1 Krunika 21
21
Dabid Nasugu at ngay Tagfawayan laman Nantap ngay Taw Israel
2Sa 24:1-25
1Satanas nafasaysalagan taw Israel, ay kanya nafamatangan Dabid laman nanginsaful te, seyu ngay taw Israel at kayuan. 2Ay Dabid nalong sas Uab ay sa sangay fun tagfawayan te, “Loi wan ay nantap am ngay taw Israel siginans furuan Beerseba sitsigons talun Dan. Ay afolii stae laman sumaful au.”
3Ay Uab gbalus te, “Yawi ban nangus gfamut am ngay taw sadik sandan ginan. Dewa katanya, mesug fag fun, wain am fakaylatun nantap am ngay taw? O nunda kanya fagayu bunwa am fagfunanun? Wain am fagnamae asalananun ngay taw Israel?”
4Dewa katanya, Dabid nafabulun. Nu katanya, Uab nalao sas fagdaul talun Israel ay anfoli wa vtv sas Erusalem. 5Ay kanya nalong sas Dabid fagayu mangama at kayuan ay at maseganama nu gfawayan: sis Israel sadik milyun ay sadik sandank libu, ay sis Uda ufatk sandan fituk safuluk libu. 6Ay aroro Uab kadotama at fun, kanya wa nanantap ya ngay taw Lebi ay ngay taw Benamin at ngay kasugfunanan. 7Ay anggan Dius wa yangay guseganan Dabid at nafakamulun takatanya, nu katanya, kanya nafaurianan Israel. 8Sanya ginan, Dabid nalong sas Dius te, “Maksvn ku asalanan siginan ku nafakamulun takatanya. Nu katanya, gfainfanyuan au sa emu te, falyami ku asalanan, aroro ku nafakamulun kata way sik taw at yud e fagsafulun.”
9Nu katanya, Yawi nalong sas Gad, Dabid at taglong te, 10“Loi sas Dabid ay namafili o anya te, inday tuy fag tuluk faurianan at fakaylatun ku fagnamakamulun sa anya.”
11Nu katanya, Gad nalao sas Dabid ay nalong sa anya te, “Kata tuy Yawi at longan te, ‘Inday tuy fag tuluk faurianan am fakaylatun? 12Tuluk banwa fanlunus, ay tuluk magdanun ay ngay fawayan nu gfaurianan ayu, ay tuluk menit Yawi nu gfaurianan ayu, siginan at tagbarita nu grasras fagdaul talun Israel.’ Amatangani ay longi ro sa angku ku famalus sas Yawi.”
13Ay Dabid gbalus Gad te, “Gidapan au gfili. Masine nu Yawi wan tagfaurianan angku, aroro Yawi mafangafanyu tua. Kwa kaylat nu ngay taw way ro at namaurianan angku.” 14Nu katanya, Yawi nafadasug faurianan sas talun Israel, ay fituk safuluk libuk taw Israel at kinbul. 15Ay gina Dius at tagbarita grasras Erusalem, Yawi nalag ay anfanyu kafag ngay taw, ay nalong sat tagbarita te, “Sabv ro! Faragangi wan nu gfaurianan o anya fagayu.” Ginanya Yawi at tagbarita malindug sis Arauna at fagruyusan, kanya sik taw Ebus.
16Ay Dabid natangda ay nalag Yawi at tagbarita nu malindug sis kiwang sis wabilug banwa ay daga. Ay kanya fag tagbarita e bitbitan fiso ay gfatiuan sas Erusalem. Nu katanya, Dabid ay at ngay fagtainan nasulun saku ay natudan laman gfalag te, kabalu. 17Ay Dabid nalong sas Dius te, “Au wan at nasugu te, tapi ngay mangama at makatu gfawayan. Au way lang at ke asalanan, ay tuy fag ngay taw wa kataip, kata way sik ngay tupa at yud e asalanan. Yawi ku Dius, ami yakman lang fag talanan am fagfauriananun. Lag o gfaidapan am ngay taw siginan takatanya fag fagidapun.”
18Sanya ginan, Yawi at tagbarita nasugu Gad sas Dabid laman nanlong te, “Loi sas Arauna fag taw Ebus at fagruyusan ay nangawat o sanya sik fagirugan fanggalangun laman sas Yawi.” 19Nu katanya, Dabid nalao ay nafaning Yawi at suguan siginans Gad fag taglong.
20Ginanya, Arauna ay at baguama fag ufat gruyus trigu. Ay talamean nu nalag Yawi at tagbarita, Arauna at ngay baguama natarung ay nasuksuan. 21Ay Arauna nalag Dabid nu kadasug ay kanya naduksun siginan at fagruyusan ay natudan sas Dabid at daga salubangan laman gfababaun. 22Ay Dabid glong anya te, “Falaoi sa angku am daga ay nangawat au sik fagirugan fanggalangun laman sas Yawi, laman umragang wan at faurianan sa sangay taw Israel. Ay gbayad kro sa emu nu seyu nu kabayad.”
23Ay Arauna glong sas Dabid te, “Kin, mesug fag fun, fakamuluni kata am fakaylatun. Ay gfon kro emu baka laman am fagirugun fag fanggalangun ay gfon kyangay ro sa emu ngay kayu sis fagruyusan laman am famaygang ay trigu laman am fanggalangun. Namon au sa emu takatanya fagayu.”
24Ay fun Dabid gbalus Arauna te, “Kwa kaylat gbul kanya fagayu kway ro e famayad. Gbayad kro sa emu nu seyu nu kabayad. Kwa namon ngay fanggalangun sas Yawi kway nabayad. Kwa nangirug ku yud nabayad fag fanggalangun.” 25Nu katanya, Dabid nafon sas Arauna unumk sandank lifung gintu laman famayad at daga. 26Sanya ginan, Dabid nawat sanya sik fagirugan fanggalangun laman sas Yawi, ay kanya nafon at fagirugun fag ngay fanggalangun, ay at ngay fanggalangun laman sas fagmanabayanun. Ay Yawi nabalus anya siginan nu gfadasug afuy siginans banwa laman tagirug ngay fanggalangun sis fagirugan. 27Nu katanya, Yawi nalong sat tagbarita te, “Fafolii wan am fiso sam guma.”
28Ay Dabid nu nalag te, Yawi nabalus at darangin, nafamut yay at nairug fag fanggalangun sis Arauna at fagruyusan. 29Ginanya, Yawi at bale ramit Muisis at nafawat gina sit yud e taw fag talun, ay fagirugan ngay fanggalangun, matungkud si tangabat fag afud furuan Gibyun. 30Dewa katanya, Dabid wa nasanya laman nanginto sas Dius aroro kanya kalimu Yawi at tagbarita at fiso.
Currently Selected:
1 Krunika 21: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
