Mege Gaya 5
5
10 Gaya Pndakar
(Lnt 20:1-17)
1Psseli seediq Israel ka Moseh, rmengo dheya: “Seediq Israel! Qbhangi ka rnengo mu kari pndakar ma gaya bneku meniq birac namu saya. Asi namu ka slhayun ma ndwai ba moda. 2Utux Tmninun, Utux Baro ta we wada smdehu ita meniq dgiyaq Xoreb hiya. 3Sndhegan Utux Tmninun nii we, uxe na sndhegan dpusu rudan ta. Ita ka pusu na. Kiya ka dseediq gisu muudus saya ka sndhegan na. 4Utux Tmninun meniq dgiyaq baro, peeyah ckceka puniq ma, pddqeras rmengo yamu. 5Ciida ka yaku we mnheyu ku cenga namu ma Utux Tmninun, rmnengo ku kari Utux Tmninun yamu. Ado miicu namu puniq, ini namu osa dgiyaq.” Rmengo ka Utux Tmninun:
6“Yaku we Utux Tmninun, Utux Baro su. Dmnudul ku platac sunan peeyah dxeral Micrayim pntqliyan su.
7Wano ba yaku, iya thmuku utux icil.
8Iya gmequr smalu tikung namu nanak. Iya mmhemuc smmalu ani maanu hnyegan, mntena so hnyegan gaga karac baro, toma dxeral ma, gaga ckceka qsiya. 9Iya thmuku hnyegan kiya ma, iya qeepah dheya. Ado yaku Utux Tmninun, Utux Baro su we Utux Baro pnugaya ba qnnaqah. Qmnriqu kenan ka seediq we pkdraun mu ka qnquwan noda dheya ma, betaq mu msn3, msn4 knxalan lqlaqi daha. 10Gmaalu kenan ma mnduwa muyu gaya pndakar mu we khwayun mu ka dheya betaq 10'00 knxalan lqlaqi daha.
11Iya hmtani rmengo ka ngayan Utux Tmninun, Utux Baro su. Ado mmhemuc dmoi ngayan Utux Tmninun we, Utux Tmninun we uxe na ngalun kesun uka qnquwan noda ka heya.
12Ppyugi ba ka ali sngayan ma ngali ali mrtaso. Mntena so rnengo Utux Tmninun, Utux Baro su. 136 ali we qphani kana ooda su. 14Tg7 ali we ppyugi ali sngayan su quri Utux Tmninun, Utux Baro su. Ali nii we isu, lqlaqi su, dtnqliyan, dapa, dapa roba, tnbugan su ma, dseediq tnooda mkkesa ckceka alang su we, iya bale qeepah ani manu qpahun. Pntnai sunan psange ka dtnqliyan su. 15Lnglungi ka pntnqliyan su meniq Micrayim. Utux Tmninun, Utux Baro su we dmoi baga paru beyax ma, hmkero hiqur baga na dmnudul isu mlatac peeyah hiya. So kiya de, Utux Tmninun, Utux Baro su ka rmnengo pyugi ka ali sngayan.
16Sprui ka tama ma bubu. Mntena so Utux Tmninun, so pnosa kari Utux Baro su, maangal su qnbleyaq ma, qqbsiyaq su tbleyaq muudus dxeral pndungus bnege Utux Tmninun, Utux Baro su.
17Iya phuqil seediq.
18Iya mmhemuc msuupu.
19Iya geeguy.
20Iya qberiq pgkela pqnaqah ssiyo su.
21Iya sqquru mqedil ssiyo su. Iya sqquru sapah, qnpahan, tnqliyan, dapa, dapa roba ma, kana dnoi ssiyo su.”
Tmgesa Gaya ka Moseh
(Lnt 20:18-21)
22“Kari nii we rnengo Utux Tmninun paru hrenang kana namu peeyah ckceka rana puniq, plabu ma, mkuung meniq bobo dgiyaq. Ini prana kari ani maanu da. Kari nii ge spatis na 2 bobo qrtinuh btunux ma sbege na kenan. 23Tlbuwan puniq sqama ka dgiyaq ma, mnbahang namu hrenang pneeyah ckceka mnkuung. Ciida, smdaling namu kenan ka qbsuran mdudul pnswayan rudan ma drudan namu. 24Rmnengo namu: ‘Qtai! Utux Tmninun, Utux Baro ta we gisu ptuura pqita knledax na ma knparu na. Wada ta bhangun uri ka hrenang na pneeyah ckceka puniq. Ita nii saya we qmnita ta Utux Baro mpprengo seediq ge, gaga muudus nana ka seediq. 25Saya, mpsqama ita ka puniq paru nii de, hmnuwa asi ta ka mphuqil ho? Nasi ta mbahang hrenang Utux Tmninun, Utux Baro ta dungal we, maha ta mphuqil da. 26Kana niqan heyi ma dara we, ima ba ka maha mntena ita mnbahang hrenang rnengo Utux Baro muudus betaq ani knuwan pneeyah ckceka rana puniq ma, gaga muudus nana ho? 27Braho su osa smdaling. Sai mbahang ka kana kari rnengo Utux Tmninun, Utux Baro ta. Tgsai miyan ka kari rnengo na sunan ka Utux Tmninun, Utux Baro ta. Kiya ka pqbahang miyan ma pyugun miyan.’
28Kari rmnengo namu kenan we, wada bhangun Utux Tmninun da. Rmengo kenan ka Utux Tmninun: ‘Kari rnengo na sunan ka seediq nii we, wada mu qbhangun da. Bale ba ka kana kari daha. 29Tai so maha peeniq lhebun so nii miicu kenan ka dheya. Muyu klaali kana gaya pndakar mu. Kiya de so maha mangal qnbleyaq betaq ani knuwan ka heya ma lqlaqi laqi daha. 30Sai rmengo ka dheya: Osa mbrinah kobu namu da! 31Quri so isu we, tduwa su mheyu yaku hini. Bbege mu sunan ka kana gaya pndakar, kari pndakar ma, gaya bneku. Isu we tgsai ka dheya, so maha daha pyugun meniq dxeral bnege mu dheya.’ 32So kiya de, puyu bale moda tnugesa Utux Tmninun, Utux Baro namu, iya bale pkciicil. 33Dai mkkesa kana elu tnugesa Utux Tmninun, Utux Baro namu. So maha namu mpkuudus mangal qnbleyaq. Kiya uri we nniqan namu bobo dxeral we maha namu mpqbsiyaq meniq.”
Currently Selected:
Mege Gaya 5: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
