22 أيث-كورينث 8
8
ئِجّن ن لْمِثَال ن صّذَاقَا زِي ڒْمُوْمِنِين إِݣ يدْجَان ذِي مَاسِدُوْنْيَا
1فَا آي أَيثْمَا، نخْس اَذ تسّْنم خ اَرْضَا نِّي إِي ذَاسنْت يُوْشَا أَربِّـي إِ ثْجُوْمَاع ن ڒْمُوْمِنِين إِݣ يدْجَان ذِي لْإِقْلِيم ن مَاسِدُوْنْيَا. 2ثكَّا خَاسن يجّن ن ڒْمِحْنث ذ ثَمقّْرَانْت ثقْسح خَاسن اَطَّاس. وَاخَّا نِثْنِي ذ يپُـوْبْرِيثن وَار غَارْسن وَالُو وَلَكِن نِثْنِي ڒفْرَاحث نْسن ثمْغَر. زِي مَانَاينِّي إِي زِي تفّغ يجّن ن صَّذَاقَا ذ ثَمقّْرَانْت اَطَّاس. 3أَقَا نش شهّْذغ صدّْقن س مِين زمَّرن اَذ ؤُشن، قَا ذ صَّح صدّْقن كْتَار زِي مِين زمَّرن. ݣِّين مَانَايَا س ڒْخَاضَر نْسن وَاحذْسن، 4تَّارن زَّايْنغ س وُوْڒ نْسن اَذ عَاوْنن س ڒْخِير-أَ ڒْمُوْمِنِين صَّالِحِين إِي يدْجَان ذِي ثنْدِينْت ن لْقُدْس. 5نشِّين نذْهش وَامِي ݣِّين مَانَاينِّي. عْلَاحْسَاب مِين يخس أَربِّـي سلّْمن ذ اَمزْوَارُو ڒْخَاضَر نْسن إِ سِيذِيثْنغ أُو عَاذ سلّْمن-ث إِ نشِّين.
6أَمنِّي إِي نْوصَّا تِيتُوْس وَامِي تُوْغَا يبْذَا يجمّع زِي قْبڒ ڒْخِير ن صَّذَاقَا-يَا زَّايْوم، ڒخُّو نْوصَّا-ث اَت يكمّڒ. 7كنِّيو تݣّم زْيَادَا ذِي مَارَّا ثِمسْڒَايِين، يعْنِي ذِي لْإِيمَان نْوم ذ لْخُطْبَا نْوم ذ ثُوْسْنَا نْوم ذ مَامّش إِي تْحَوَاڒم س وُوْڒَاون نْوم أُو ذ ڒمْحِبّث نْوم إِ نشِّين. أَمُّو إِي غَا ثݣّم مْلِيح اَطَّاس ذِي ڒْخِير ن صَّذَاقَا-يَا عَاوذ. 8وَار قَّارغ شَا مَانَايَا ذ يج ن ڒُوْصِيّث؛ نش رزُّوْغ اَذ جَرّْبغ لْحَقِيقَا ن ڒمْحِبّث نْوم يعْنِي تْشَابَّاهغ مِين تݣّم كنِّيو اَك مَامّش تْحَوَاڒن يِوْذَان نّغْنِي س وُوْڒَاون نْسن ذِي ڒْخذْمث-أَ. 9أَقَا ثسْنم اَرْضَا ن سِيذِيثْنغ عِيْسَى لْمَسِيح. تُوْغَا نتَّا غَارس كُڒْشِي، وَلَكِن عْلَاحْسَاب نشِّين يسْمح ذِي كُڒْشِي مَانَاينِّي بَاش اَغَارْنغ يِيڒِي كُڒْشِي س مَانَاينِّي إِي ذِي يسْمح.
10ڒخُّو نش اَذَاوم ؤُشغ اَرَّاي ينُو ذِي مَانَايَا، أَزَّايس ثَاوِيم نّْفَع. أَزذْغَاث كنِّيو إِݣ يصدّْقن ذ يمزْوُوْرَا؛ أُو كنِّيو عَاوذ ذ يمزْوُوْڒَا إِي ثخْسم اَذ تݣّم مَانَاينِّي. 11ڒخُّو أُو لَابُد اَذ تْكمّْڒم شّْغڒ-أَ س مِين ثْزمَّرم اَذ تْصدّْقم. يعْنِي مِين ثبْذَام س وُوْڒَاون نْوم، إِيوَا عَاوذ كمّْڒم-ث. 12لِأَنَّا بْنَاذم مڒَا س ڒْخَاضَر نّس، مِين غَا يصدّق اَذ يتْوَاقْبڒ. وَلَكِن عْلَاحْسَاب مِين غَارس ذ اَݣْڒَا مَاشِي عْلَاحْسَاب مِين وَار غَارس.
