Nemyas 13
13
Nemyas at ngay Nafabagu Gina Gfakamulun
1Gina gtap fag menit Muisis at Faugali sa sangay taw, kanya fagayu nasaful te, kafag Rirukan gsalag ngay taw Amun ay taw Muab nu nangasuglat sas Dius at ngay taw. 2Aroro kanya fagayu wa nafon sa sangay taw Israel at fakonun ay fanginum gina gduksun siginans talun Igiptu. Abat ngate, nabayad way Balaam laman namauri ngay taw Israel. Dewa katanya, abat ngate nafauri, Dius at famangsi fagmasineun tua. 3Ngay taw nu nadungug kanya fag Faugali, naiyan wan yud Israel fag ngay taw.
4Gina gakafasludanun takatanya, nafatigwanan sas Elyasib fag tagfon fanggalangun, ngay fagfungsuan si em Dius at bale. Elyasib, Tubya at kalongan, 5ay Tubya nafon anya sik suluk daul sis Dius at bale. Ebi kafag suluk fagsuadan famonun fag ngay fakonun, famaebebanglu, ngay fagagbilugun sis Dius at bale, ay tiba yak famonun sa sangay tagfon fanggalangun, ngay fasafuluk afud trigu, at bagu fag fanlangu, ay langis, kata at faugali laman sa sangay taw Lebi, sa sangay tagalubad, ay sa sangay tagulit sakbawan.
6Gina kafasludan takatanya, kwa sis Erusalem. Aroro gina sis fatuluk safulu e duak banwa Artaserses nu gfunan sis Babilunya nalo au sanya. Ay nu glugo wan kanya naylat yay nu 7nangafoli sas Erusalem. Ay nu ndasug au, nasaful au Elyasib at nafakamulun mauri, at nafabanwan Tubya sas suluk tagsas salubangan Dius at bale. 8At kaksvnan nu kadotama au, nafangukasan kway lang Tubya at ngay fagagbilugun fagayu sanya ginan fag suluk. 9Nasugu kwa vtv te, fasinei kafag suluk. Ay sanya ginan nafafoli au sas Dius at bale at ngay fagagbilugun anggan ngay famonun fakonun ay famaebebanglu.
10Nasaful kyangay te, ngay taw Lebi we nafon ya at ekwan laman sa anya, nu katanya, kanya fagayu anggan at ngay tagsaful galubad tagfakamulun sis Dius at bale noli wan laman namakamulun sat mesa gamasun. 11Nu katanya, nalong au sa sangay fun sirut te, “Wain ay fagnafabayanun Dius at bale?” Nafauro kwa vtv ngay taw Lebi ay ngay tagsaful galubad ay nafafoli sat ngay mesa fakamulun sas Dius at bale.
12Ay fagayu tagbanwan sis Uda gdog yay nabuba at fasafuluk afud at trigu, ay at bagu fag fanlangu, ay langis sas bale fagfungsuan. 13Nafatigwanan au sas Selemya fag tagfon fanggalangun, ay Saduk fag tagfoyung faugali, ay Pedaya fag taw Lebi tagulit ngay bale fagfungsuan. Nafagubuk kyangay sanya Kanan, Sakur at baguama, Matanya at fufu. Kanya fagayu ku nafili aroro kanya fagayu at mafatigwananan. Nafatigwanan kyangay sanya fagayu tagfainkafudan at ngay kaiban at fagayudanun.
14Sanya ginan nadarangin au te, “Ku Dius, amatangi angku ay lag kalyam ku fakamulun at matuyan laman sa am bale ay tiba yak fakamulun ste.”
