गलातियन 2

पवलुस काहीं दूसर खास चेला लोग सोइकार किहिन

1चउदा बरिस के बाद हम बरनबास के साथ यरूसलेम सहर माहीं गएन, अउर तीतुस काहीं घलाय अपने साथय लइ गएन तय। 2अउर उहाँ जाँइ के खातिर परमातिमा हमहीं दरसन दिहिन एसे हम उहाँ गएन, अउर जउने खुसी के खबर के प्रचार हम गैरयहूदी लोगन के बीच माहीं करित हएन, उहय खुसी के खबर काहीं हम उनहिन काहीं अलग लइ जाइके सुनायन, जउन मसीही मन्डली के मुखिया माने जात रहे हँय, जउने, जउन काम हम पहिले किहेन तय, अउर अबे कइ रहेन हय, ऊँ बेकार न ठहरँय। 3अउर तीतुस घलाय जउन गैरयहूदी आहीं; हमरे साथ माहीं रहे हँय, तऊ उनहीं खतना करामँय के खातिर मजबूर नहीं कीन ग। 4पय इआ, ऊँ झूँठे बिसुआसी लोगन के कारन भ, जउन सच्चे बिसुआसी लोगन के बीच माहीं भेद लेंइ के खातिर घुसि आएँ तय, कि उआ अजादी काहीं जउन हमहीं पंचन काहीं मसीह यीसु के व्दारा मिली हय, हमार पंचन के भेद लइके पुनि हमहीं पंचन काहीं गुलाम बनामँइ। 5पय हम पंचे उनखे बातन काहीं एक्कव नहीं मानेन, कि जउने यीसु मसीह के खुसी के खबर के सच्चाई, तोंहरे जीबन माहीं पूरी तरह से बनी रहय।

6अउर ओखे बाद जउन मसीही मन्डली के मुखिया माने जात रहे हँय, उनसे हमहीं कउनव मदत नहीं मिली, (ऊँ पंचे चाह केतनव लाटसाहब रहे होंय, हमहीं पंचन काहीं एखर कउनव चिन्ता नहिं आय, काहेकि परमातिमा कोहू के साथ भेदभाव नहीं करँय) 7पय एखे बिपरीत जब ऊँ पंचे इआ समझिन कि, परमातिमा जइसन यहूदी लोगन काहीं खुसी के खबर सुनामँइ के काम पतरस काहीं सँउपिन तय, उहयमेर गैरयहूदी लोगन काहीं खुसी के खबर सुनामँइ के जबाबदारी हमहीं सँउपिन हीं। 8(काहेकि जइसन परमातिमा पतरस काहीं यहूदी लोगन के बीच माहीं यीसु के खास चेला के रूप माहीं, काम करँइ के सक्ती दिहिन हीं, उहयमेर परमातिमा हमहूँ काहीं यीसु के खास चेला के रूप माहीं, गैरयहूदी लोगन के बीच माहीं काम करँइ के सक्ती दिहिन हीं।) 9अउर जब ऊँ पंचे परमातिमा के उआ किरपा काहीं जान लिहिन, जउन हमहीं मिली रही हय, तब याकूब, पतरस अउर यूहन्ना जउन मसीही मन्डली के मुखिया माने जात रहे हँय, हमसे अउर बरनबास से हाँथ मिलाइके अपने साथ सामिल कइ लिहिन, कि हम पंचे खुसी के खबर सुनामँइ के खातिर, गैरयहूदी लोगन के बीच माहीं जई, अउर ऊँ पंचे यहूदी लोगन के लघे जाँय। 10ऊँ पंचे, केबल हमसे पंचन से एतना कहिन, कि तूँ पंचे कंगालन के ख्याल किहा, अउर हम पंचे खुदय इहय काम करँइ के खातिर खुब इच्छुक रहेन हय।

