ಗಲಾತ್ಯೆರೆಗ್ 1
1
ವಂದನೆಲು
1-2ನರಮಾನಿಲೆಡ್ದಾವಡ್, ನರಮಾನಿಲೆ ಅಧಿಕಾರೊಡ್ದಾವಡ್ ಅಪೊಸ್ತಲೆ ಆವಂದೆ ಯೇಸು ಕ್ರಿಸ್ತಡ್ದ್ಲಾ ಆಯನ್ ಸೈತಿನಾಕುಲೆಡ್ದ್ ಲಕ್ಕಾದಿ ಅಮ್ಮೆ ಆದುಪ್ಪು ದೇವೆರೆಡ್ದ್ಲಾ ಅಪೊಸ್ತಲ ಬೇಲೆನ್ ಪಡೆಯಿನ ಪೌಲು ಇನ್ಪಿ ಯಾನ್ಲಾ ಎನಡೊಪ್ಪ ಉಪ್ಪು ಮಾತ ಸಹೋದ್ರೆರ್ಲಾ ಗಲಾತ್ಯೊಡುಪ್ಪು ಸಭೆತಾಕುಲೆಗ್ ಬರೆಪಿನಿ ದಾನೆಂದ್ಂಡ, 3ಅಮ್ಮೆ ಆದುಪ್ಪು ದೇವೆರೆಡ್ದ್ಲಾ, ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್ಲಾ ನಿಕ್ಲೆಗ್ ದಯಲಾ ಸಮಾಧಾನಲಾ ಆವಡ್. 4ಆಯೆ ಇತ್ತೆದ ದುಷ್ಟ ಲೋಕೊಡ್ದು ನಮನ್ ಬುಡ್ಪಾವೆರೆಗಾದ್, ನಮ ಅಮ್ಮೆ ಆದುಪ್ಪು ದೇವೆರೆ ಚಿತ್ತೊಗು ಸರಿಯಾದ್ ನಮ ಪಾಪೊಲೆಗ್ ಬೋಡಾದ್ ತನನ್ ತಾನೇ ಬಲಿಯಾದ್ ಅರ್ಪಿಸಾಯೆ. 5ಅಂಚಾದ್ ದೇವೆರೆಗ್ ಏನಿತ್ಯೇನಿಗ್ಲಾ ಮೈಮೆ ಆವಡ್; ಆಮೆನ್.
ಒಂಜೇ ಸುವಾರ್ತೆ
6ಕ್ರಿಸ್ತನ ದಯೊಡ್ದು ನಿಕ್ಲೆನ್ ಲೆತ್ತಿನಾಯನ್ ನಿಕುಲು ಈತ್ ಬೇಗ ಬುಡ್ದು ಬೇತೆ ಸುವಾರ್ತೆ ಪತ್ತೊಂಡಿನೆಕ್ಕ್ ಅಚ್ಚಿರ ಆಪುಂಡು. 7ಅವು ಸುವಾರ್ತೆನೇ ಅತ್ತ್, ಆಂಡ ಕೆಲೆವೆರ್ ನಿಕ್ಲೆ ನಡುಟು ಗಲಿಬಿಲಿ ಪುಟ್ಟಾದ್ ಕ್ರಿಸ್ತನ ಸುವಾರ್ತೆ ಬೇತೆ ಮಲ್ಪೆರೆಗ್ ಪ್ರಯತ್ನ ಮಲ್ತೊಂದುಲ್ಲೆರ್. 8ಆಂಡ ಎಂಕುಲು ನಿಕ್ಲೆಗ್ ಸಾರಿನ ಸುವಾರ್ತೆಗ್ ವಿರೋಧಾದ್ ಎಂಕುಲಾವಡ್ ಪರಲೋಕೊಡ್ದು ಬತ್ತಿನ ಒರಿ ದೂತೆನೇ ಆವಡ್ ನಿಕ್ಲೆಗ್ ಸಾರಿಯೆಡ, ಆಯೆ ಶಾಪಗ್ರಸ್ತೆ ಆವಡ್. 9ಇತ್ತೆ ನಿಕುಲು, ಒಪ್ಪಿನ ಸುವಾರ್ತೆಗ್ ವಿರೋಧವಾಯಿನೆನ್ ಬೇತೆ ಒವ್ವೆನಾಂಡಲಾ ಏರಾಂಡಲಾ ನಿಕ್ಲೆಗ್ ಸಾರಿಯೆಡ, ಆಯೆ ಶಾಪಗ್ರಸ್ತೆ ಆದುಪ್ಪಡ್ ಅಂದ್ದ್ ಎಂಕುಲು ದುಂಬು ಪಂಡಿಲೆಕ್ಕನೆ ಇತ್ತೆಲಾ ಕುಡ ಯಾನ್ ಪನ್ಪೆ.
