1 थिस्सलुनीकियन 4

परमातिमा काहीं प्रसन्न करँइ बाला जीबन

1हे भाई-बहिनिव, हम पंचे तोंहसे बिनती करित हएन, अउर तोंहईं प्रभू यीसु के नाम से समझाइत हएन, कि जइसन तूँ पंचे हमसे पंचन से निकहा चाल-चलन चलब, अउर परमातिमा काहीं प्रसन्न करब सिखे हया, अउर उहयमेर चलते घलाय हया, त इहइमेर अउर आँगे बढ़त चले जा। 2अउर हम पंचे प्रभू यीसु के तरफ से जउन-जउन हुकुम तोंहईं बताए रहेन हय, उनहीं त तूँ पंचे जनतेन हया? 3काहेकि परमातिमा के इआ इच्छा ही, कि तूँ पंचे पबित्र बना, मतलब ब्यभिचार से बचे रहा। 4अउर तोंहरे पंचन म से हरेक जन अपने देंह के बासनन काहीं काबू म करब सिखा, काहेकि इआ पबित्र अउर आदर के काबिल हय। 5अउर इआ काम बुरी इच्छा से न किहा, जउनमेर ऊँ जातिअन के मनई करत हें, जउन परमातिमा काहीं नहीं जानँय। 6अउर परमातिमा के इहव इच्छा ही, कि इआ बात माहीं कोऊ अपने बिसुआसी भाई-बहिनिन काहीं धोखा न देय, अउर न उनखर अनुचित फायदय उठाबय, काहेकि प्रभू ईं सगली बातन के बदला लेंइ बाले हें; इआ बात काहीं हम पंचे पहिलेन तोंहईं बताय चुके हएन, अउर सावधान किहेन रहा हय। 7काहेकि परमातिमा हमहीं पंचन काहीं असुद्ध होंइ के खातिर नहीं, बलकिन पबित्र बनँइ के खातिर बोलाइन हीं। 8इआ कारन से जे कोऊ ईं बातन काहीं तुच्छ जानत हय, उआ सिच्छा देंइ बाले मनई काहीं नहीं, बलकिन परमातिमा काहीं तुच्छ जानत हय, जउन आपन पबित्र आत्मा तोंहईं देत हें। 9पय आपस के भाईचारा के प्रेम के बारे माहीं, तोंहईं हमहीं अउर कुछू लिखँइ के जरूरत नहिं आय? काहेकि आपस माहीं प्रेम करब तूँ पंचे खुदय परमातिमा से सिखे हया। 10अउर पूरे मकिदुनिया प्रदेस के सगले बिसुआसी भाई-बहिनिन के साथ, अइसन प्रेम करते घलाय हया, पय हे भाई-बहिनिव, हम पंचे तोंहईं समझाइत हएन, कि इहइमेर प्रेम अउर जादा से जादा करत चले जा। 11अउर जइसन हम पंचे तोंहईं हुकुम दिहेन हय, उहयमेर सान्ति के साथ रह्या, अउर आपन-आपन काम धंधा करँइ के, अउर अपने-अपने हाँथन से कमाँय के कोसिस करा। 12जउने तोंहईं कउनव चीज के कमी न होय, अउर मसीही मन्डली के बाहर बालेन के साथ निकहा बरताव किहा।

प्रभू के दुसराय आउब

13हे भाई-बहिनिव, हम पंचे इआ नहीं चाहित आहेन, कि तूँ पंचे उनखे बारे माहीं जउन प्रभू के ऊपर बिसुआस कइके मरिगें हँय, अनजान रहा; कहँव अइसन न होय, कि तूँ पंचे अबिसुआसी लोगन कि नाईं सोक करा, जिनहीं कउनव आसा नहिं आय। 14काहेकि अगर हम पंचे बिसुआस करित हएन, कि यीसु मरिगें, अउर पुनि जिन्दा होइगें, उहयमेर परमातिमा उनहूँ काहीं, जउन यीसु के ऊपर बिसुआस करत-करत आपन प्रान दइ दिहिन हीं, यीसु के साथ लइ अइहँय। 15काहेकि हम पंचे प्रभू के बचन के मुताबिक तोंहसे इआ कहित हएन, कि हम पंचे जेतने जिन्दा हएन, प्रभू के दुसराय आमँइ तक बचे रहब, तऊ जउन प्रभू के ऊपर बिसुआस कइके मरिगें हँय, उनसे आँगे कबहूँ न होए पाउब। 16काहेकि प्रभू खुदय स्वरग से उतरिके अइहँय; उआ समय ललकार, अउर प्रधान स्वरगदूत के बोल सुनाई देई, अउर परमातिमा के तुरही फूँकी जई, तब जउन मसीह के ऊपर बिसुआस कइके मरिगें हँय, ऊँ पंचे पहिले जि उठिहँय। 17ओखे बाद हमरे पंचन म से जेतने जिन्दा बचे रहब, उनहिन के साथ बदरिन माहीं उठाय लीन जाब, कि प्रभू से अकास माहीं मिली, अउर इआमेर से हम पंचे हमेसा प्रभू के साथ रहब। 18एसे तूँ पंचे ईं बातन से एक दुसरे काहीं सान्ति द्या करा।

Currently Selected:

1 थिस्सलुनीकियन 4: bag

Highlight

Copy

Compare