Lebitiku 14
14
Nu Gfafasine sik Taw at Kinfia at Bangbang
1-2Sanya ginan, Yawi nafon sas Muisis sik faugali sabaliwa sik taw at kinfia siginan at maksvn fag bangbang:
Sik taw nu e fakasaitun wan sit balat, 3ngay tagfon fanggalangun gduksun siginans fagmafulan laman nanginsaful kanya fag taw. Ay kanya fag taw at bangbang nu nfia tua, 4tagfon fanggalangun gsugu te, bubai sa anya duak manuk tungud at natuyan te, masine, ay sik lifung kayu sidru at sanga, ay sik fansiuk at maraska, ay sik sanga isupu. 5Ay kafag tagfon fanggalangun gfabul at sadi fag manuk tungud sis tungud tikung at ke mamam siginans bubun. 6Sanya ginan, kanya gbul yangay at faduak manuk tungud, ay kayu sidru at sanga, ay at maraska fag fansiuk, ay sanga isupu, ay gfasurung kanya fagayu sasad mamam at ke taguk, sat nafabul fag manuk tungud at taguk. 7Ay gfaramsig kafag mamam at ke suglat taguk fitu ginan sas taw at kinfia at maksvn fag bangbang, ay gfasaful sa sangay taw te, kanya fag taw anfia wan. Sanya ginan, tagfon fanggalangun gfalfas at sadi fag manuk tungud sas gamasun.
8Dewa katanya, gina nantuyan te, kanya anfia wan, masine kanya fag taw nu gbakbak at lanbung, ay nu gufo at buk ay at sigyu, ay sanya ginan gigus. Sanya ginan, kanya masakbo wan sas fagmafulan, dewa katanya, kanya ya masine namanwan sat bale ramit kaduge fituk menit. 9Sis fafituk menit, kanya gdog yay gufo at buk ay at sigyu, ay gdog yay gbakbak at lanbung ay gigus.
10Sis fawaluk menit, masine kanya nu gbuba duak tama tupa ay sik tina tupa, tagsadik banwa ay at yud e malong. Ay kanya gbuba yangay unumk fabudbungguan fangawat tinapay at ke famasuglat langis, laman sik fanggalangun famauseganan Yawi. Ay kanya gbuba yangay sik taya langis. 11Sanya ginan, tagfon fanggalangun gtaban kafag taw ay gbuba at ngay fanggalangun sis Yawi at daga salubangan sit sakbawan bale.
12Ay sanya ginan, tagfon fanggalangun gbul at sadi fag tama tupa ay sik taya langis, ay gfon laman sik fanggalangun famalyam asalanan, ay tagfon fanggalangun gfabat kanya fagayu sis Yawi at daga salubangan, laman sik fanggalangun. 13Kanya gfabul ngay tupa sis Yawi at bale at basad alad, sis fagfabulan ngay fanggalangun laman famalyam asalanan ay fagirugun fag ngay fanggalangun. Kafag fanggalangun sik mafilian fag fanggalangun, ay mafalganan laman sa sangay tagfon fanggalangun, kata sik fanggalangun famalyam asalanan. 14Sanya ginan, tagfon fanggalangun gbul kafag tupa at taguk ay grarus sat kinfia fag taw at siun baliwa fag daga talinga, ay sat sumyu tama tagsi siun baliwa fag darafa ay fag daluap. 15Ay tagfon fanggalangun gbul yangay langis, ay gugwag sat wala fag daluap, 16ay gfasurung at sumyu tagsis siun baliwa fag daluap ay gfaramsig fitu ginan sis Yawi at daga salubangan. 17At sawad fag langis tagsit wala fag daluap, kanya grarus sat kinfia fag taw at talinga, ay at sumyu tama fagdua tagsit wala baliwa fag daluap ay fag darafa. 18-20Ay tibak langis tagsis tagfon fanggalangun at daluap grarus sat kinfia fag taw at alfuyu, ay tagfon fanggalangun nu ntabu wa gfakamulun katanya, kanya gfon fanggalangun laman famalyam asalanan. Sanya ginan, tagfon fanggalangun gfabul fagirugun fag fanggalangun ay girug sas fagirugan gasfuan famauseganan fag fanggalangun. Katanya tagfon fanggalangun at fakamulun sis Yawi at daga salubangan laman gfalyam at kinfia fag taw at fagmasuyaun ay laman kanya umsine.
21Dewa katanya, sik taw at yud e kwa, way makatu gfon takatanya fag fanggalangun, kanya masine nu gbuba sik tama tupa laman at fanggalangun famalyam at asalanan. Ay gfabat kafag fanggalangun sas Yawi laman famalyam at ngay asalanan. Kanya gbuba yangay duak fabudbungguan fangawat tinapay at ke suglat langis, laman at fanggalangun famauseganan Yawi. Ay kanya masine nu gbuba yangay sik taya langis, 22ay duak labikung ay mannga duak udkuruan; at sadi at fanggalangun laman famalyam asalanan, ay at sadi laman at fagirugun fag fanggalangun.
