Detoronomiyo 18

Jowatchela ja aLevi

1Mozeji ohowongagave eraga: <<Anamakuta anno anafwanyeya kagali aLevi, na nlogo natene na Levi aliwa kinagaweliwa ilambo muwari mwa Izarayeli. Aliwa yowatchela yewa anadjege mikuto dotumeya nnaveleliwege wa Yehova.#18:1 yowatchela yewa anadjege mikuto dotumeya : Mulugu ohawandela aIzarayeli makalelo ovelela mikuto datene. Mikuto dimohi dotumeyiwa datene dene. Mbwenye dimohi diwa anamakuta katumeya pandi imohi eto kovahiwa pandi imohiwa ira kadje. (Levitiku 7:30-33; Detoronomiyo 18:3-4) 2Nona aliwa kinakana pandi inafuna atu gaweliwa muwari mwa abaliwa. Tchoira Yehova unafwanyeya agali yowatchela yewa nnga mwawongele liye. 3Mwa eno, atu kavelelaga mukuto masiki ng'ombe nari mabila, anamakuta anerege watchela mwendo wa sogolro, igabwa yatene na nifu ira jikalege jewa. 4Eto nyo munerege avaha johanda joroma ja mmundani mwenyu, ja vinyu wenyu na ja azeti vamohi na mawoya a mabila oroma satiwa. 5Tchoira Yehova Mulugu wenyu waasakunlre aliwa muwari mwa malogo enyu ira kalabege mwa nzina na Yehova, roma aliwa vamohi na ahimiwa malambo matene.

6<<Mwa eno, akalavo muLevi mmohi unakala sidadi ili yatene muwari mwa Izarayeli, avivelela ira akume vande, adowe nimburo neno nnasakulre Yehova, 7adowa alabaga mabasa a Yehova Mulugu waye nnga jinaira abalaye atene a Levi anno analaba mwa nzina na Yehova, 8liye unowatchela jodja jimohive jinavahiwa afwaye. Eto hiya yennove bahi, unowatchela yengo ili yatene yozela jejo jinaguliha abalaye amohiwa kahanle vande.#18:8 unowatchela yengo ili yatene yozela jejo jinaguliha abalaye : Joguliha jinawongiwa va, kinawonga guliha tereno nari. Mwasiwa aLevi aliwa tchanna tereno yagaweliwe atu nari. So kowanda manga nyumba diwa na yengo imohiwa ili yatene yawanda atu sakanya, aliwa guliha. Mwa enne kaguliha joguliha jiwa, kobiriwa kowanda gawa muwari mwa abaliwa. Evale muLevi wenno ababaye kagulihile yengo ili yatene, kafuna komurumiheda kobiri wewule walaba liye mabasa a Mulugu.

Jotakaletchetcha jakondihiwe aIzarayeli

9<<Mwavolowa ilambo yenno Yehova Mulugu wenyu inafuna liye uvahani, kamusazihege makalelo otakaletchetcha anera atu a ilambwele. 10Muwari mwa nyo kakalevo mutu oira: <Nnafuna dimpe mwanagola, dimutumeye, akale mukuto.> Nari mwanapongwe, nari mwana muhiyana. Eto kakalevo mutu ofunaga wombeza makanga, nari wonga ja mitalre nari wombeza nnga ja penda. Kakalevo unalowa, 11nne mutu ofunaga josaka mirombwe dokwima, nne akutela azimu, nne irana ja fukulra, nne kala nnga anne anatapanya na azimu. 12Mwasiwa unairana jejo, gu mutu otakaletchetcha vamentoni va Yehova. Na mwasa wa jotakaletcheha jejo jinaira atwale, nona Yehova Mulugu wenyu aatamangihaga malogo ale mwilamboni mule vasogolro venyu. 13Nyo mbwenye inafwanela mukale atu ohofwanyeyana yabure ili yatene vamentoni va Yehova Mulugu wenyu. 14Tchoira malogo a atu anafwanyeya ilambo yenno inafuna nyo atamangihamo, anaroromela ja mitalre na jowombeza makanga. Nyo mbwenye, kamwaasazihege mwasiwa Yehova Mulugu wenyu unokondiha jatene jejo.

Yopangana zela namafiyiheda mundimuwa afuna za

15<<Muwari mwa abalinyu Yehova Mulugu wenyu unonvenyiha namafiyiheda mmohiwa nnga miyo. Liye agazile, inafwanela munvwelelege. 16Inoza iireye nnga mwanvepele nyo Yehova Mulugu wenyu mwagali Orebi, siku nagumanne atu atene, muwongaga ira: <Hiyo kannafuna vwa akoka nizu na Yehova Mulugu wehu nne kannafuna ona akoka munlo mundimuwa ula, tawiha ira nnakwe.> 17Mwa enne Yehova ohodiwandelaga, liye ira: <Mazu kawongile atu, kohowonga pama. 18Miyo nnonvenyiha namafiyiheda mmohiwa nnga weyo muwari mwa abaliwa eto nnotukula mazwaga dihele vamulomoni vaye. Mwa eno, liye unerege awandela jatene jinamuwandelege miyo. 19Jejo jaireya, mutu wenne ahanafune vwa mazwaga anno anafuna wongaga namafiyiheda ule mwa nzina naga, miyo nnoza dimutonge.>

20<<Mbwenye eto namafiyiheda wenno unavenye mofuna mwaye aroma wonga mazu mwa nzina naga, mazu anno dahamuwandenle miyo, nari awongaga mwa nzina na amilugu amohiwa, liye na ibaribari inafwanela apiwe. 21Eto nyo mwaroma fuka mmirimani mwenyu muiraga: <Kodi hiyo nnawande iziwa avi ira mazwala kikumile wa Yehova?>, 22makalelo oira muwande iziwa akala namafiyiheda ule unawonga ja ibaribari, ba ala: liye awonga mwa nzina na Yehova, jengo jiwa jahakwakwanele nne jahaireye, inafwanela muwande iziwa ira mazu anno Yehova kawongile. Tchoira namafiyiheda wenno uwongile mofuna mwaye. Eto kakalevo unafuna muova.>>

Currently Selected:

Detoronomiyo 18: iLolo

Highlight

Copy

Compare