15Ginanya fag buknga, nalag au ngay taw Uda nu gturis rawvg ubas sis Famiangalay fag Menit ay nu gfaful ngay trigu, fanlangu, ubas, igus, ay tiba yak famubaun asnu at buba at fagnamaloun sas Erusalem. Nu katanya, nalong au sanya fagayu te, “Lag namalao ay ngay famalaoun sis Famiangalay fag Menit.” 16E ngay taw yangay Tiru tagbanwan sis Erusalem at nabuba ngay albon ay tiba yak famalaoun. Kanya fagayu nafalao takatanya gina sis Famiangalay fag Menit, sa sangay taw Uda tagsis Erusalem. 17Nu katanya, nasalag au ay nalong sas Uda at ngay tagfangguna te, “Nataw ay fagfakamulunun takatatuy? O wam gfae tungkul ya Famiangalay fag Menit? 18O nunda wa katatuy ay ngay mangaguyang at nafakamulun, ay tam Dius nafaurianan antam ay tuy fag furuan? Takatanya ay fakamulun, gfauri am Dius, ay anggan siginan yangay nu yud am gfasik matuyan Famiangalay fag Menit.”
19Nu katanya, nasugu au te, “Dingdingi sakbawan furuan galay Biernes gina menit anfalyu, ay lag gluang yakmay anlangfe Famiangalay fag Menit.” Ay nafaulit au sa ku ngay fagsuguan ngay sakbawan laman we mafasakbo sas furuan daul nusnga setaw fag famaloun, gina sis Famiangalay fag Menit. 20Tibaginan, ngay tagfalao gtiug yay sday Erusalem at alad sis Biernes fag yabi. 21Dewa katanya, nasalag au anya fagayu. Nalong au te, “Nataw ay fagtiugun ste sday alad furuan? Nu nafadog yay ban am takatanya ay fakamulun, gfaurianan kwa fia ayu.” Nu katanya, siginan ginanya kanya fagayu wa batang gfakamulun ya takatanya sis Famiangalay fag Menit. 22Sanya ginan, nasugu au ngay taw Lebi te, “Fasinei ay uliti ngay sakbawan laman ngay taw gfae tungkul tua Famiangalay fag Menit.”
Dius, aylati ku nafakamulun ay afanyui angku, kata ay maksvn fag fakesugun.
23Ay ginanya yangay fag ngay buknga, nalag au mangaro te, e ngay taw Uda at nafamubay siginans Asdud, Amun ay Muab fag ngay gaban taw. 24Nu katanya, tiba at ngay sisian at fangaringang kata ngay taw Asdud at fangaringang, ay mannga tibak taw at fangaringang, ay wa saful ya Uda fag fangaringang. 25Nu katanya, nasalag au nafauri ngay taw Uda. Ay tiba si anya nafalang au ay naguyud at ngay buk. Ay nafafatuyanan au anya fagayu sas Dius at ngayan, ay anggan sat ngay sisian te, “Lag ban am kamubay ya ay gfangindugan siginan tibak talun.” 26Ay nalong au sa anya fagayu te, “O nunda wa katanya Israel at fun, Sulumun at nafakamulun at faginke asalananun? Dewa nday fag talun at ngay fun we malabi anya. Dius kesug anya ay nafili yangay anya sik fun sas fagdaul talun Israel. Dewa katanya, kanya anke asalanan aroro nabubay sik mangena siginan tibak talun. 27O takatatuy ay nafakamulun fag mauri, gfabayan waymi lang? Ay nafakamulun at yud matuyan sa tam Dius siginan nu kamubay sa tibak talun.”
28Ay Uyada, Elyasib fag tagfon fanggalangun at baguama, anke baguama at nafamubay Sanbalat at baguina, kanya sik taw Kurun. Nu katanya, naiyan au kafag baguama.
29Sanya ginan, nadarangin au te, “Ku Dius, lag o kalyam kanya fagayu at nafakamulun mauri, at fagyudun nafae tungkul at fanambagun laman tagfon fanggalangun, ay sik ngay taw Lebi.”
30Nu katanya, nafalganan sas Dius ngay tagfon fanggalangun ay ngay taw Lebi, laman we suglat nusnga setaw fag mauri siginan at yud Udyu fag ngay taw. Ay nafon au fakamulun sa anya fagayu kata at ngay fakamulun. 31Natuyan kyangay te, falganani ngay famaygang laman gina namon fanggalangun e famaygang tua kasakan, ay anggan ngay taguna fag gutluan laman mafalganan wa gugat.
Ay nadarangin au te, “Ku Dius, amatangi angku ay gubuki.”
Currently Selected:
Nemyas 13: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