पवलुस के पतरस काहीं डाँटब

11पय जब पतरस अन्ताकिया सहर माहीं आएँ, तब हम उनखे आँगे खुलिके बताय दिहेन, कि “तूँ गलती कइ रहे हया।” 12काहेकि याकूब के पठए यहूदी लोगन के आमँइ से पहिले ऊँ पंचे गैरयहूदी लोगन के बीच माहीं खात-पिअत रहे हँय, पय ऊँ यहूदी लोगन के डेरन के मारे, जउन खतना करामँइ के ऊपर जोर देत रहे हँय, गैरयहूदी बिसुआसी लोगन के बीच से अलग होइगें, अउर उनसे दूरी रहँइ लागें। 13अउर पतरस के ढोंग के कारन यहूदी बिसुआसी लोग पतरस के ढोंग माहीं सामिल होइगें, इहाँ तक कि बरनबास घलाय उनखे साथ भटकिगा। 14पय जब हम देखेन कि ऊँ पंचे खुसी के खबर के सच्चाई के मुताबिक सही चाल नहीं चलँय, तब हम सगलेन के आँगे पतरस से कहेन, कि जब तूँ यहूदी होइके यहूदी लोगन कि नाईं नहीं, पय गैरयहूदी लोगन कि नाईं चलते हया, त पुनि गैरयहूदी लोगन के ऊपर, यहूदी लोगन के रीति-रिबाज के मुताबिक चलँय के खातिर, काहे दबाव डरते हया?

केबल बिसुआस के व्दारा मुक्ती पाउब

15हम पंचे त जन्मय से यहूदी आहेन, अउर मूसा के बिधान के पालन करत आएन हय, हम पंचे ऊँ गैरयहूदी लोगन म से न होहेंन, जिनहीं यहूदी लोग पापी समझत हें। 16यहूदी लोग इआ मानत रहे हँय, कि मनई मूसा के बिधान के पालन करे से परमातिमा के नजर माहीं निरदोस ठहरत हें। पय अब हम इआ जानित हएन, कि केबल यीसु मसीह के ऊपर बिसुआस करँइ के कारन मनई निरदोस ठहरत हें। एहिन से हमहूँ पंचे घलाय मसीह यीसु के ऊपर बिसुआस किहेन हय, जउने हम मसीह के ऊपर बिसुआस किहे के कारन निरदोस ठहरी। पय मूसा के बिधान के पालन करँय के कारन नहीं, काहेकि कउनव मनई मूसा के बिधान के पालन करँय के कारन, परमातिमा के नजर माहीं निरदोस न ठहराबा जई। 17पय अगर हम पंचे जउन मसीह के ऊपर बिसुआस किहे के कारन परमातिमा के नजर माहीं निरदोस ठहरँय चाहित हएन, अउर हम पंचे खुदय पाप करँय बाले निकरी, त का मसीह पाप करँय बालेन काहीं बढ़ाबा देत हें? बेलकुल नहीं 18काहेकि हम मूसा के बिधान के जउने नेमन काहीं मानब छोंड़ि दिहेन हय, अगर हम उनहिन काहीं पुनि अपनाइत हएन, त हम खुद काहीं अपराधी ठहराइत हएन। 19जब हम मूसा के बिधान काहीं पालन करँइ के कोसिस किहेन तय, त परमातिमा के नजर माहीं दोसी ठहराए गएन। एसे हम मूसा के बिधान काहीं पालन करब छोंड़ दिहेन, कि जउने हम परमातिमा के खातिर जि सकी। इआ कारन मूसा के पुरान बिधान के खातिर मर गएन हय, कि जउने परमातिमा के खातिर जीबन जी। 20अउर हम मसीह के साथ क्रूस माहीं चढ़ाए गए हएन, अउर हम अब से जिन्दा नहीं रहि गएन, बलकिन मसीह हमरे भीतर जिन्दा हें। अउर अब हम देंह माहीं जउन जिन्दा हएन, उआ केबल परमातिमा के लड़िका के ऊपर बिसुआस किहे के कारन जिन्दा हएन, जउन हमसे एतना प्रेम किहिन, कि खुद काहीं हमरे खातिर बलिदान कइ दिहिन हीं। 21एसे हम परमातिमा के किरपा काहीं बेकार नहीं ठहराई, काहेकि अगर मूसा के बिधान के पालन करँय के व्दारा, मनई परमातिमा के नजर माहीं निरदोस ठहरत, त मसीह फालतू माहीं आपन प्रान काहे क देतें?

Currently Selected:

गलातियन 2: bag

Highlight

Copy

Compare