23Sis fawaluk menit, kanya gbuba at fanggalangun sas Yawi at daga salubangan sit sakbawan bale. 24Sanya ginan, tagfon fanggalangun gbul kanya fag fanggalangun ay sik taya langis, ay gbuba sis Yawi at daga salubangan. 25Sanya ginan, kanya gfabul fanggalangun fag tupa ay gbul tiba at taguk ay grarus sat kinfia fag taw at daga talinga tagsit siun baliwa, ay sat sumyu tama at dua tagsit siun baliwa fag daluap ay fag darafa. 26Sanya ginan, tagfon fanggalangun gfoli langis sat wala fag daluap, 27ay kanya gfasurung at sadi at sumyu tagsit siun baliwa ay gfaramsig kafag langis sis Yawi at daga salubangan fitu ginan. 28Ay tiba at ba langis grarus sat kinfia fag taw at daga talinga tagsit siun baliwa ay sat sumyu tama tagsit siun fag daluap ay fag darafa. 29-31Ay at sawad fag langis sis tagfon fanggalangun at daluap grarus sa kafag taw at alfuyu. Sanya ginan, tagfon fanggalangun gfon at fanggalangun fag duak labikung ay mannga fag duak udkuruan: at sadi fanggalangun laman famalyam asalanan, ay at sadi, at fagirugun fag fanggalangun. Kanya gfon yangay famauseganan fag fanggalangun. Katanya sik tagfon fanggalangun nu gfon fanggalangun sis Yawi at daga salubangan laman famalyam ngay taw at fagmasuyaun. 32Katatuy at ngay faugali sabaliwa nu gfasine sik taw at kinke maksvn fag fakasaitun sit balat, ay kafag taw at fakamulun nu dway makatu gfon fanggalangun laman sas famasine.
Faugali sabaliwa sik Bale at Namling
33Katatuy Yawi at longan sas Muisis ay sas Arun 34sabaliwa at fakamulun gina ban Yawi nafae amling sa sangay taw Israel at bale, gina ban kanya fagayu sis talun Kanaan, Yawi at nafon sa anya fagayu fag talun laman at fagagbilugun.
35Sik taw nu nalag te, at basad bale gamling, masine kanya nu gfasaful sa sangay tagfon fanggalangun. 36Ay tagfon fanggalangun gina gsakbo sanya fag bale, kanya gsugu te, faduksuni fagayu fagagbilugun sanya fag bale laman wa kataip sa tagamling. Sanya ginan, tagfon fanggalangun gsakbo sanya fag bale, 37ay glingaman fia kafag amling. Ay nu nalag te, at ngay dingding gedgeloun ay gradraskaun, ay kata gtalfus sas dingding, 38kanya fag tagfon fanggalangun gduksun sanya ginan fag bale ay gfaragangan yay fituk menit. 39Ay sis fafituk menit, kafag tagfon fanggalangun gdog yay nanlag kafag bale at amling, ay nu nalag te, kafag amling anfagdaul wan sas basad bale, 40kanya gbul wan at ke amling fag dingding ay gukas wan sas day furuan, sas fagukasan ngay nakaurian. 41Ay gbul yangay fagayu dingding at tagamling ay gukas sas day furuan, sas fagukasan nusnga setaw at natuyan te, masuya. 42Ay kafag tagfon fanggalangun gsugu te, “Tubusi fagayu at naukas fag dingding.”
43Dewa katanya, kanya fag bale nu nadog yay anke amling, 44tagfon fanggalangun gdog yay sanya fag bale laman nanginsaful. Ay amling nu nadog way anfagdaul sanya fag bale, gtuyan kafag bale te, masuya, aroro amling kafoli way gugat sanya fag bale. 45Iklasi wan kanya fag bale, ay ukasi wan fagayu fagagbilugun tagsanya fag bale sas fagukasan nusnge wain at natuyan te, masuya.
46Nusnga sinu fag taw at nasakbo sa tagfon fanggalangun at nadingding fag bale, tuyani te, kafag taw masuya yakmay menit anfalyu. 47Ay nusnga sinu fag taw at nanantiug ay at nafangon sanya fag bale, masine kanya fag taw nu gbakbak at lanbung.
48Dewa katanya, tagfon fanggalangun nu nainsaful wan kanya fag bale gina natubus at ke amling fag ngay dingding ay nu nalag te, we amling ya, tagfon fanggalangun gfoyung te, kanya fag bale masine wan aroro we amling ya. 49Sanya ginan, kafag tagfon fanggalangun gbul duak manuk tungud, sik sanga sirut sidru, sik fansiuk at maraska, ay sik sanga isupu, laman gfatuyan te, kanya fag bale masine wan. 50Kanya gfabul at sadi fag manuk tungud sis tungud tikung at ke mamam siginans bulbug. 51Ay kanya gbul kayu sirut sidru, ay at maraska fag fansiuk, makmak isupu, ay at sadi fag manuk tungud ay gfasurung kanya fagayu sasad mamam sas baringan at ke taguk siginan at nafabul fag manuk tungud. Ay kanya gbul at ba mamam at ke taguk ay gfaramsig sanya fag bale fitu ginan. 52Nu katanya, tagfon fanggalangun nafalyam kanya fag bale at fagmasuyaun siginan nu gagbilug, manuk tungud at taguk, mamam siginans bulbug, tagleleg fag manuk tungud, kayu sidru, isupu fag makmak ay at maraska fag fansiuk. 53Sanya ginan, kanya gfalfas tagleleg fag manuk tungud sas day furuan. Katanya tagfon fanggalangun at fakamulun sat ke amling fag bale.
54-57Katanya at faugali sabaliwa at maksvn fag fakasaitun sit balat kata fanggatul, famaga, butsig ay nu galanu, ay sabaliwa at namling fag lanbung ay fag bale. Siginan takatanya fag faugali sumaful am te, kanya at masuya ay at masine.
Currently Selected:
Lebitiku 14: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
