Habakuk 3
3
Habakuk tetɗɔɔ kɨtakul kadkam
1Pa kõkam'n Habakuk, ngekelta kɨ ta Luwaht ɔsɨ.
2Ah Bɨraɓe, m'oo dɔ kɨlaɗaig kɨbobo
adɨm m'ɓool ndili, ah Bɨraɓe,
i tɔsɨ ndool kɨla loi dan ɓalgt,
kam ɓalgt ad deg gerɨn
na kam wongt i ga kami dɔ kamkẽgt loi.
3Luwah ɗe ko Teman,
Ngekunjɗang ɗe ko mbalbot kɨ Parã taakò
maj kɨtɔitɔi loa ut dɔrã
dɔning ɓakot kɨ kunja kɨɗangeɗeng.
4Nyẽra i tit kunj be,
kunj tee ko jiat giling giling,
nõbe la tɔga i kɨyarɔ tit ye.
5Yokoosɨ kɨ ngetɔl deg ndia nõat,
mõi rotɨngabil ut goa.
6Ĩla duba a ne, mbɔj dɔning kɨ kumɨn,
nɔl lo, na yee deg yɨkɨtyɨkɨt,
mbalg kɨmaɗi ĩn kɨtĩ kɔ,
doorlog kɨmaɗi udɨn kɨber,
ɗobg loa ton lo todt mbãkɨnõt.
7M'oo kujkubg lo Kusan kam dãro ndot
kubganglog kɨ dɔning Madiãt ndadɨn ho, ɓoolɨn ho.
8Ta õ kam Bɨraɓe kɨta bahg a?
Wong loi i kɨdɔ bahgt a?
Wong loi kɨtɔlsɔkɨr i kɨdɔ bahbot
lon i ɓai dɔ sɨndagt loi
kɨ dɔ pusɨɗɔɔgt'n a i tetɨnɗɔɔ yo?
9Gã kɨrã loi to tɨga do,
yokɨnda loi i tit kɨrã.
I gang dɔning, i nya lo ad bahg nunt.
10Mbalbog ooin ad rod ndad,
hulman'g tɔin kɨ tɔgd,
dɔɓul man ko kɨ ndin ɓirɓit,
un jin kɨ dõ,
11kàd kɨ nah duba ɗan loɗadt,
oon kunj kɨrãg loi lon ndɨ tɔin kɨdõt kɨ nyẽr ninga loi kɨ ndulo ngẽingẽi.
12I lago dɔning kɨ wong kɨtɨngabil
i ɓa dɔ girrdeg Ɗob mbuj kɨ wong.
13I tee kɨta kaj deg loi, kɨta kaj ngar kɨ wur loi,
i rigɨj bɨradɔ ngékɨɓe lo deg kɨ majal
ad roa i kari ko ngɨrraat ber mbã kɔat.
14I tɔsɨ dɔ ngéɗɔɔg loa i mbut kɨ nyakat loa,
Ĩgɨn ɗen tit nélbarwãi kad tɨndatĩmɨn kɔ,
ronel lod i kɨtakad san ngendog gid tilt.
15I ndia dɔ bahbot kɨ sɨndag loi
dan pugum mangt kɨbobo.
16M'oo dɔ na rom ndad yatɨt
ndartam yee yekɨyekɨ dɔ ko dɔ ndiat,
kɨngam sa jekjek ad gojɨm nda na.
M'a m'ndɨ lom m'ngoo ndɔ kamkɔl
ĩn a ɗe dɔ ngéɗɔɔgt Ĩgɨn a andɨn dɔningt loj.
17Kag mbaiɓood a ɓa hut al, nduu a and al,
kand kag olib a goto, ndɔɔg a teen kɨ nyasa al,
ɓut batg a goton kam bɨlat,
mangg a goton kuj ɗat.
18Be kaa, m'a m'ɗa ronel kam Bɨraɓet,
m'a m'ɗa kamnda kam Luwaht kɨ Ngekajɨm.
19Bɨraɓe Luwah i tɔgɨm
ad njam tel tit nja wal
adɨm m'ndia dɔ logt lom kɨ dõ.
Currently Selected:
Habakuk 3: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
