ጋላ̈ 3
3
ጺሊቲ ቤንቲ̇ዛ̈ዲ ክርስቶ̈ሳ ኣማ̇ኔጌዪንዶኬ ሂጋ̇ ፎቴጌይን ጊዳካ̇ዬ
1ጋላ̈ታ ኣሳን ቦ̈ዛን! ዪንታ̇ ቢቲኖ ኦ̈ኖ? ዬሱ̈ስ ክርስቶ̈ሲ ዪንታ̇ቦ ጋ̈ሪ ማስቃ̇ላ ጋልዳ̇ ሶቲንቲ̇ኖንዶ ቴ ዪንታ̇ ኮሺንቻ ታማ̈ርሳካ? 2ቴ ዪንታ̇ ጋልዳፖ̇ ፔቲ̇ ባዝ ሙታ̇ ኤራንዳ ኮያ̈ሬ፤ ዪንታ̇ብ ጌ̈ሻ̇ ኣያ̇ና ኢሚ̇ንቲ̇ኖ̈ዲ ዪንቲ ሂጊ̇ን ና̈ጊ ፎቲኖን ጊሻብቤ̇ ዎይ ኑ ዪንታ̇ብ ጾ̈ሳ̇ ቃ̈ሊን ሶ̈ሊኖን ሲስካ̇ር ዪንቲ̇ ኣማ̇ኒኖምቢ̇ያ? 3ዪንቲ ጌ̈ሻ̇ ኣያ̇ናባራ ኣማ̇ና ማ̈ቂ̇ዴ፤ ዓት ዪንቲ̇ ዪንታ̇ ዎልቃ̇ባራ ዲጫ̇ንዳብ ኮዪ̈ራ? ዪን̇ቲ ፌብ ዓፌን ዎይ ዳሻባያ! 4ዪንቲ ኤኪ̇ኖ ዓ ዎይ ሜታ̈ ሜላ̇ ዓሪ ኣቴ̇? ዪ̈ፌን ዪንቲ ዎቲዝ ባዝ ማ̈ቄጌይን ኪን ሜላ̇ ኣቲ̇ኔ። 5ጾ̈ሲ ፌ ኣያ̇ና ዪንታ̇ብ ኢማ̇ዚንዲክ ዪንታ̇ ጊዳ̇ ታ̈ሚ̇ራ̈ታ ኦ̈ዚንዳ ዪንቲ ሂጊ̇ን ፎቲኖንኮታ̇ብቤ̇ ዪንቲ ዎጛላ ሲስካ̇ሪ ኣማ̇ኒኖን ኮታ̇ቢያ?
6ዪ̈ዳሬ “ኣብራሃ̈ሚ ጾ̈ሳ̇ ኣማ̇ኒዴ፤ ጾ̈ሳ̇̇ዳር ኢያ ጺላ̇ ኣስ ማ̈ሳር ፋይዲዴ” ጋ̈ር ጻ̈ፊንቲ̇ኖንዲፌ̈ኔ። 7ዪዚ ኣማ̇ኒዝ ኣሳን ኣብራሃ̈ማብ ናኢ ማ̈ቂ̇ኖን ዪንቲ̇ ኤሪብቴ። 8ኣይሁድ ባዮ̇ ኣሳን ኣማ̇ናባር ጺላ̇ዚን ጾ̈ሳ̇ ቲ̈ኒታር ጌ̈ሻ̇ ማጻ̈ፋ ጋልዳ “ዎርዣ ዎይ ኔ ጎይባር ኣንጂንቲሬ̈” ጋ̈ር ኣብራሃ̈ምቦ ዎጛላ ሶ̈ሊኔ። 9ዪ̈ኮታ̇ቦ ኣማ̇ኒዝ ኣሲ ዎይ ኣማ̇ኒኖ ኣብራሃ̈ማባር ኣንጂንቲ̈̇ሬ።
10“ሙ̈ሳ ሂጋ̇ ማጻ̈ፋ ጋልዳ ጻ̈ፊንቲ̇ኖ ኪ̈ታን ዎይ ና̈ጊ ፎቲባ̈ሶ ኣሲ ዎይ ባ̈ዲንቲኖ̈ዳ” ጋ̈ሪ ጻ̈ፊንቲኖኮታ̇ቦ “ኑ̈ኒ ሂጋ̇ ና̈ጊ ፎታር ጺላ̇ንዳ” ጌይዛን ዎይ ባ̈ዲንቲኖን። 11“ኣማ̇ናባር ጺሊ̇̈ኖ ኣሲ ሼምፒ̇ ዲጚ̈ሬ” ጌዪ ጻ̈ፊንቲ̇ኖኮታ̇ቦ ኦ̈ናካር ኣሲ ሂጋ̇ ና̈ጊ ፎታሪ ጾ̈ሳ̇ ቲ̈ን ጺላ̇ንዳ ዳንዳኢባ̈ሴ። 12ሂጋ̇ ኦ̈ሳኬ ኣማ̇ናኬ ዱማ ዱማ፤ ኢንታ ዎል ዬልዝ ባዚ ባዬ፤ “ኣሲ ሂጋ̇ባር ዶኣንዳብ ዳንዳኢዛ̈ዲ ሂጊ̇ን ኪ̈ቲን ዎይ ፎቴ̇ጌዪንዶ” ጋ̈ሪ ጻ̈ፊንቲኔ።
