फिलिपियों 2

मसी की नरमाई अन मोटाई

1यद्याँ मसी थाँकी हिम्मत बड़ावे, वाँको परेम थाँने धिज्यो देवे, पुवितर आत्मा थाँके हाते रेवे, अन थाँ एक-दूँजा का वाते दया अन बाळ राको हो 2तो एकीस होच, एकीस परेम, एकीस मन अन एकीस मनसा राकन मारो आणन्द पूरो करो। 3खुद का हवारतऊँ कई मती करो अन जूटो मेपणो मती करो, पण नरमाईऊँ खुदऊँ हेला एक-दूँजा ने हव हमजो। 4थाँ हाराई खुद का ने पण दूजाँ का भला का बारा में होचो। 5थाँको होच-बच्यार ईसू मसी के जस्यान वेणो छावे।

6ईसू मसी हमेस्यान परमेसर का रूप में हा,

पण परमेसर के बराबर रेवा की कदीई जिद ने किदी।

7ईंके बजाय वणी हारोई छोड़ दिदो अन

एक दास को रूप धारण करन मनक बणग्यो।

मनक बणन 8खुद ने नरम करन मोत वेबा तईं आग्या को पालण करतो रियो।

अन अटा तईं के हूळी की मोत भी सेण कर लिदी।

9ईं वाते परमेसर वींने घणो ऊसो उटायो

अन अस्यो नाम दिदो ज्यो हाराई नामाऊँ मोटो हे।

10 # यसा 45:23 ताँके हरग में अन धरती पे अन धरती का रेटे रेवे हे,

वीं हारई ईसू का नाम ने मान देबा का वाते गोडा टेके हे।

11अन बापू परमेसर की मेमा का वाते

हारई ओ मान ले के, ईसू मसीइस परबू हे।

दनियाँ में तारा के जस्यान चमको

12ईं वाते ओ मारा लाड़ला भायाँ, जद्याँ मूँ थाँका हाते हो वीं दाण जस्यान थाँ मारी आग्या हरदाण मानता हा वस्यानीस अबे भी जदी मूँ छेटी हूँ वणीऊँ हेली आग्या मानता रेवो। थाँकी मुगती ने पुरी करबा का वाते, दरपता अन धूँजता तका मेनत करता रो। 13परमेसरइस हे ज्यो थाँका जीवन में काम कररिया हे ताँके थाँकामें वाँका मकसद ने पूरो करबा को मन अन तागत वेवे।

14हारई काम बना बड़बड़ान अन बना बेस करिया करता रेवो। 15#वे.वि 32:5ताँके थाँ ईं टेड़ी अन नसंगी हुगली पीड़ी का बचमें परमेसर का खरा, स्यवकार अन बना दोस का छोरा-छोरी वे जावो। थाँ अस्यी दनियाँ में तारा के जस्यान चमको, 16जद्याँ थाँ जीवन देबावाळा परमेसर का बचन ने लेवो, तो मसी का पाच्छा आबा के दन में मने बड़ई करबा को मस वे के, हव-हमच्यार ने फेलाबा को मारो काम अन मारी मेनत वल ने वी।

17थाँको विस्वास ज्यो परमेसर के चड़ी तकी बली अन सेवा के जस्यान हे, वींका वाते यद्याँ मने मारो लुई भी वेवाड़णो पड़े तद्याँ भी मूँ राजी हूँ अन थाँ हाराई का हाते खुसी मनाऊँ हूँ। 18वस्यानीस थाँ भी राजी रेवो अन मारा हाते आणन्द मनाओ।

तिमुतियुस अन इपापरदितुस

19मने परबू ईसू में आस हे के, मूँ तिमुतियुस ने थाँका नके पगई खन्दाऊँ, ताँके थाँकी दसा हामळन मने सान्ती मले। 20काँके माकाँ नके अस्यो कुई ने हे जिंका बच्यार मारे जस्यान का वे अन थाँकी भलई का वाते हाँचा मनऊँ चन्ता करे। 21काँके हारई आपणाँ हवारत की भाळ में रेवे हे, ने के ईसू मसी की। 22थाँ ईं बात ने जाणो हो के, वणी ओ साबत किदो के वो ईंका वाते जोगो हे। जस्यान एक बेटो आपणाँ बाप का हाते काम करे हे, वस्यानीस वणी हव हमच्यार ने फेलाबा में मारा हाते एक दास के जस्यान काम किदो। 23ईं वाते आस हे के, जस्यानीस मने नंगे पेड़ी के, मारा हाते जेळ में कई वेबावाळो हे, वस्यानीस मूँ वींने थाँका नके पगई खन्दा देऊँ। 24अन मने परबू पे विस्वास हे के, मूँ खुद भी पगई आऊँ।

25मूँ ओ जरूरी हमजूँ हूँ के, आपणाँ भई इपापरदितुस, ज्यो मारे हाते काम करबा अन लड़ई करबा में मारो हण्डाळ्यो हे। अन जरूत में मारी सेवा-चाकरी करबावाळो थाँका आड़ीऊँ खन्दायो तको दूत हे, वींने थाँका नके खन्दाऊँ। 26वो थाँकाऊँ मलबा की वाट नाळरियो हे अन वो ओरी चन्ता में पड़ग्यो के, थाँ वींका बारा में हुण लिदो हे के, वो मांदो हे। 27हाँची में वो मांदो वेग्यो हो अटा तईं के मरबा में हो, पण परमेसर वींपे दया किदी, अन बेस वींपेईस ने पण मारा पे भी किदी ताँके मूँ ओरी दकी ने वूँ। 28ईं मस मूँ वींने खन्दाबा का वाते ओरू भी छावूँ हूँ के, थाँ वणीऊँ पाच्छी भेंट करन खुस वे जावो अन मारो भी दुक खतम वे जावे। 29ईं वाते थाँ परबू पे विस्वास राकबावाळा भई के जस्यान वींकी आवभगत घणा आणन्दऊँ करज्यो अन अस्या मनकाँ को मान करिया करो। 30काँके वो मसी का काम वाते आपणाँ जीव ने अबकी टेम में नाकन मोत का भड़े आग्यो हो, ताँके थाँकी ओरुँ ज्या कमी सेवा में रेगी ही वींने पुरी करे।

Currently Selected:

फिलिपियों 2: एम टी आर

Highlight

Copy