1 थिसलूनिकी 5
5
परबु का ओज्यु आबाळा दिन ताँई त्यार रेह्ओ
1मेरा लाडला बिस्वास्यो, परबु क ओज्यु आबा की घड़ी अर दिन क बारां म म्हानै मांडबा की जुर्त कोनी। 2#मत्त 24:43; लूक 12:39; 2 पत 3:10क्युं क थे खुद, इ बातनै सूल जाणो हो क, परबु क ओज्यु आबा को दिन बंय्यां आसी जंय्यां रात म चाणचुक चोर आवै ह। 3जद मिनख खेसी, “सक्यु चोखो ह, अर क्युंई डर कोनी,” जणा बापै चाणचुक परकोप आ पड़सी जंय्यां चाणचुकै पेटहाळी क दरद चालू होवीं हीं। अर बे कंय्यांई कोनी बचसी।
4पण भाईड़ो, थे तो अँधकार म कोनी जिर्या, क परबु क ओज्यु आबो को दिन थार प चोर की जंय्यां चाणचुक आवै। 5क्युं क थे इब दिन का च्यानणा म चालो हो, थे रात का अँधकारऊँ न्यारा होगा हो। 6इ ताँई दुसरा की जंय्यां आपानै सुत्यो नइ रेह्णो चाए, पण खुदनै बस म राख'र चेता म अर जागतो रेह्णो चाए। 7क्युं क जखा सोवै ह बे रातनैई सोवै ह, अर पीबाळा रातनैई पीर मतवाळा होवै ह। 8#इफि 6:13–17पण आपा जखा दिन का च्यानणा म चालां हां बानै चाए क बे खुदनै बस म राख'र बिस्वास अर प्यार-परेम की झिलम पेरीं अर छुटकारो पाबा की आसनै टोपला की जंय्यां पेरीं। 9क्युं क परमेसर आपणा प आपकी झाळ काडबा ताँई नइ पण परबु ईसु मसी क जरिए पापऊँ छुटकारो पाबा ताँई टाळ्या ह। 10ईसु मसी आपणै ताँई मर्यो। इ ताँई आपा सगळा बिकै सागै सदाई जिस्यां, चाए बिकै आबा की टेम आपा जीवता रेह्वां नहिस मरेड़ा होवां। 11इ ताँई जंय्यां थे करता आर्या हो बंय्यांई एक दुसरानै हिमत अर सारो द्यो।
चिठी की आखरी हिदायता
12मेरा लाडला बिस्वास्यो, म्हें थारूँ आ बिणती करां हां क मंडळी का अगुवा जखा थारै ताँई मेनत करै, परबु म थानै गेलो दिखावै अर सीख देवै ह बाको आदरमान करो। 13बाका कामा की बजेऊँ प्यार-परेम क सागै बानै बोळा आदरमान क जोगा जाण्या करो अर आपसरी म मेळमिलापऊँ रेह्ओ। 14मेरा लाडला बिस्वास्यो, म्हें थानै समजावां हां क, जखा कामऊँ जी चुरावै ह बानै समजाओ, डरपोकानै हिमत बंधाओ, माड़ानै समाळो अर सगळा क सागै नरमाई बरतो। 15कोईबी बुराई क बदलै बुराई नइ करै, पण सगळा मिनखा को अर एक दुसरा को भलो करबा की कोसिस करता रेह्ओ।
16सदाई राजी-खुसी रेह्ओ। 17अरदास करबा म लाग्या रेह्ओ। 18हर हाल म परमेसरनै धनेवाद देता रेह्ओ, क्युं क थारै ताँई मसी ईसु म परमेसर की आई इंछ्या ह।
19पबितर आत्मा की अणसुणी मना करो। 20परमेसर की खेबाळा की खयड़ी बातानै माड़ी मना जाणो। 21सगळी बातानै बिचासो अर जखी चोखी ह बानै पकड़्या रेह्ओ। 22सगळी बुराईऊँ बच्या रेह्ओ।
आसिरबाद देबो
23स्यांती देबाळो परमेसर खुदई थानै सूल पबितर करै। थारी आत्मा, पिराण अर काया आपणा परबु ईसु मसी क ओज्यु आबा का दिन ताँई बेदाग रेह्वै। 24थानै बुलाबाळो परमेसर बिस्वास जोगो ह, अर बो इनै पूरो करसी।
25मेरा लाडला बिस्वास्यो, म्हारै ताँई बी अरदास कर्या करो। 26सगळा परमेसर का मिनखाऊँ हात जोड़र जे मसी की कर्या करो। 27आ चिठी सगळा भायानै बाचर सुणाज्यो इ ताँई म थानै परबु क सामै ओडाऊँ हूँ।
28आपणा परबु ईसु मसी की दया थार प होती रेह्वै।
Currently Selected:
1 थिसलूनिकी 5: एस डब्लु वी
Highlight
Share
Copy
Want to have your highlights saved across all your devices? Sign up or sign in
(c) 2010-2017, New Life Computer Institute. All rights reserved
