Lebitiku 17
17
Ngay Faugali sat Nafili fag Buknga laman fag Fagnangirugan Fanggalangun
1Yawi nasugu sas Muisis te, 2“Longi sas Arun talamean, ay anggan sa sangay taw Israel te,
3“Nusnga sinu si ayu nu girug at fanggalangun fag ngay fagbaugun nu sa way tibak furuan, 4-5nu dway sis Yawi at bale, kanya kata sik takamabul fag taw, nu katanya, tuyani anya te, bunwa ya ay kaiban. Nasugu tuy fag faugali laman nu gfon am ay fanggalangun, sis Yawi tua at aturunan sakbawan bale ay wam sa tibak furuan. Foni sa sangay tagfon fanggalangun ay fanggalangun laman sas fagmanabayanun, laman kanya namon sas Yawi. 6Ay tagfon fanggalangun gfaramsig kafag fanggalangun at taguk sas fagirugan ngay fanggalangun laman sas Yawi, sit sakbawan bale. Sanya ginan, kanya girug ngay fagbaugun at taba. Ay kafag fanggalangun at ayuk at mabebanglu sik famauseganan Yawi. 7Nu katanya, lag gfon ya fanggalangun sa sangay fagsegan takata sik kambing, aroro kanya gfayayu ayu siginans Yawi. Tuy fag faugali ay fagaloan ban kabavn, anggan ay ngay kasugfunanan.
8“Am fag ngay taw Israel ay ngay taw tagsiginan tibak talun amatangi gugat te, nusnga sinu si ayu nu gfon at fanggalangun nu si way tibak furuan, 9ay nu dway sis Yawi at sakbawan bale, tuyani anya te, bunwa ya ay kaiban.
10“Nusnga sinu si ayu at naon taguk, tuyani anya te, Yawi at fawayan ay tuyani yangay te, bunwa ya ay kaiban. 11Aroro taguk wan tagfaleleg fagayu tagleleg. Nu katanya, Yawi nasugu sa ayu te, ‘Foni taguk laman ay fanggalangun famalyam ay ngay asalanan.’ 12Kanya at masuad at fagnasalagun nu kon am taguk.
13“Nusnga sinu am at nagamat sik fagbaugun ay mannga sik manuk tungud at natuyan te, masine, kanya masine nu gbul at taguk ay saksaki sas lutuk, 14aroro fagayu tagleleg at leleg siginans taguk. Nu katanya, Yawi nalong sa ayu te, ‘Lag am kon taguk. Nusnga sinu at naon taguk, tuyani anya te, bunwa ya ay kaiban.’
15“Nusnga sinu si ayu, dewa sik taw Israel ay sik taw tagsiginans tibak talun, nu naon way at fagbaugun at kinbul, ay mannga tibak mangilafang at nafabul fag fagbaugun, kanya masine nu gbakbak at lanbung, ay gigus, ay gtuyan anya te, masuya yakmay menit anfalyu. 16Ay kanya nu dway nabakbak at lanbung ay nu dway naigus, kanya e asalanan.”
Currently Selected:
Lebitiku 17: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