10ಯಾನ್ ಇತ್ತೆ ಏರೆನ್ ಒಪ್ಪಿಯಾವೆರೆ ಪ್ರಯತ್ನ ಮಲ್ತೊಂದುಲ್ಲೆ? ನರಮಾನಿಲೆನಾ? ದೇವೆರೆನಾ? ಅತ್ತ್ಡ ಯಾನ್ ನರಮಾನಿಲೆನ್ ಮೆಚ್ಚಾವೆರೆ ತೂಪೆನಾ? ನನಲಾ ಯಾನ್ ನರಮಾನಿಲೆನ್ ಮೆಚ್ಚಾವೊಡಂದ್ ಇತ್ತೆಡ ಯಾನ್ ಕ್ರಿಸ್ತನ ದಾಸೆ ಅತ್ತ್.
ಪೌಲು ಎಂಚ ಅಪೊಸ್ತಲೆ ಆದುಪ್ಪುನವು
11ಸಹೋದ್ರೆರೇ, ಯಾನ್ ಸಾರಿದಿ ಸುವಾರ್ತೆ ನರಮಾನಿ ಆಲೋಚನೆದವು ಅತ್ತ್ ಅಂದ್ದ್ ನಿಕ್ಲೆಗ್ ತೆರಿಯೊಡು. 12ಯಾನ್ ಅವೆನ್ ನರಮಾನಿಲೆಡ್ದ್ ಹೊಂದುದಿಜಿ, ಎಂಕ್ ಏರ್ಲಾ ಬೋಧನೆ ಮಲ್ತ್ದಿಜೆರ್, ಯೇಸು ಕ್ರಿಸ್ತೆನೇ ಎಂಕ್ ತೆರಿಪಾದೆ.
13ಎಂಚಂದ್ಂಡ ದುಂಬು ಯಾನ್ ಯೆಹೂದ್ಯ ಮತೊಟು ಉಪ್ಪುನಗ ಎನ ನಡತೆನ್ ಕೇಂಡ್ದರತ್ತಾ. ಯಾನ್ ದೇವೆರೆ ಸಭೆನ್ ಭಂಗ ಬರ್ಪಾದ್ ಅವೆನ್ ಹಾಳ್ ಮಲ್ತೊಂದಿತ್ತೆ. 14ಉಂದತ್ತಂದೆ ಯಾನ್ ಎನ ಹಿರಿಯೆರೆಡ್ದ್ ಬೈದಿನ ಆಚಾರ ವಿಚಾರೊಡು ಬಾರಿ ಪ್ರೀತಿಡ್ ಇತ್ತ್ದ್ ಎನ ಸಮಪ್ರಾಯದ ಜನೊಕುಲೆ ಒಟ್ಟುಗು ಮಾತೆರೆಡ್ದ್ ಹೆಚ್ಚ್ ಯೆಹೂದಿ ಮತತ ಆಚಾರೊಡು ಆಸಕ್ತಿದಾಯೆ ಆದಿತ್ತೆ.
