1 WAKORINTO 7
7
1Kyasia kya shindo shilya mulenjiṟehya ngamhaluo ke nyi nanga msoṟo nalakuwashe na mndu mka. 2Kya indi kyeringa wuṟuhui orio mndu nawade mka oke amonyina orio mka nakae na mii oke amonyi. 3Mii nainenge mka oke kilya kimbaṟi, shiwudo nao mka naweinenga mii kilya kyake kimbaṟi. 4Mka naitoṟye mbihu fokepfo kya indi nyi mii, shiwudo na mii naitoṟye mbihu fokepfo kya indi nyi mka. 5Ma mulaimane shile nyi kui ikuteṟyana mwaanya kundu mukuwonye nafo suku tsetsinda kiterewonyi. Numa muwewuyanase kundu Satan nalashike imtewa kui iwuṟa lyanu lyewuṟa kiheo. 6Indi ngahamba iki kyeikimba, chi ngakiwawasapfo. 7Kyako inyi njikundi nyi kiile ke wandu wose wawe cha inyi njimonyi. Kya indi orio mndu ose ai msumbe nyi Ruwa kii kyake amonyi ichu nyi wudi na ichu nyi wudi. 8Indi ngawia iwo walamealika na iwo wapfie mii njiile, nyi kicha wakukaye chando inyi njikeri. 9Kya indi kokoya walaidima ikuima wakualikye. Kyamba nyi kii kicha yalika kota yaaka. 10 Kya indi iwo walemmaa yalikana le ngawawasa, na iwawasa li chi lyakopfo indi nyi lya Mdumii, ke mka nalalekane na mii oke. 11Indi komkoya amlekana nao na nakae ado alaaliko ang'u nahoṟyane na mii. Nao mii nalawone echisama mka oke. 12Kya indi wandu wengi ngawawia inyi chi Mndumii-pfo ke kokoya mndu manowama awode mka oke alai mwidiki nao mka chu akundi kukaya nao nalamsame. 13Na mka mliwe awode mii alai mwidiki na mii chu akundi ikukaya nao nalade msoṟo chu. 14Kyamba msoṟo chu alai mwidiki nyi aimwilishe kui manowama chu. Shila wudo wana wanu wawei wa ngafu, indi wulalu wai waele. 15Kya indi ichu alai mwidiki kalekana nakulekanye. Hando ho manowama mndumii ang'u mka nampfungiṟyepfo. Kilya Ruwa alulahye so nakyo nyi kiidikyano. 16Cha kipfa nyi uichi kuda, iyo mka, koka ochikiṟa miopfo? Ang'u iyo mndumiinyi uichi kuda kokoya ochikiṟa mka opfo?
Chumia chando Ruwa akulahye
17Maṟi orio mndu ose nachumie chando Mndumii amteṟye; chando Ruwa amlahye nyi wudo nahendeke. Nkyo ikyo njekewawasya siṟi tsose. 18Mndu kamelaho awei mdine nalakiṟike; mndu kamelaho alai mdine nalahende idino. 19Kiende kiṟumi chi mkae fui mdinepfo ma chi mkae fulai mdinepfo, indi ihendelya mawawaso ha Ruwa. 20Orio mndu ose nakae mkae iya awei nayo iliindi amshike henda ilaho. 21Komelaho ui isinga ma kulawone kosuo. Ma koshika iwonyo mwaanya fohenda lekio kukundye ikaa. 22Kyamba ichu amhenda ilahyo Mndumii ai isinga nyi amba mtalae o Mndumii. Na wudo ichu amelaho ai makuachia nyi awewiia Kristo isinga. 23Mui wahuṟe na wuhuṟu wo kisale, mulawone mochiwiia wandu masinga. 24Orio mndu le, wanawawama, mkae fulya awei nafo iliindi amshika ilaho nyifo nakae nafo ai na Ruwa.
Mkae fo watengo na wakusu
25Kya marokya kyo njiwode iwawaso lya Mndumii-pfo, indi ngahamba mhie yako njii mtane mhendeli kui isaṟia lya Mndumii. 26Na iki ngahamba kii kicha kimaduma kya mafirita ha ki-wulalu kikeri kii-le ke kiwe kicha mndu nakae mkae ai nayo. 27Nyi ui mpfungye mka? Ma kulakunde ipfunguo. Kumdeye kudi kulampfungye mka? Ma kulapfule mka. 28Indi ma kokoya oalika uwode mtipfo. Na rokya likakualikyo liwode mtipfo. Kya indi wandu wo wai wado wechirohyo m mawina ha nyamenyi, na inyi ngakunda ihawaringa. 29Kya indi ngahamba-le, wanawawama, mwaanya fo iheri li nyi itika inyia fukeri. Mandi hatsuhae walya wawode waka wawe cha ili nyi walawode. 30Na walya wailia wawe cha ili walailia, na walya waichihio wawe cha ili walaichihio, na walya waihuṟa shindo cha ili walai wenyisho. 31Na walya wailuya moo na mweke fo wuyana wu walawone wechiwulia ngula. Kyamba mbikye fo wuyana wu nyi isia fukeri. 32Na inyi njikundi mukae mulakurohye. Ichu alaalikye ekekuwinyisha kya Mndumii ke nyi wuda echichihiṟa Mndumii. 33Kya indi ichu aalikye nyi ekekuwinyisha na sha wuyana wu ke nyi wuda echichihiṟa mka oke, kawa mokuletsana adi amonyi. 34Na mka alai na mii na rokya na wudi aikuwinyisha na kya Mndumii, kundu nawe mwele kui mbihu na kui mumuyo. Indi ichu amalike nyi ekekuwinyisha na sha wuyana wu ke nyi wuda echichihiṟa mii. 35Na iki ngadeda kundu kiwe kiira konu muwenyi, chi kundu njimkumbye kiwoho kyemchuruwuyapfo kya indi kundu mudamie Mndumii-hu tsee mui na wuwongoyi wose wulaweṟukye. 36Kya indi na kawa wu kawona akiṟa yendie rokya lyake wusutsu aimkuya rikonyina wudo kuwode-ho wuitiki wowuta kindo nahende iwuta kilya akunda. Chi atahachia handopfo, wakualikyane. 37Indi ichu ahoṟoki na ngoo yake ii njiwanzi nalawode kitikimapfo kya indi ai na chile tsewuta kyake akunda nao akuteseheṟye mrimenyi foke fumenyi naringe rokya lyake nyi awuta necha. 38Nkyo kimaduma ichu moalikya rokya lyake nyi awuta necha; na ichu alaalikya rokya lyake nyi awuta necha kota. 39Mka nyi ai mlungye mii mandi ho mii ai-ho na moo hose. Indi mii kamhenda ipfa nyi amlekyo ihenda yalikyo nyi orio mndu amkunda kihendewutika kui Mndumii da. 40Kya indi nanga lya wueṟa kokoya akukaya chando akeri, nyi wudo inyi ngawona. Na ngahamba na inyi njii na Mumuyo o Mndumii.
Shelya shedasya maruwa ha wongo
Currently Selected:
1 WAKORINTO 7: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