13ጌ̈ሻ̇ ማጻ̈ፋ ጋልዳ ̇“ሚ ጋልዳ ሶቲ̇ንታ̇ር ዓይቂ̇ዝ ኣሲ ዎይ ባ̈ዲንቲ̇ኔ” ጌዪ ጻ̈ፊንቲ̇ኖኮታ̇ቦ ክርስቶ̈ሲ ኑኮታ̇ቦ ባ̈ዲንቲ̇ኖ ማ̈ቃ̇ር ሂጊ̇ ኑ̈ና ባዲ̇ኖን ጋልዳፖ̇ ኑ̈ና ዎዚኔ። 14ዪና̇ ማ̈ቂ̇ኖንዳ ጾ̈ሲ ኣብራሃ̈ማብ ኢሚ̇ኖ ኣንጃ̇̈ዲ ዬሱ̈ስ ክርስቶ̈ሳ ጎይባር ኣይሁድ ባዮ̇ ኣሳንቦ ዬላ̇ምፔ̈ንኬ ጾ̈ሲ ኢማ̇ንዳ ጌዪ ቃ̈ላ ጌሊኖ ጌ̈ሻ̇ ኣያ̇ና ኑ ኣማ̇ናባር ኤካ̇ምፔ̈ኔ።
ሂጎ̇ ጾ̈ሲ ኢማ̇ንዳ ጌይኖ ታስፋ ቃ̈ሊን ኣሺሺባ̈ሴ
15ቴ ኢሺንታ̇ን! ዪዚ ኑ ዎይ ኤሪዝ ባዝ ጋርታ̇ፖ̇ ፔቲ̇ ባዝ ሚሳ̇̈ሊ ኤካ̇ስቶ፤ ፔቲ̇ ኣሲ ኣባክ ኢማ̇ንዳ ጋ̈ር ቃ̈ላ ጌሊኖ ባዚን፥ ቃላ ጌሊኖፖ̇ ዓኒ ኣሻ̇ንዳቦ ዎይ ኢዝ ጋልዳ ጉጃ̇ንዳቦ ዳንዳኢባ̈ሴ። 16ጾ̈ሳ̇̇̈ዳሬ ኣብራሃ̈ማብኬ ኢ ዜርቦ ኢማ̇ንዳ ጋ̈ሪ ቃ̈ላ ጌሊኖንዳ ዪ̈ና̇ ኢዝፌ̈ኔ። ጾ̈ሲ̇ ዎይሊን ኣሳብ ሶ̈ሊዛ̈ዲፌ̈ን ማሃሪ “ኔ ዜርንቦ” ጋ̈ባሴ፥ ፔቲ̇ ኣሳቦ ሙታ̇ ሶ̈ሊዛ̈ዲፌ̈ኒ ማሃሪ “ኔ ዜርቦ” ጌዪ ሶ̈ሊ̈ሬ። ዪ̈ዲ “ኔ ዜር” ጌዪንቲ̇ኖ̈ዲ ክርስቶ̈ሳ። 17ዪዚ ቴ ጋ̈ዚንዳ፥ ኦይዲ ጼ̈ታክ ዓይዚ̇ ታ̈ጳ ላይፖ̇ ዎሃ ዬይኖ ሂጊ̇ንዳ ቲ̈ን ጾ̈ሲ̇ ጫ̈ቂ̇ኖ ጫ̈ቂን ኣሺሻራ ኢ ኢሚ̇ኖ ታስፋ ቃ̈ሊን ይሳ̇ንዳብ ዳንዳኣባሴ። 18ዪዚ ጾ̈ሲ̇ ኣሳብ ፔቲ̇ ባዝ ኢሚ̇ዛ̈ዲ ኣሲ ሂጋ̇ ና̈ጊኖ̈ኮታ̇ቦ ጊዳካ̇ይዶ̈ን ኢ ኢማ̇ንዳ ጌዪ ቃ̈ላ ጌሊኖኮታ̇ቦ ኢሚ̇̈ሬ። ዪና̇ ኢዝፌ̈ኒ ጾ̈ሲ̇ ኣብራሃ̈ማቦ ኢማ̇ንዳ ጌይኖን ኢሚ̇ኖ̈ዲ ጾ̈ሲ ቲ̈ን ኢ̈ቦ ታስፋ ቃ̈ላ ጌሊኖኮታ̇ቦ።
19ዓት ዪዶኮ ሂጎ̇ ኣብዛብ ኬስኪ̇ና? ሂጎ̇ ዎሃ ኬስኪ̇ኖንዳ̇፥ ኢታ ኦ̈ሳ ጌይዛን ዎንኮ ኤርሳንዳቦ። ዪና̇ ሂጊ̇ን ማ̈ዲ̇ኖንዳ̇ ጾ̈ሲ ኣብራሃ̈ማብ ዎሃ ኢማ̇ንዳ ጌይኖ ዜር ዬይዝ ዲራሴ። ሂጎ̇ ጾ̈ሳ̇̇ብኬ ኣሳብኬ ጊዳ̇ ጌላሪ ኢንታ̇ ዎል ዬልዛ ሙ̈ሳቦ ጾ̈ሳ̇̇ ኪ̈ታንቻ̇ን ጎይባራ ኢሚ̇ንታ̇ሪ ኦ̈ሳ ጋልዳ ፌ̈ሽኪ̇ኔ። 20ዪዚ ጊዳ̇ ጌላሪ ኢጊንዝ ኣሲ ጌዳር ዓናር ዎይን ኡፋይሳ̇ንዳብዶኬ ፔታ̇ና ሙታ̇ ኡፋይሳ̇ንዳብ ጊዳካ̇ዬ፤ ዎቲናካር ጾ̈ሳ̇̇̈ዲ ፔታ̇ኔ።
ሂጋ̇ ኣባብ ኬስኬ̇?
