कलुसीयो 3

1मसी मरेड़ा मऊँ ओज्यु जीवायो गयो इ बजेऊँ थे आत्मा म जीवाया गया हो। इ ताँई थे ईस्बर नगरी हाळी चिजानै टोल्यो। जठै मसी परमेसर का दायणै हात कानि बिका सिंघासन प बिराजर्यो ह। 2-4थे तो आत्मा म मरेड़ा हा पण इब थारो जीवन मसी क सागै परमेसर म लुखेड़ो ह। अर जद बो परगट होसी जणा थानै बी बिकै सागै बिकी मेमा म परगट कर्यो ज्यासी। थारा जीवना की निम मसी ह। इ ताँई थे धरती हाळी चिजा प नइ पण ईस्बर नगरी हाळी चिजा प हियो लागाओ।

नयो अर पुराणो जीवन

5इ ताँई थारै मांयनै जोक्यु दुनियादारी की इछ्या गेल काम करै ह बानै मार द्‍यो, जंय्यां मुंडा काळा होबाळा नाजायज कुकरम बासना भर्या काम, बुरी इंछ्या अर लोभ-लालच जखो परमेसर की नजर्या म बुरो ह अठै ताँई की मूरती पूजा की जंय्यां ह। 6जखा आ कामानै करीं हीं बापै परमेसर को परकोप पड़ै ह। 7अर बो बी एक टेम हो जद थे बी आ बाता क गेल चालता हा अर अंय्यांई बुरी-बुरी बाता म जिर्या हा। 8पण इब थे आ सगळी चिजा क सागै, लाल-तातो होबो, दांत पिसबो, बैर बांदबो, दुसरा की बुराई करबो अर मुंडाऊँ गाळ्यां बकबानै छोड द्‍यो। 9#इफि 4:22आपसरी म झूठ मना बोलो क्युं क थे थारा पुराणा सुभावनै जिमै बुरी बाण ही बिनै छोड दिओ। 10#इफि 4:24अर नएड़ा सुभावनै ध्यार लिओ ह। अर थे परमेसर का गुण अर बिका सगळा ज्ञान म दिन-दिन बढता जाओ। 11अर इब कोई यूनानी अर यहूदि, सुन्नत हाळो अर बिना सुन्नत हाळो, बिना लोतर का, कुजात, गुलाम अर अजाद म कोई अंतर कोनी ह पण मसी सक्यु अर सगळा म ह।

12 # इफि 4:2 थे परमेसर का लाडला, पबितर अर टाळेड़ा मिनख हो। इ ताँई तरस, दया, नरमाई अर थ्यावस का गाबा पेरल्यो अर मन म बडा मना होवो। 13#इफि 4:32याद राखो परबु थारा पापनै माफ कर्यो ह, इ ताँई एक दुसरा की सिकायत करबा की बजाय बिनै सेल्यो अर एक दुसरानै माफ करो। 14अर आ सगळा लखणा म प्यार-परेमनै बी सामिल करल्यो जखो सगळी चिजानै आपसरी म कोनी टूटबाळा पटा म बांदै ह।

15परमेसर थानै एक सागै एकई काया म स्यांतीऊँ रेह्बा ताँई बुलायो ह, जणा इब थे मसी जखी स्यांती थानै दि ह बिनै थारा हिया म राज करबा द्‍यो। अर परमेसर को धनेवाद करता रह्यो। 16#इफि 5:19,20सगळी बुदी क सागै एक दुसरानै सीखाओ अर चेताओ। अर थारा हियाऊँ परमेसर ताँई सगळा भजन अर आत्मिक गुणगान गाता रह्यो अर धनेवाद देतार्यो। अंय्यां कर मसी का बचनानै थारा हिया म पूरो-पूरो बसबा द्‍यो। 17मेरो खेबा को मतबल ओ ह क, थे जोक्यु करो अर बोलो बो परबु ईसु मसी क नामऊँ होणो चाए अर बिका नामऊँई परम-पिता परमेसरनै धनेवाद द्‍यो।

घर ताँई नया जीवन का नियम

18 # इफि 5:22; 1 पत 3:1 ओ परबुनै मानबाळी लूगायो, थारै ताँई ओ चोखो ह क, थे थारा मोट्यारा क बस म रह्यो। 19#इफि 5:25; 1 पत 3:7अर मोट्यारो, थे थारी लूगायाऊँ प्यार-परेम राखो, बाऊँ कल्डो बरताव मना करो। 20#इफि 6:1टाबरियो, थे थारा माँ-बाप का कह्या म चालो क्युं क परबु इऊँई राजी होवै ह। 21#इफि 6:4टाबर-टिकरा हाळो, थे थारा टाबरानै दुखी मना करो कदै अंय्यां नइ होज्या क बाको मन मर जावै।

दास अर मालिक ताँई नियम

22 # इफि 6:5–8 गुलामो, थे मिनखानै राजी करबाळा की जंय्यां थारा मालिका क सामै काम मना करो। पण सचा मनऊँ परबु को मान करबा ताँई सगळी बाता म बाका हुकमानै मानो। 23थे जोक्यु करो बिनै मन लगार करो अर अंय्यां जाणो क, “ओ काम म्हें मिनखा ताँई कोनी करर्या पण परबु ताँई करर्या हां।” 24याद राखो, थारो असली मालिक मसी ह जिकी थे सेवा करो हो अर परबु थारै ताँई जखो इनाम धर राख्यो ह बो थानै देसी। 25#इफि 6:9मेरो खेबा को मतबल ओ ह क, परमेसर हरेक को बराबर न्याय करसी बो कोईकिई हिमायती कोनी ले। अर हरेक पापीनै बिका बुरा कामा गेलई फळ मिलसी।

Currently Selected:

कलुसीयो 3: एस डब्लु वी

Highlight

Copy