1 Krunika 22
22
1Sanya ginan, Dabid glong te, “Gfalindug ban tam ste fag talun Yawi at bale ay sik fagirugan laman ngay taw Israel nu e fagnangirugun fanggalangun, sanya nu nangirug.”
Nu Gfalganan laman Gfalindug Yawi at Bale
2Sanya ginan, Dabid nasugu te, “Fafuli tibak talun at ngay taw tagbanwan sis talun Israel.” Ay kanya nafili sanya ginan fag ngay taw, tagfasine gang laman fangawat Dius at bale. 3Ay Dabid nafalganan ngayuk sanbung laman fangawat paku ay famatawad laman sa sangay sakbawan, ay ngayuk tansu at yud kafabudbungguan ya at kabyatan. 4Ay Dabid nafalganan yangay taw Sidun ay taw Tiru at nabuba sa anya ngay kayu sidru. 5Ay kanya nalong te, “Ku baguama Sulumun mabaguama yay ay ye nagdalanan. Nangus Yawi at bale maksvn nu masine ay umsik takadungug sas fagdaul daga. Nu katanya, siginan yay katsi gfalganan kwan.” Ay kaduge Dabid gleleg, naugatan nafalganan.
6Sanya ginan, Dabid nauro at baguama Sulumun ay gsugu te, “Awati sik bale laman sas Yawi, ngay taw Israel at Dius.” 7Ay Dabid nalong yangay te, “Ku baguama, namalindug kwa ma Yawi at bale, laman sat fagmasineun. 8Dewa katanya, Yawi nalong sa angku te, ‘Ngayu ginan o namawayan ay ngayu am nafabul, nu katanya, kwa kaylat nu gfalindug o ku bale laman sa ku ngayan at fagmasineun. 9Dewa katanya, namon kban sa emu sik baguama at nanfunan ke fagmanabayanun aroro at ngay fawayan ban wa namasalag anya. Ay at ngayan Sulumun,#22:9 Sulumun: tibaginan siginans Ebreu fag longan shalom, at masuad te, fagmanabayanun. ay gfon kban fagmanabayanun sas Israel gina kanya gfunan. 10Kanya ban at namalindug ku bale laman sa ku ngayan at fagmasineun, ay gtuyan kban anya te, ku baguama ay au at mama. Ay at ngay kasugfunanan gfunan kabavn ban sas fagdaul talun Israel.’
11“Nu katanya, ku baguama, Yawi ban nangus galo tua gugat emu ay manabayan tua ban nangus nu gfalindug o sik bale laman sam Dius Yawi, kata at nalong emu am fagnamakamulunun. 12Yawi am Dius gfon ban nangus emu fagsafulun ay fagmatogdungugun laman mafafasludan o at ngay suguan gina ban nafili emu laman sik fun sis talun Israel. 13Ay nu nafafasludan tua ban o at ngay suguan ay at ngay faugali at nafon sa sangay taw Israel siginans Muisis, manabayan tua ban o gugat. Nu katanya, maksvni tua ay mabitsugi ay lag o kalimu ay kamomuy. 14Maksvn nu ginkidapan au gfalganan ngay famale Yawi at bale, tuluk libu limak sandank libuk fabudbungguan gintu, ay tuluk safulu e limak milyunk fabudbungguan salapi, ay ngayuk tansu, at yud kafabudbungguan ya at kabyatan. Nafalganan kyangay ngay kayu ay ngay gang, dewa katanya, famuti yap. 15Ngayu tua am tagfakamulun laman tagfasine gang, tagrufa ngay gang, ngay tagsaful kawat bale ay ngay taw at ke fagmakatuun nusnga setaw fag fangawatun 16at mawatan siginans gintu, salapi, tansu ay sanbung. Fasigadi wan nu gfawat o Yawi at bale, ay Yawi ban gufud emu.”
17Sanya ginan, Dabid nasugu fagayu tagfangguna sis talun Israel laman ggubuk at baguama Sulumun. 18Ay kanya nalong sanya fagayu te, “Ay Dius Yawi gufud tua ayu ay gfayayu ayu siginan ay ngay fawayan at munakbang si ayu aroro kanya nafatigwanan wa sa angku fagayu tagbanwan ste fag talun, ay katsi Yawi naylat nu gfagsuguan tam kanya fag ngay taw. 19Nu katanya, fatigwanani ay ngay sadili sa ay Dius Yawi, sas fagdaul ay amatanganan. Namasigad wam namawat Yawi at bale laman e fagfasakboan wam Fagsuadan Yawi at Nasadian ay fagayu fagagbilugun at yud e malong gina gfauseganan Yawi.”
Currently Selected:
1 Krunika 22: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
