1 WAKORINTO 11
11
1 Muwe waitung'ati wako chando inyi njii o Kristo. 2Na ngamwichika, wanawawama, nyi kipfa monjikumbuo kya shindo shose mukuwode necha na njowawaso tsilya njilemwinenga. 3Kya indi njikundi mumanye ke mdo fo orio mndumii nyi Kristo, na mdo fo mka nyi mii, na mdo fo Kristo nyi Ruwa. 4Orio mndu msoṟo kashika iterewa anu kashika ideda awodo Mumuyo nao aṟee kindo kisoke mdonyi nyi asutsa mdo foke. 5Kya indi orio mndu mka kashika iterewa ang'u ideda awodo m Mumuyo alawoshye mdo foke nyi asutsa mpfo foke. Kyamba nyi awa umu tichi na ichu atsikie njui tsake. 6Kyamba kokoya mka alakunda ikushikya na nahende isemo na kamu. Kya indi ili ihenda isemo ang'u itsiko lyo liendie mndu mka wusutsu na nakae amshikye. 7 Mndu msoṟo o alawuṟye ishikya mdo kyamba nyi ai mfano fo Ruwa mohamba ngela yake. Kya indi mndu mka ai mohamba ngela ya mndumii. 8 Kyamba mndumii alapaṟikye ko mka indi nyi mka apaṟikye ko mndumii. 9Manya chi mndumii aletano kimaduma kya mkapfo, indi nyi mka kashika itano kimaduma kya mndumii. 10Nkyondo kiwaṟi mka nakae na kichano kyeitoṟyo ipfo mdonyi foke kipfa kya wasu walya. 11Ma kikamba kido indi ipfo Mndumii-hu mndu mka awa kindo shile mndumiipfo, manya mndumiia awewa kindo shile mkapfo. 12Kyamba chando mka apaṟikye ko mndumii, nyi wudo da na mndumii ekefeo nyi mndu mka. Nasho ili shii shido nyi shii shiwike nyi Ruwa shose. 13Kedumbwonyi muwenyi, nyi kisumhanyi mndu mka nahambe kiterewo kyeterewa Ruwa alaimshikye ko? 14Alae, chi wumba liyenyi limloshye ke mndumii kalekya njui tsilee nyi akuendye wusutsu? 15Indi mndu mka awode njui nileshe nyi kiichiko kyake. Cha kipfa amwinenge njui tso nleshe tsimbiie maṟao hemshikya. 16Indi kokoya kwipfo ahamba nawike-ho Ngano, so luwode kido cha ikyopfo, manya siṟi tsa Ruwa ote.
Kilaayo kya Mndumii
(Mat 26:26-29; Mar 14:22-25; Luk 22:14-20)
17Ili njiwawasa njidi kuwode-pfo handu halawa iichika, nyi kipfa mokesanza kilai kya kiira indi kya kihutsa. 18Kya kuwoka ngaicho wai ke ippfo konu ili mokusanza kui siṟi nyi kuwode mapaṟakano. Nakyo ngakiidikya kyenga. 19Kyamba nyi kuwaṟi iwoneka maletsano ifo konyu kundu walya waidima ikusiryo wamanyike na pata ipfo hamu kulaidimika kekulia kilayo kya Mndumii. 20Kyamba ipfo kilionyi orio mndu ekepfukapfuka iwada kilya kii kyake kikyenyi, 21na ichu awodo n njaa, na ichu nyi a mnanzi. 22Ale! Mulawode mba tsekulia-pfo na ikunyoya? Ang'u mopiṟa siṟi ya Ruwa na ihutsya walya walawode kindo sonu? Njimuwie njida ngesa? Njimwichike ko? Kya ikyo njemwichikanyi. 23Kyamba nyio Mndumii amenjienenga imanya shilya njilemmaa imudambikya nyo, nasho shii shidi, ke Mndumii odu Yesu kio kilya aleṟingyo nyi alewada mkate. 24Kekiidima yaana kafufunja shifunyo kahamba, Aifu mbihu foko fohenda idambikyo kipfa kyanu. Muwe mowuta mudo kenjikumbuo. 25 Na wudo nakyo kirahu kilya kilayo kyamlio kechihamba, Kirahu ki nyi mma mhya ya ipfo samunyi yako; muwe mochiwuta mudi orio mandi monyoya-ho mochinjikumbuo. 26Kyamba orio mandi molya mkate fu na inyo kirahu ki mukeri ihamba opfu lo Mndumii itane echiwuya. 27Nkyo kyaenenga orio molya mkate fu ang'u inyo kirahu kya Mndumii alashisumhanye nyi atahachie mbihu fo Mndumii na samu yake. 28Indi mndu o wandu nakutaanye amonyi, kammaa nache echilya kya mkate fu nawenyo kya kirahu-ki. 29Kyamba ichu ailya na inyo alaichi mbihu fu fuipfo nyi akulia wudeheli na iwukunyoya. 30Nkyo kimaduma ipfo konu kwipfo wafoi waluo, wai wanyonge, na wandu sa weengi walee. 31Indi kima luwekuanduya so luwenyi luwechidehelyopfo. 32Kya indi ili loshika idehelyo nyi Mndumii nyi lohenda itoṟisho kundu lulaseso handu hamu na wuyana wu. 33Nkyo kimwenenge, wanawawama wako, ili moshika ikusanza kilionyi muwe mowediana. 34Kokoya kwipfo mndu awodo nyi njaa nakulie ipfo kanyi, mulashike ikusanza liendye wudeheli. Shingi shadeo-pfo nyi njechishisungusia ili njecha.
Shisumbo sha Mumuyo
Currently Selected:
1 WAKORINTO 11: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
