joopa sigaaga porur Suumi naŋk Yeese Kereseek baŋɛ.

Currently Selected:

Epesoon 6: KSTM

Highlight

Copy