Mege Gaya 1
1
Ndaan Moseh
1Patis nii we kari nMoseh rnengo na kana seediq Israel meniq tadus brenux nklaan hido yayung Yarden, Arabah sipo Sup. Kiya ka cenga lualang Paran, Topel, Rapan, Xacerot ma Dijahab hiya. 2Asi ka 11 ali ka peeyah dgiyaq Xoreb ma, moda dgiyaq Seir betaq Qades Barnea. 3Ali 1 idas 11 tg40 knkawas, Moseh we srengo na seediq Israel ka kana kari rnengo na heya ka Utux Tmninun. 4Ciida, Moseh we bobo wada na ini baka mccebu ka Sixon qbsuran paru Amori meniq Xesbon ma, Og qbsuran paru Basan meniq Astarot ma Edrei. 5Moseh ge, stgesa na seediq Israel meniq dxeral Moab quri nklaan hido yayung Yarden hiya ka gaya Utux Baro nii. Rmengo: 6“Utux Tmninun, Utux Baro miyan rmnengo ita meniq dgiyaq Xoreb hiya: Bsiyaq nniqan namu dgiyaq nii da. 7Asi namu ka theruy mquri dgiyaq seediq Amori ma ssiyo na hiya. Kiya ka Arabah, ddgiyaq Sipira, Negeb, ssiyo rcilung, dxeral seediq Kenaan ma, dgiyaq Lebanon betaq yayung Paru, kiya ka yayung Euhrates. 8Tai! Gisu mu psaun berah namu ka dxeral nii. Kiya ka pnsdehu mu Abraham, Yijxaq ma Yakobu rdrudan namu, bbege na dheya ma lqlaqi ltlutuc daha ka dxeral nii Utux Tmninun.”
Pheyu Mpsgao
(Lnt 18:13-27)
9“Ciida, rmnengo ku yamu: ‘Yaku murux ba we uxe mu ba dhekun moda ka qqpahun namu nii. 10Utux Tmninun, Utux Baro namu ka wada prana hbaro yamu. Tai! Yamu saya di ge, mntena so pngerah karac baro kneegu. 11Wano Utux Tmninun, Utux Baro nrudan namu, pnuyu na sntangan wada prana msn10'00 smbleyaq yamu. 12Kiya de yaku murux ba we, huwa mu kesun qmeepah ka knchdilan qpahun namu, uxe uri we pnkseengan namu ho? 13Asi namu ka gmao niqan knkela, mkela psaanak malu ma naqah ma, klaun bale seediq uri peeyah knkingal pnswayan rudan namu. Phyegun mu dqbsuran mdudul yamu ka dheya.’ 14Cmniyuk namu ka yamu: ‘Malu bale ka ooda rnengo su!’ 15Yaku de ngalun mu pqbsuran mpdudul knkingal pnswayan rdrudan ka niqan knkela ma klaun bale dseediq. Phyegun mu pqbsuran mdudul yamu ka dheya. Ngalan mu mpdudul 10'00 heyi, 1'00 heyi, 50 heyi ma, 10 heyi qmlahang yamu.
16Ciida, pnosa ku kari dmpsgao namu: ‘Mbahang namu prngagan ciida, ani prngagan dmtswai, uxe uri we prngagan dmtnooda hiya we, asi ka ini namu psaanak smgao. 17Psgao namu ciida we, iya qita dqeras daha. Ani paru ma namu biciq we prngagi kana. Iya kcugi ka seediq, ado nuUtux Baro ka ooda psgao nii. Nasi niqan ka mqriqu ini namu klai psgao de, tdwani namu meyah yaku hini. Yaku ka meyah mbahang prngagun daha.’ 18Ciida, wada mu srengo yamu kana ka ddaun namu da.”
Ini Sruwa Theruy Kenaan ka Seediq Israel
(Spe 13:1-33)
19“Mpuyu ta rnengo Utux Tmninun, Utux Baro ta, mpeeyah ta dgiyaq Xoreb theruy, mooda ta qntaan namu ka kcugun ba knuglahang tadus brenux, mpquri ta dgiyaq seediq Amori hiya ma, dehuk ta Qades Barnea. 20Mprengo ku yamu: ‘Dehuk namu dgiyaq seediq Amori, kiya ka bnege na yamu ka Utux Tmninun, Utux Baro ta. 21Qtai! Utux Tmninun, Utux Baro namu we, psaun na berah namu ka dxeral kiya. Yamu we asi ka muyu namu rnengo Utux Tmninun, Utux Baro rdrudan namu mosa mangal dxeral kiya.’ 22Asi namu ka meyah berah mu hini kana. Mprengo: ‘Pllaye ku smkagul seediq mosa kmuuruy dxeral kiya ka yami. Tgsai miyan ka elu ddaun ma dlualang ddaun.’ 23Malu riyung ka kari so nii. Kiya de geegi 12 heyi, skguli pnkingal ka pneeyah knkingal pnswayan rudan ckceka namu. 24Kiya de mtutuy ka dheya ma mosa mquri dgiyaq. Betaq ayu Eskol kmuuruy dxeral kiya. 25Mangal heyi pnhgalang dxeral hiya ka dheya ma, desun daha yami hiya. Meyah rmengo yami: ‘Dxeral bbege na ita ka Utux Tmninun, Utux Baro ta we malu riyung.’