15ಆಂಡ ಯಾನ್ ಅಪ್ಪೆ ಬಂಜಿಡ್ಡುಪುನಗನೇ ಪ್ರತ್ಯೇಕ ಮಲ್ತ್ದ್ ತನ ದಯೊಟು ಲೆತ್ತಿನ ದೇವೆರ್ ಎನನ್ ಅಜತ್ ದೆತ್ತೊಂಡೆ. 16ತನ ಮಗನ್, ಯಾನ್ ಪಿದಯಿದ ಜನೊಕುಲೆಗ್ ಸಾರಿಯುಲೆಕ್ಕ ಆಯನ್ ಎನಡ ತೆರಿಪಾದ್ ಕೊರಿಯೆರೆ ದೇವರೆನ ಚಿತ್ತ ಆದಿತ್ತ್ಂಡ್. ಉಂದು ಆಯಿನಪಗ ಯಾನ್ ವಾ ನರಮಾನಿಲೆ ಕೈತಡೆಗ್ಲಾ ಪೋಯಿಜಿ. 17ಯೆರೂಸಲೇಮುಡು ಎನಡ್ದ್ ದುಂಬು ಅಪೊಸ್ತಲೆರಾಯಿನಾಕುಲೆ ಕೈತಲ್ ಪೋವಂದೆ ಯಾನ್ ಅರೇಬ್ಯಗ್ ಪೋದು, ಪಿರ ದಮಸ್ಕೊಗು ಬತ್ತೆ. 18ಮೂಜಿ ವರ್ಸೊಡ್ದು ಬೊಕ್ಕ ಪೇತ್ರನ ಗುರ್ತ ಮಲ್ತೊನೊಡಂದ್ದ್ ಯೆರೂಸಲೇಮುಗು ಪೋದು ಆಯಡೊಪ್ಪ ಪದಿನೈನ್ ದಿನ ಇತ್ತೆ. 19ಆಂಡ ಕರ್ತವೆ ಆದುಪ್ಪು ಯೇಸುನ ಮೆಗ್ಯೆ ಯಾಕೋಬುನು ಅತ್ತಂದೆ ಅಪೊಸ್ತಲೆರೆಡ್ ಬೇತೆ ಏರೆನ್ಲಾ ತೂತಿಜಿ. 20ಯಾನ್ ನಿಕ್ಲೆಗ್ ಬರೆಪಿನ ಸಂಗತಿಲು ಸುಳ್ಳು ಅತ್ತ್ ಅಂದ್ದ್ ದೇವೆರೆ ಎದುರು ಪ್ರಮಾಣ ಮಲ್ಪುವೆ.
21ಐಡ್ದ್ ಬೊಕ್ಕ ಯಾನ್ ಸುರಿಯ ಬೊಕ್ಕ ಕಿಲಿಕ್ಯ ಸೀಮೆಲೆಗ್ ಪೋಯೆ. 22ಆಂಡ ಕ್ರಿಸ್ತಡುಪ್ಪು ಯೂದಾಯದ ಸಭೆತ ಜನೊಕುಲೆಗ್ ಎನ ಗುರ್ತ ಇತ್ತ್ಜಿ. 23ಆ ಸಭೆತ ಜನೊಕುಲೆಗ್ ಈತೇ ಗೊತ್ತಿತ್ತ್ಂಡ್, “ದುಂಬು ಎಂಕ್ಲೆಗ್ ಭಂಗ ಬರ್ಪಾಯಿನಾಯೆಲಾ ಬೊಕ್ಕ ಕ್ರಿಸ್ತನ ಸಭೆನ್ ಹಾಳ್ ಮಲ್ಪೆರೆ ತೂವೊಂದು ಇತ್ತಿನಾಯೆಲಾ, ಇತ್ತೆ ಅಂಚಿನಾಯೆ ಕ್ರಿಸ್ತನ ನಂಬಿಕೆನ್ ಸಾರಿಯುವೆ ಇನ್ಪಿನೆನ್ ಮಾತ್ರ ಕೇಂಡ್ದ.” 24ಅಂಚಾದ್ ಅಕುಲು ಎನ ದಿಸೆಡ್ದ್ ದೇವೆರೆನ್ ಪುಗರಿಯೆರ್.
Currently Selected:
ಗಲಾತ್ಯೆರೆಗ್ 1: ತುಳು
Highlight
Share
Copy
Want to have your highlights saved across all your devices? Sign up or sign in
New Life Literature