13شُوْف، نشِّين مَا نْرزُّو اَذ تُوْشم فُوْس إِ يِوْذَان نّغْنِي، أَخَاوم يبسّڒ دْقڒ؟ لَّا، نْرزُّو مْكُڒ يجّن اَغَارس يِيڒِي ڒْحَقّ نّس نِيشَان. 14ذِي ڒْوقْث-أَ ثَانِيتَا مِين ذَاوم غَا يشطّن ذ اَݣْڒَا اَذ ينْفع إِ مِين تحْذَاجَان نِثْنِي. منْبَعْد، مِين ذَاسن غَا يشطّن اَذ ينْفع إِ مِين تحْذَاجَام كنِّيو. أَمُّو إِي غَا يِيڒِي ڒْحَقّ نّس نِيشَان إِ مْكُڒ يجّن. 15مَامّش يقَّار لْكِتَاب: "ونِّي يسْمُوْنن اَطَّاس وَار ذَاس يتْشطِّي وَالُو، ونِّي يسْمُوْنن ذْرُوْس وَار ذَاس يتْخصِّي وَالُو."
سّكّن تِيتُوْس ذ شَان ن وَاوْمَاثن غَار ثنْدِّينْت ن كُوْرِينْث
16أَ نحْمذ أَربِّـي وَامِي ذَاس يݣَّا ذݣ وُوْڒ إِ تِيتُوْس نّفْس ن ڒْخَاضَر إِي غَارِي نش خَاوم. 17ئِقْبڒ تِيتُوْس طَّلَاب نّغ، أُو كْتَار يتݣّ مَارَّا ثِزمَّار نّس اَغَارْوم د يَاس س ڒْخَاضَر نّس نِّيث. 18أَك تِيتُوْس نسّكّ ؤُمَاثْنغ نِّي مَعْرُوْف غَار مَارَّا ثِجُوْمَاع ن ڒْمُوْمِنِين خ ڒْخذْمث يتݣّ عْلَاحْسَاب لْإِنْجِيل. 19مَاشِي مَانَاينِّي وَاهَا، قَا خْضَرنْت-ث-يذ ثْجُوْمَاع ن ڒْمُوْمِنِين بَاش اَكِذْنغ يسَفَر خْمِي غَا نكْسِي ڒْخِير ن صَّذَاقَا-يَا. نْكلّف خ صَّذَاقَا-يَا إِ لْعَظَمَا ن سِيذِيثْنغ س يِيخف نّس أُو بَاش اَذ د يمظْهَار مَامّش نْتݣّ ثِزمَّار أَ نْعَاون. 20أَمُّو نخْس اَخَانغ نسْبعّذ اَيَا ن ڒْعِيب إِي خَانغ غَا ينِين خ مَامّش إِي غَا نْكلّف خ صَّذَاقَا-يَا ثَمقّْرَانْت. 21نْتݣّ ثِزمَّار بَاش أَ نݣّ مِين يدْجَان ذ اَصبْحَان مَاشِي عْلَاحْسَاب سِيذِي أَربِّـي وَاهَا، نْتݣّ عَاوذ عْلَاحْسَاب مِين تْوَاڒَان يِوْذَان.
22عَاوذ نسّكّ اَكِذْسن ؤُمَاثْنغ نّغْنِي اَطَّاس ن ثْوَاڒَاثِين نْجَرّب-يث نُوْفِي-ث يخدّم مْلِيح س وُوْڒ نّس. ڒخُّو عْلَاحْسَاب تِّقث ثَمقّْرَانْت إِي غَارس ذَايْوم يخدّم س وُوْڒ نّس عَاذ كْتَار زِي مِين تُوْغَا يخدّم قْبڒ. 23مڒَا سّقْسَان خ تِيتُوْس، نتَّا يشَرّش اَكِذِي يخدّم اَكِذِي جَارَاوم. مڒَا سّقْسَان خ أَيثْمَاثْنغ يِيْنَا، نِثْنِي سّكَّانْت-ثن ثْجُوْمَاع ن ڒْمُوْمِنِين سْبيَّانن-د لْعَظَمَا ن لْمَسِيح. 24فَلِهَاذَا، أَوِيم-اَسن إِ يرْيَازن-أَ دَّلِيل ن ڒمْحِبّث نْوم ذ سَّبَاب س مِينْزِي نْتفْتَخَر ذَايْوم بَاش مَانَايَا اَث ࢲرنْت ثِجُوْمَاع ن ڒْمُوْمِنِين.
Currently Selected:
22 أيث-كورينث 8: ريف
Highlight
Share
Copy
Want to have your highlights saved across all your devices? Sign up or sign in