26Kiya de ini namu sruwa mosa ka yamu. Betaq namu tbrinah tnugesa Utux Tmninun, Utux Baro namu. 27Meniq namu kobu smmeriq smnetur: ‘Qmnriqu ita ka Utux Tmninun, kiya ka platac ita peeyah Micrayim ma, bbege ta na seediq Amori pphuqil ita. 28Maha ta inu ka ita di ho? Psiicu lhebun ta ka kari mtswai ta, rmnengo, seediq gaga hiya we mgkala ita knparu ma mbeyax. Mgdehu prparu ba ka alang daha ma mntena dehuk karac baro ka pnharac qnalang alang daha. Qmnita miyan dseediq Anaq meniq nami hiya ka yami.’ 29Rmnengo ku yamu: ‘Iya bale kiicu, iya pkrkerang ma, iya kcugi ka dheya. 30Utux Tmninun, Utux Baro namu we gisu mkkesa tgberah namu ma, mpdayo mccebu yamu. Mntena ndaan na berah namu meniq Micrayim hiya. 31Kiya uri we, kana ndaan namu meniq tadus brenux hiya we, wada namu qtaan bale ka Utux Tmninun wada huwa mesa mapa yamu. Mntena so seediq gisu mapa laqi na betaq namu dxeral hini.’ 32Kiya ge, meniq noda nii we, ini namu snhii Utux Tmninun, Utux Baro namu ka yamu. 33Heya we mnkesa berah luelu namu ma, migin daun namu pkobu. Keeman we meniq ckceka puniq, diyan we meniq ckceka plabu tmgesa elu ddaun namu.”
Mangal Pnkdira ka Seediq Israel
(Spe 14:20-45)
34“Utux Tmninun we mnbahang kari smmeriq namu smnetur de, mseang psdehu rmengo: 35‘Dseediq knxalan naqah nii we uxe mqita dxeral malu pnsdehu mu bbege ddrudan namu. 36Wano Kaleb laqi Yepuneh ka maha qmita. Kiya we dxeral ndaan na qmleqah we bbege mu heya ma lqlaqi laqi na. Ado pskingal lhebun na smnegul kenan ka heya.’ 37Ririh yamu wada mseang kenan ka Utux Tmninun uri. Rmnengo: ‘Uxe su mpremux dxeral kiya ka isu uri. 38Wano Yehosua laqi Nun dmnayo isu ka maha mremux dxeral kiya. Psbyaxi ka heya. Ado mdayo seediq Israel maha mangal dxeral kiya ka heya. 39Lqlaqi namu, kiya ka maha qqrapun betaq ini kela maanu ka malu ma naqah ge, kiya ka maha mremux dxeral kiya. Bbege mu dheya ka dxeral kiya. Mkmangal dxeral nii ka dheya. 40Quri so yamu de, mpbrinah namu peeyah elu rcilung Mtanah mosa mquri tadus brenux.’”
41“Cmiyuk namu kenan rmengo: ‘Wada miyan niqan qnquwan noda Utux Tmninun! Saya, mpuyu miyan tnugesa Utux Tmninun, Utux Baro nami mosa miyan mccebu.’ Kiya de maadis namu hlmadac namu, maha namu ngalun mslokah mosa dgiyaq kiya mesa namu ka yamu. 42Rmengo kenan ka Utux Tmninun: ‘Rngagi ka dheya: Iya osa baro, iya osa mccebu uri. Ado ini ku eniq ckceka namu ka yaku. Maha namu ini baka pais namu ka yamu da.’ 43Kiya de rmnengo ku yamu ka yaku ma, ini namu qbahang tnugesa Utux Tmninun ma, mmhemuc namu mosa dgiyaq. 44Seediq Amori meniq dgiyaq hiya we mntena so tdiyung meyah smterung mekan yamu ma smdurak yamu. Betaq namu na ini baka meniq Seir betaq Xormah. 45Mbrinah namu ka yamu ma, lmingis namu berah Utux Tmninun. Kiya we ini qbahang hrenang namu ka Utux Tmninun ma, ini psquri yamu ka birac na uri. 46Mpuyu namu ali tghetur hiya, bsiyaq hari ali ka nniqan namu Kadis hiya.”
Currently Selected:
Mege Gaya 1: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
