Ester 1
1
Basti Fun at Mangena Antubus Wan
1-2Sis talun Persya e sik fun at ngayan Akasuerus.#1:1-2 Akasuerus: at ngayan yangay te, Xerxes. Kanya gbanwan sit bale sis furuan Susa. Kanya at fagagbilugun sadik sandan duak safulu e fituk afud talun siginans Indya sitsigons Etiupya.#1:1-2 Etiupya: sas Ebreu, Kus. 3Ay gina sis fatuluk banwa nu gfunan, kanya nafalganan sik fagmafulun daul laman sat ngay tagfagtainan ay sat ngay fagsuguan ay sa tiba yak tagfakamulun sit bale. Nasanya yangay Persya ay Medya at ngay fun tagfawayan, ay anggan takadungug fag ngay taw ay ngay fun ayu sirut siginan sangay afud talun. 4Ay kanya fag fagusegananun at kadugean unumk magdanun. Kadugenya, fun Akasuerus nafalag at ngay ramraman, ay at fagmabalyananun, ay at fagmakatuun nu mabanwan.
5Sanya ginan, fun nafalganan yangay sik ngay fakonun sa sangay taw Susa, at maramraman ay at yud e kwa. Ay kanya fag fagmafulun nafakamulun sis fun at bale at basad alad. At kadugean sik linggu. 6Kanya fagayu narabing sik ramit daul malaksi ay melo at mawatan siginan at masine fag ramit, ay at fansalod sik ramit masine maubian. Ay nasayang sa sik ngay takatas fanumyu, si sangay gang fag ngay turuk. Ay at faglunggungan mawatan siginans gintu ay sanbung salapi. Ay at salug e ngay gang ayu sirut at mabyat nu kabayad, ay at famasine at madalusan fag ngay gang siginans ale. 7-8Ay at ngay betaw at faginuman fag ngay taya saman wa saman at kadaulan ay at kawalungan ay mawatan siginans gintu. Sanya ginan, fun nasugu sat ngay fagsuguan laman gfon sat ngay betaw fanlangu at mabyat nu kabayad, nu seyu at fakaylatun.
9Ay Basti, fun at mangena, nafalganan yangay laman sa sangay mangena tagsis fun Akasuerus at bale.
10Ay gina sis fafituk menit nu maful, fun guseganan aroro ngayuk fanlangu at nainum. Kanya nafauro at nafili fag fituk fagsuguan tagalaga anya. Kafag ngay fagsuguan: Meuman, Bista, Karbuna, Bigta, Abagta, Setar, ay Karkas. 11Sanya ginan, fun nafauro at mangena Basti. Ay nasugu te, suluni at sangbo laman gfalag at kasinean sa sangay tagfangguna ay sat ngay betaw aroro kanya maksvn nu masine. 12Dewa katanya, kanya fag ngay fagsuguan nu nalong fun at longan sas Basti, Basti glong way te, “Kwa kaylat sanya.” Nu katanya, fun andotama anya.
13Fun naet famalun sat mamatanganan fag ngay taw tagsaful ngay faugali sabaliwa at fagmafunanun, 14At fagnangetan gugat fangatulun sas Karsena, Setar, Admata, Tarsis, Meres, Marsena, ay Memukan. Kanya wa fag fitu tagfangguna sis Persya ay sis Medya, ay kanya fagayu magamut gugat at fun.
15Ay fun nainto sanya fagayu te, “Kata furuan Persya at faugali, setain ro at masine ku fakamulun sas Basti aroro kanya wa nafaning angku?”
16Memukan nabalus te, “Mesug fag fun, am mangena Basti nasalan, bundi lang sa emu, anggan tua sam ngay tagfangguna sas fagdaul talun Persya ay Medya ay sas fagdaul am fagfagtainanan. 17Fagayu mangena ban nu nasaful Basti at nafakamulun at nayud nafaning gina fun guro anya, wa yangay ban gfaning ya at ngay sadili mangama. 18Ay katanya yangay ban ngay tagfangguna at ngay mangena sis Persya ay Medya at fagnamakamulunun nu nadungug sabaliwa fun at mangena at nafakamulun. Ngay mangena ban wa gsuyu ya at ngay mangama ay kauri way anya fagayu.
19“Mesug fag fun, nu kaylat o, awati sik suguan laman am mangena Basti wa masine ya nangalagan emu, ay tubusi wa anya sik tagtungud tua anya nu matuyan. Ay fariruki kafag faugali ay fagamuti sas Persya ay Medya at faugali laman ban wa kabali. 20Ay am fagfagtainanan ban nu nasaful takatanya fag faugali, ngay mangena ban gfaning tua at ngay mangama dewa takadungug fag mangena ay at yud kadungug.”
21Ay fun Akasuerus ay at ngay tagfangguna naylat Memukan at famalun ay nafaning wa fia katanya. 22Ay fun nasugu te, “Riruki sat mesa fangaringang ay fabubai sa sangay afud talun sas fagdaul ku fagfagtainanan.” Katatuy at rirukan, galay sik talanan mangama tua tagfangguna.
Currently Selected:
Ester 1: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
