Mege Gaya 6
6
1“Ttgesa na yamu ka rnengo Utux Tmninun, Utux Baro namu ka gaya pndakar, kari pndakar ma, gaya bneku nii. Kiya ka ppuyu namu moda da meniq dxeral ngngalun namu hiya. 2So maha miicu Utux Tmninun, Utux Baro su kana kndesan daha ka isu ma lqlaqi laqi su. Thei kana kari pndakar ma gaya bneku na. Kiya ka wada mu srengo isu. So maha mpqbsiyaq muudus kndeesan su. 3Dseediq Israel! Qbhangi ma pyugi bale. So su maha mangal qnbleyaq meniq dxeral psbyeqan nunuh ma walu hiya ma, mrana riyung ka seediq. Mntena so sntangan Utux Tmninun, Utux Baro rdrudan su.
4Israel! Qbahang ka yamu! Utux Tmninun, 1 ba Bukung, kiya ka Utux ta Baro. 5Asi ka kana lhebun, kana lnglungan, kana knkela, kana beyax su gmaalu Utux Tmninun, Utux Baro su. 6Peeniq bale lhebun namu ka kari rnengo mu yamu nii. 7Kiya uri ma kdrmtani tmgesa ka laqi su. Ani ga tleung sapah, ga mkkesa elu, trqeraq ma, mtutuy we pspegi kana. 8Asi ka pskryanun mekuy baga, ssmalu pniqan kari ka kduruk su. 9Ptsani eruc sapah su ma bobo rhengun alang.
10Utux Tmninun, Utux Baro su maha dmudul isu mpremux dxeral bbege na isu pnsdehu na rdrudan su Abraham, Yijxaq ma Yakobu. Niqan paru ma malu ba alang ka hiya. Nii ge uxe su pnheyu. 11Stenge lmlamu malu qyqeya ka spsapah we, uxe isu gmnutu. Niqan ka saun bubul qsiya hiya we, uxe su knari. Niqan ka qnpahan lipas ma qnpahan curung we, uxe su pnhmaan. Meekan su ma mpktengi su uri. 12Isu we qlahang bale. So su uxe chngiun ka Utux Tmninun dmnudul isu mnlatac peeyah dxeral Micrayim nngalan sapah tnqliyan su. 13Isu we kcugi ka Utux Tmninun, Utux Baro su. Thmkui ka heya ma, pooda ngayan na smdehu. 14Iya snegul thmuku duutux icil. Kiya ka duutux mtqiri knkingal seediq. 15Ado Utux Tmninun, Utux Baro gaga ckceka su we Utux Baro pnugaya ba qnnaqah. Nhuwa mseang quri isu ka Utux Tmninun, Utux Baro su de, phqilun su na peeyah bobo dxeral da.
16Iya psseung Utux Tmninun, Utux Baro namu. Mntena so nniqan namu Masah hiya. 17Asi namu ka tgleus bale muyu gaya pndakar, gaya ddaun ma, kari pndakar rnengo na yamu ka Utux Tmninun, Utux Baro namu. 18Asi su ka qpahun ka msderux ma malu noda meniq doriq Utux Tmninun. Kiya ka maangal su qnbleyaq mpremux mangal malu dxeral sntangan Utux Tmninun rdrudan su. 19Tduwa su lmiwaq kana supi su, mntena so rnengo Utux Tmninun.
20Bobo na, lqlaqi su ka smiling: ‘Hmuwa, ma rmengo gaya ddaun, kari pndakar ma, gaya bneku ka Utux Tmninun, Utux Baro namu ho?’ 21Kesa cmiyuk laqi su: ‘Pntnqliyan miyan Paroh meniq Micrayim hiya ka yami. Kiya we Utux Tmninun ge sdoi na paru beyax baga na dmudul platac menan peeyah Micrayim. 22Meniq berah doriq miyan, Utux Tmninun we qmneepah paru ba kcugun pnskraya qneepah spquri na Micrayim, Paroh ma, kana tnsapah na. 23Dnudul miyan na platac peeyah hiya ma, dnudul yami mremux dxeral sntangan pusu rdrudan ta hini. Dxeral nii ka sbege na ita. 24Dungal we Utux Tmninun we rmnengo ita, asi ta ka muyu kana kari pndakar na. Miicu Utux Tmninun, Utux Baro ta. So kiya de maangal ta qnbleyaq ma, mpkuudus kndesan ta, mntena so saya. 25Mpuyu ta rnengo Utux Tmninun, Utux Baro ta. Mptgleus ta muyu kana gaya pndakar na meniq berah na. Kiya ka kesun knsderux ta ka nii da.’”
Currently Selected:
Mege Gaya 6: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
