Detoronomiyo 17

Makalelo oatonga atu oahara amilugu amohiwa

1Mozeji ohowongagave eraga: <<Mwavelelaga mwanainyama wa Yehova Mulugu wenyu, kamuvelelege ng'ombe nari nibila norangala nari nokana yabure ili yatene, tchoira yenno inafwanyeya yagali yengo yotakaletchetcha wa Yehova Mulugu wenyu.

2<<Eto muwari mwa nyo nari muwari mwa sidadi yenno inafuna uvahani Yehova Mulugu wenyu, akalamo mulombwana nari muhiyana unafuna irana jabure vamentoni va Yehova Mulugu wenyu, aviringanihaga yopangana ya Yehova, 3avenya adowa aharaga eto atamalelaga amilugu amohiwa nari nzuwa, nari mwedi, nari jomoneya jatene jinafwanyeya zulu jejo jukondihileni miyo ira mwahakokorelege, 4yabure yenno yakuma, nyo mwavwa, inafwanela musaketchetche pama iziwa akala na ibaribari jihiireya. Evale mwaiziwa ira na ibaribari jihireya jotakaletchetcha jejo mwilamboni mwa Izarayeli, 5mmutukule mulombwana nari muhiyana wenno, mmudowena unde wa sidadi yenyu, mwanvoke mabwe ante afiyede kwa. 6Ira mutu apiwe, urome oneya umboni wa atu ambinli nari atu araru. Mbwenye waoneya umboni wa mutu mmohi bahi, kamumpe. 7Eto afunaga piwa, amboniwa kakale arandji nvoka mabwe. Era eno atu atene kanvoke mabwe ira akwe. Ayo ba makalelo anafuna nyo malihaga ubure vari venyu.

Makani orutcha ofwanela afuka anamakuta

8<<Muwari motonga, mwaona makani orutcha tonga, akala makani ovuviha sangiri, nari josumelana ja burebure, nari joporotchana, nari yengo imohiwa, akala kamunawanda tonga, inafwanela mudowena nimburo neno nnafuna sakulra Yehova Mulugu wenyu, 9mudowe mwaafwanye anamakuta anno anafwanyeya kagali aLevi vamohi na namatonga unakalewo tempu yenno. Aliwa banafuna uwandelani matongelo a mulandu wenno. 10Teto inafwanela muirena nnga mwemo munawandeliwe nyo nimburo neno Yehova nnasakulre liye. Inafwanela muing'ane pama ira mukwakwanelihede nnga mwemo munafundjihiwele nyo. 11Eto muiregena mokwakwanela na malamulo vamohi na jotonga jejo jinawandeliwe nyo. Yotonga inafuna atu uwandelani kamuhiye nne kamuperuwele muwononi odjana nne muwononi oromana. 12Mbwenye mutu wenne unavende joruniha ahafunaga vwelela jejo jinafuna wonga namakuta wenno unafwanyeya alabaga mabasa a Yehova Mulugu wenyu, nne ahafunaga nvwelela namatonga ule, mulombwana wenno inafwanela apiwe. Inafwanela muwandege kumihamo ubure muwari mwa Izarayeli, 13ira atu atene kavwe eto kaovege ira kaharunihege.

Sakulriwa wa amwene vamohi na makalelo ewa owenda

14<<Mwavolowa ilambo yenno inafuna uvahani Yehova Mulugu wenyu, mwamala itukula, mwaroma kalamo, mwafunaga joira: <Nnafuna nimukayena mwene nnga jiirile malogo matene kaniwandamenle>, 15mmuhambihege mutu wenne Yehova Mulugu wenyu unamusakulre liye. Mutuwa akalege okumela munlogoni mwenyu, muwari mwa abalinyu. Mbwenye kavikale wandeya muhambiha umwene mutu oza ohokala wa nlogo nenyu, wenno ahali mbalinyu. 16Mbwenye liye agahambihiwe umwene, kasimbwe kana kavalo didjindji nne kaarume atu ira kadowe ilambo ya Ijipitu ira kagulege kavalo. Tchoira Yehova uhuwandelani ira: <Kamuza mudowa akoka ilambo ya Ijipitu.> 17Eto nne kaaindjivihe ahiyana pwi, tawiha ira murima waye unaholowe. Eto nne kaindjivihe parata, nne oru mudjindji.

18<<Eto mwene wenno unafuna nyo muhambiha, aroma tonga, inafwanela abolihe livuru na malamulo neno nnakoyiwa na anamakuta anno anafwanyeya kagali aLevi, akopiyari jatene ahele livuru naye nixa. 19Livuru nne nikalege na liye, ailerigi kalawo waye watene ira aiziwege muova Yehova Mulugu waye eto ira awandege hariha vamohi no kwakwaneliheda mazu matene a malamulo ala vamohi na mangano matene. 20Inafwanela airegena eno tawiha ira murimaye unarome vitukulela afunege jokala vazulu va abalaye atene eto tawiha ira unahiye mazu matene a malamulo, aperuwele muwononi odjana owu oromana.#17:20 aperuwele muwononi odjana owu oromana. Peruwa unawongiwa eva kahi peruwa ozela mutu awendaga mundila, nari. Mbwenye anawonga zela hiya jofuna ja Nabwiya, roma haraga jimohi jiwa jene. Tchoira awenda pama, malambo a umwene waye anoindjiva muwari mwa aIzarayeli roma liye vamohi na ahimaye.>>

Currently Selected:

Detoronomiyo 17: iLolo

Highlight

Copy

Compare