Detoronomiyo 16

Pwando ya Mavirelo

1Mozeji ohowongagave eraga: <<Afiyaga mwedi oroma wa yaka, wenno unaitaniwa Abibi, inafwanela muumbuwele ira musakanyege Pwando ya Mavirelo yomutitimiha Yehova Mulugu wenyu. Mwasiwa mwedi wa Abibi gu mwedi Yehova Mulugu wenyu aukumihileni liye ilambo ya Ijipitu na mahiyu. 2Mwa eno, munerege dowa nimburo neno nnafuna sakulra Yehova ira ahele wewo nzina naye ira muvelele mabila owu mbuzi owu hehi ng'ombe ira jikale mikuto da Pwando ya Mavirelo wa Yehova Mulugu wenyu. 3Mwadjaga pwando yenno kakalevo mutu unafuna djaga pawu dosakanyiwa na leverina. Inafwanela mudjege pawu dohosakanyiwana leverina fiyeda malambo matanu na menli a pwando ile kamale. Tchoira pawu dedo ti pawu da goyi, mwasiwa nyo mukumaga Ijipitu mwakumile mwilamboni mule mobaranya. Muiregena eno ira kalawo wenyu watene muumbuwelege zela siku nakumile nyo muIjipitu. 4Muwari mwa malambo matene matanu na menli ale, mwilamboni mwenyu kamukalege leverina. Eto siku noroma, mwanainyama wenno munampe nyo ora ya tchiguwo ira akale mukuto, nyamiwa kihale ifiyeda mmetcheloni muwa, mbwenye johala jitumeyiwe siku nimohive.#Ezodu 12:8-10 5Kamuvelelege mikuto da Pwando ya Mavirelo muwari mwa sidadi denyu mwemo munafuna uvahani Yehova Mulugu wenyu. 6So mbwenye muvelelege mikuto da Pwando ya Mavirelo nimburo neno nnafuna sakulra Yehova Mulugu wenyu ira ahele nzina naye wewo. Muvelelege ora ya tchiguwo, nzuwa naviraga, tempu yolingana na tempu yakumihiwemo nyo mwilamboni mwa Ijipitu. 7Eto nimburo neno nnasakulre Yehova Mulugu wenyu, pa vevo vanafuna nyo piya no dja nyama yenyu. Era eno mmetcheloni muwa, munovenya na mabebehene mudowege mmisasani mwenyu. 8Malambo matanu na nimohi mudjege pawu dohosakanyiwana leverina. Eto siku nanetanu na mbinli ti siku nogumana ira mulobele wa Yehova Mulugu wenyu. Siku neno nafiya kamuhinde mabasa ali matene.#Ezodu 12:1-20, 23:15, 34:18; Numero 28:16-25

Pwando Yokontari Sumana

9<<Mukontarigi sumana tanu na mbinli, romela maromelo wa mahandelo. 10Sumana tanu na mbinli dile damalaga, musakanyege wa Yehova Mulugu wenyu Pwando Yokontari Sumana. Mwadjaga pwando ile, munerege velela jovelela jozela funa wa kada mutu, malringana na makalelo urelihiwe we na Yehova Mulugu wawo. 11Eto unerege hagalala vamentoni va Yehova Mulugu wawo romela weyo vamohi na ahimawo a anapongwe vamohi na ahimawo a anavihiyana, anamalabawo a alombwana na anamalaba a ahiyana, vamohi na aLevi anno anakala sidadi ili we, na atu oza, na anapawi, na amakwele anakala vamohi na weyo. Munodowa mwahagalalege nimburo neno nnasakulre Yehova Mulugu wenyu ira ahele wewo nzina naye. 12Eto muumbuwele ira nyo mwafwanyeya mwagali azari ilambo ya Ijipitu. Nona inafwanela muing'ane pama ira mukwakwanelihedege mangano ala.

Pwando ya Misasa

13<<Mwamala bubuda jodja jenyu eto mwamala finya uva wenyu, inafwanela musakanyege Pwando ya Misasa malambo matanu na menli. 14Muhagalalege vapwandoni vale weyo na ahimawo a anapongwe vamohi na ahima a anavihiyana, anamalabawo a alombwana na anamalaba a ahiyana, vamohi na aLevi, na atu oza, na anapawi, na amakwele anakala sidadi ili we. 15Musakanyege pwando wa Yehova Mulugu wenyu malambo matanu na menli nimburo neno nnasakulre Yehova. Tchoira Yehova Mulugu wenyu unourelihani mwa johanda jenyu jatene na mabasa matene analabege nyo na mandinyu. Nona na ibaribari inafwanela muhagalalege.#Numero 29:12-38

16<<Va kada yaka mulombwana uli watene unerege dowa vamentoni va Yehova Mulugu wenyu fendo taru nimburo neno nnasakulre Yehova. Fendo yoroma inakala Pwando ya Pawu Dohosakanyiwana Leverina, yowelela Pwando Yokontari Sumana, yaneraru inakala Pwando ya Misasa.#16:16 Pwando ya Pawu Dohosakanyiwana Leverina, yadjiwa malambo matanu na menli kagadjile Pwando ya Mavirelo. Pwando ya Misasa yaitaniwa eto Pwando Yotamalela zela Johanda Jatene. (Ezodu 34:22) Mwa eno, kakalevo mulombwana unafuna za ditamalelaga eno manda ve ahanna yengo yoditamalelana. 17Mbwenye azaga unerege zana jovelela malringana kada mutu kana waye eto zela mareliho Yehova Mulugu waye unvahile liye.

Makalelo a anamatonga na asogolrelri

18<<Mwavahiwa ilambo yenyu, munerege asakulra anamatonga vamohi na asogolrelri muwari mwa sidadi denyu datene dedo Yehova Mulugu wenyu unafuna liye uvahani kada nlogo. Aliwa anohambihiwa ira kaatongege atu na matongelo a ibaribari. 19Aliwa katongaga, kigombihege matongelo a ibaribari eto kikayena nsakulro, nne kirumelege kunyariwa. Tchoira kunyariwa unotwa meso a maliba toto ira atu apama kahatongiwe mwa ibaribari. 20Nyo mbwenye muharege matongelo a ibaribari bahi ira muwande kalawo eto muwande tukula ilambo yenno inauvahani Yehova Mulugu wenyu ira ikale yenyu.

Mazu okameliha ja vikwamutu josema

21<<Kamuimetchege nimbozo na mulugu Azera wandamelana vevo vinafwanyeya ibuwa ya Yehova Mulugu wenyu yenno inafuna nyo manga. 22Nne kamuimetche nimbozo noatamalela amilugu mwasiwa Yehova Mulugu wenyu unotakaleliwa ejo.>>

Currently Selected:

Detoronomiyo 16: iLolo

Highlight

Copy

Compare