Soponi 3
3
Takɨgang dɔ Jerusalemt
1Beto lo ɓebo kɨ ngetõɗɔɔ kɨ ngeyerr,
ɓebo kɨ ngeɗa ngetɔg dɔ degt.
2Tel ron go tat al ho,
taa ndakɔj al ho,
ɓakul Bɨraɓe al ho,
ndɔt kɨro Luwaht lon al tɔ.
3Mbaiɓeg loa kɨ kamat ĩn tubog kɨ ngeko,
ngégangtag loa ĩn bisɨkolog kɨ teen lokɨsɔle
na nyan nya mad adɨn loti dɔt al.
4Ngékelta kɨ ta Luwaht loa ĩn deg kɨ kɨlaɗad majal
ngéɗanya kɨ la rosɔl dɔ kɨlat'n sumba kad ɗan,
ngéjanyamosɨ loa yerrɨn kɨ lo kɨjaɓat,
tɔin dɔ mberkɨnda.
5Bɨraɓe, i kɨdene sew kamat,
ɗa nya kɨgoot al nja kɨɗa al.
Ndɔ kɨɗen kɨsĩ la gangta lon kɨtɨga
bijalo kɨɗen nya ta al
na de kɨdenesew al ta,
roa a sɔla al.
6M'nuj girrdeg,
kel Bɨraɓe
M'nuj kujngomdɔɓeg lod
Ad telɨn gootɓe kɨ de gotot,
Ɓebog lod ngendɨt goto tɔ.
7Kamla m'el m'an: Rota,
ĩla ɓebo ɓool ndilɨm
Na telron go mberkɨndagt lom a ne,
M'a m'nuj londɨ loa al
na ndakɔjg tube'n m'ɔj kad m'ɗa sia ye a teen dɔat al
Na deg ngendɨt a ɓain kɨsĩ ritit
kad awɨn kɨ ketekete kam nyaɗadt kɨmajal.
Bɨraɓe tel kɨ ndeg Israelag kɨnãi
8Kɨtɔ 'nten, i ngomɨn,
kel Bɨraɓe,
ndɔ'n m'a m'ɓai kɨta ta nyatetɗɔɔ
kɨta kɔjtaɗam i kɨta kaw girrdeg kɨnat,
kɨ kaw kõɓeg kɨnat kad m'ũ wong lom dɔdt,
wong lom kɨtɨngabil tube
kɨta horr wong lom a õ dɔning kɨtaagbe.
9Kamla m'a mad takel deg tel kɨkarnyang
kɨtakad tube a kon kɨdɔ tɔ Bɨraɓet
na ɗan ɓer adɨna kɨ kam kɨkɨɗa.
10Ko gid bahgt kɨ Etiopi nu ngekɔsɨ dɔd ber nomt,
kɨ tĩn na, a ɗen kɨ kadkari admɨn.
11Ndɔt'n non, girrdeg lom
Rosɔl a ɗai al
kɨta kɨlaɗai kɨ majalg tube'n
i ɗa ndoorɨm,
M'a m'ɔrr
Ĩgɨn ɗan dɔngang kɨ ronel kamit kɔ
na a i ga buro dɔ mbalt lom kɨjaɓat gog al ta.
12M'a m'nya deg kɨtõ kɨ ngésɔldɔ kamit
Ĩgɨn ɓan kul tɔ Bɨraɓe.
13Ndeg deg'n nãin Israelt a ɗan majal al
a elɨn takɨbal al,
a unɨn ndõnd kɨta kelta kɨ lo goolt al ta.
A san nya, a taan kò,
na de mad i ngendad ɓoolt goto.
14Ɔsɨ pa, ngon kɨdẽ kɨ Siõ
i ko kɨ wi,
Israel, i ɗa kamnda kɨ ronel kɨ kami kɨtaagbe,
ngon kɨdẽ kɨ Jerusalem.
15Bɨraɓe ɔrr takɨgang dɔit,
tuɓa madngétai kɔ
Ngar kɨ Israel, ad i Bɨraɓe, i dãsɨt,
a i ɓool majal gog al ta.
16Ndɔt'n non a elɨn Jerusalem anan:
Ot ɓool ĩ Siõ,
ad jii oi yelel al.
17Bɨraɓe Luwah loi i nat sei i Ngetɔg,
a aji, roa a nela sei kɨdumbit.
A ad i ndɨ lom kam tart lon,
a ɗa ronel dɔit kɨ pa kɨkɔsɨ.
18Tit kɨ kam ndɔ ɗa nahgt
Bɨraɓe el an:
M'a m'ɔsɨ nya kɨmajal
dɔit kɔ kad rosɔl so dɔit al.
19Kaglot'n non
m'a m'nda m'ɔj deg tube'n dan kumi ndo
m'a maj mootg,
ĩgɨn tuɓand kɔ ye, m'a m'kawd kɨnat.
M'a mad tɔ deg lom ko kam dɔninggt tube,
a ndubɨn tɔd kam logt'n kete rod sɔld tit.
20Kaglot'n non m'a m'tel sesɨ kɨɓe
kaglot'n non m'a m'kawsɨ kɨnat.
M'a m'adsɨ telɨn nyatɔko kɨ nya ndub
ku girrdegt tube kɨdɔningt
lon m'a m'ɔrrsɨ ɓeɓert.
Lon m'a m'telɨn kɨdeg'n hɔnd ɓert kɨɓe takumsɨt,
kel Bɨraɓe.
Currently Selected:
Soponi 3: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