21ዪዚ ሂጎ̇ ጾ̈ሲ ኢሚ̇ኖ ታስፋ ቃ̈ሊን ኣሺሻ̈ራ? ዉርሲ ኣሺሻባሴ! ሼም̇ፓ ኢሚ̇ዝ ሂጋ̇ ኬስኪኖኮ ዎኒ ጺሊቲ ሂጋ̇ ጎይባር ቤንቲርዶ̈ን። 22ዎቲናካር ጌ̈ሻ ማጻ̈ፋ ጋልዳ̇ ጻ̈ፊንቲ̇ኖ̈ዲፌ̈ኒ ኣሲ ዎይ ናጋራባር ቃቺንቲ̇ኔ ዪ̈ኮታ̇ቦ ኣሲ ዬሱ̈ስ ክርስቶ̈ሳ ኣማ̇ናር ኤኪ̇ዛ ታስፋ ቃ̈ላ ኢሚ̇ንቲ̇ኖ̈ዲ ኣማ̇ኒዝ ኣሳንቦ።
23ኣሲ ቃሺ ኣ̈ል ቃቺንታ̇ር ዶኣዚንዲፌ̈ኒ ኣማ̇ና ዬናፖ̇ ቲ̈ን ሙ̈ሳ ሂጊ̇ንዳ̇ ኑ̈ና ቃቻ̇ ጋዲ̇ኔ። ኣማ̇ኒን ዓና ኤሪንቲ̇ዝ ዲራስ ኑ̈ኒ ሂጋ̇ ጻና ኣቂኔ። 24ዪ̈ኮታ̇ቦ ኑ̈ኒ ኣማ̇ናባር ጺላ̇ምፔ̈ን ሂጎ̇ ኑ̈ና ክርስቶ̈ሳክ ዬልንዳቦ ና̈ጊ ጋዲ̇ኔ። 25ዓት ዎቲናካሬ ኣማ̇ና ዬይኖኮታ̇ቦ ዓኒፖ̇ ጌዳ ሂጎ̇ ኑ̈ና ና̈ጊ ኣቂሲባ̈ሴ።
ኑ̈ኒ ጾ̈ሳ̇̇ ናኤ
26ዪንቲ̇ ዎይን ዬሱ̈ስ ክርስቶ̈ሳ ኣማ̇ኒኖኮታ̇ቦ ዪንቲ̇ ጾ̈ሳ̇ ናኤ። 27ዪንቲ̇ ክርስቶ̈ሳባር ፔታ̇ን ማ̈ቃ̇ምፔ̈ን ጻማ̇ቂንቲ̇ኖን ዎይን ዪንቲ ክርስቶ̈ሳ ኣፊላፌ̈ኒ ማኢኔ።
28ዪንቲ̇ ዎይ ክርስቶ̈ሳባር ፔታ̇ን ማ̈ቂ̇ኖኮታ̇ቦ ዪንታ̇ ጊዳ̇ ኣይሁዳ፣ ኣይሁድ ባዮ̇ ኣሲ፣ ኣይላ፣ ኣይላ ጊዳካዮ̇ ኣሲ፣ ኣቲና ማጫ̇ ጌዪ ፋጊዝ ባዚ ባዬ̇። 29ዪዚ ዪንቲ̇ ክርስቶ̈ሳይኮ ዪንቲ ኣብራሃ̈ማ ዜር፤ ጾ̈ሲ ኢሚ̇ኖ ታስፋ ቃ̈ሊንዲፌ̈ኒ ኢብ ኢማ̇ንዳ ጌይኖን ዪንቲ̇ ኤኪ̇̈ሬ።
Currently Selected:
ጋላ̈ 3: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
