1 WAKORINTO 12
12
1Kya shisumbo sha Mumuyo le, wanawawama, njikundi mude mulamanyapfo. 2Muichi lyandi muwekeri wahenu nyi mowekedao ko mfanano ilawode mdedye cha ili mokuruo-pfo. 3Nkyo kimaduma ngammanyishya ke kulaipfo modeda awodo nyi Mumuyo o Ruwa awechihamba Yesu naseso, na kulaipfo aidima ihamba, Yesu ai Mndumii shile awodo nyi Mumuyo Mwele. 4 Nyi kuwode makamba ha shisumbo sha Mumuyo, indi Mumuyo nyio menyi. 5Kuwode makamba ha mapfuṟukanya, na Mndumii nyio amonyi. 6Kuwade makamba ha matanyo kya indi nyi Ruwa ai motana shi shose arie wose. 7Indi orio mndu aenengo mdambuye fo Mumuyo kundu kuwonekeho kiira. 8Kyamba ichu umu amnengo nyi Mumuyo ideda wuṟango, na ichu ungi ideda wulaanyi kui mweke fo Mumuyo ulya ulya. 9Ungi amnenge wuidiki kui Mumuyo ulya ulya, na ungi aimsumbe pfinya tsechiṟa waluo kui Mumuyo ichu umu. 10Na ungi amnenge iwuta ngata tsa pfinya, na ungi ihamba wuikimbi na ungi itichya wuilachi wo Mumuyo iya iipfo, na ungi aimnenge mdedye ya shiṟuma, na ungi amnenge wuṟango wodambuya shiṟuma shilya.
Shiungo shifoi indi mbihu fumu
11Indi isho shose nyi Mumuyo ichu umu ose ashitanye echihawya orio umu kikoke chando akunda. 12 Kyamba chando mbihu fo mndu fui, nyi fo fumu na shiwungo shafo nyi shifoi, indi shiwungo sha mbihu shifoi shidi shikeri mbihu fu fumu sho shose, nyi wudo na Kristo ai. 13Kyamba so lose lulempatisyo mbihu fumu kui Mumuyo umu, kiwe luui Wayuda ang'u kiwe lui Wagriki, kiwe lui masinga ang'u kiwe lui masumba. Nyi luiwarutsye Mumuyo chu umu so lose. 14Kyamba na mbihu fo mndu fulakeri kiwungo kimu indi shifoi. 15Kima odende luweihamba, ili ndakeri owoko njikeri o mbihupfo, kyo kiwechitewa lulakae lui lo mbihupfo. 16Ma kudu kima kuweihamba, ili ndakeri riso njikeri o mbihupfo lyo liwechitewa kulakae kui ko mbihupfo. 17Kima mbihu fuwei riso fose a iicho kindo liwechiwa naki ko? Kima fuwei kudu fose na irumishya opfamo liwechiwa na ki ko? 18Indi wulalu Ruwa awewikya shiwungo shi orio kimu kyasho kya ipfo mbihunyi chando alekunda. 19Kya indi kima shiwei sha ofano lumu shose, a mbihu nyi fuwechiwono ku? 20Indi-ng'u wulalu shiwungo nyi shifoi, indi mbihu nyifo fumu. 21Na riso lilaidima iwia owoko, njikutiie iyonyi. Manya mdo fulaidima iwia madende, nyimutie nyonyi. 22Kya indi lya wueṟa mnu, shiwungo sha mbihu, shilya shifanyi cha ili shii shifafa kota shingi nyisho lushiwuṟye kya wuitiki. 23Na shilya loshitana shikiwae kiṟumi sho lokeshisoṟowitsya na tsirie kiweṟe kya ngoseṟa, na shilya shadu shiwode wuṟenze sho shirie wuindi wo ngoseṟa. 24Indi shilya shadu sha sonu njicha sho shii na tiiepfo. Kya indi Ruwa ametomboshana adi mbihu kashika iwikya kiwungo kikiwa kiṟumi kisonguo. 25Kundu mbihu manya fulahendehoyo mpaṟakano, kya indi shiwungo shiinduṟane shishenyi na shenyi. 26Na kokoya kiwungo kimu kyahenda iwawyo shingi shose shawayo hamu nakyo; kokoya kuipfo kiwungo kyawikyo mng'ano shahenda ichihio hamu nakyo shose. 27Nanyo mukeri mbihu fo Kristo mukuhawie-ho shiwungo. 28 Na kwipfo Ruwa awawikye ipfo siṟinyi, lyesonguo nyi wasu, lya kawi nyi waikimbi, lya kaṟaṟu nyi wedambuo, lingi nyi wewuta ngata tsa pfinya, lingi nyi warie pfinya tsechiṟa waluo, lingi nyi waeki, lingi nyi waiṟichi, lingi nyi wededa mdedye ya shiṟuma. 29Alae nyi wai wedambuo wose ko? Alae nyi wai wewuta ngata tsa pfinya wose ko? 30Alae nyi wai warie pfinya tsechiṟa waluo wose ko? Alae wai wededa mdedye ya shiṟuma wose ko? Alae nyi wai wetambahaluya shiṟuma wose ko? 31Indi lalakyenyishisumbo shilya shi shicha lya wueṟa. Na kutsuhae njia ingi ierie tsingi tsose nayo ngahenda imloṟa.
Ikunda
Currently Selected:
1 WAKORINTO 12: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
