Detoronomiyo 15
15
Yaka yolevelelana
1Mozeji ohowongagave eraga: <<Mamalelo wa kada yaka tanu na mbinli,#Ezodu 23:10-11 mulevelelanege mangawa enyu. 2Makalelo olevelelana anafuna nyo iraga, ba ala. Kada mutu ambolihile#15:2 ambolihile nari anfiyarihile. yengo muIzarayeli nfwaye, kamukose. Kakalevo unafuna mukosa yengo mbalaye nari mwandamanaye. Tchoira ihimala wongiwa ira yaka yenno tchi yaka yolevelela ya Yehova. 3So wafunaga kosa, waakosege atu ohokala aIzarayeli. Mbwenye akala mbalawo muIzarayeli kumukose. 4Inafwanela mwahakosanege ira muwari mwa nyo ahakalemo maliba simela. Tchoira Yehova Mulugu wenyu unourelihani na makalelo ohokala a masika ilambo yenno inafuna liye uvahani ira mwatukule ikale yenyu, 5malringana mukala atu ovwelela pama mazu a Yehova Mulugu wenyu ira muharihegemo pama malamulo matene anna anauwandelani miyo peno. 6Mwasiwa Yehova Mulugu wenyu unourelihani nnga mwemo mwawongele liye. Mwera eno, rayela unafuna nyo kana unakala rayela undimuwa fiyeda ira munerege aboliha atu kobiri eto nyo kamuza mudedihaga boliha kobiri dewa. Eto munerege atonga malogo madjindjene, mbwenye aliwa kiza kautongagani.
Zela bolihana
7<<Muwari mwa nyo, akalamo mbalawo mmohi osimela, musidadi mwawo, mwilamboni mwenyu yenno Yehova Mulugu wenyu unafuna liye uvahani ira ikale yenyu, kuummihe murima wawo, nne kupuranye mandawo zela mbalawo usimenle. 8Mbwenye inafwanela utapule ndanda nawo, umbolihe mwapama na mmirimani mwawo mwatene yenno inamuhalela, malringana no simela waye.#15:8 yenno inamuhalela, malringana no simela waye: Fwanyeya ira aIzarayeli kohotongiwa ira kakayena makalelo obolihana. Mbwenye kaali ira kambolihege mutu uli watene, mbwenye mutu wenno afwanyeyana makatamiho. Hiya wenno afwanyeya aganna jodja na jowara na vokala eto afunaga wendjeda rayela waye. Eto fwanyeya ira wenno avenda jomuxangaxanga nfwaye era vitembelrelra. (Levitiku 19:35-37; Poroveribiyo 11:1; Jeremiya 22:13; Malakiya 3:5) 9Polre polre tawiha ira mbalawo osimela aza aufwanya, mmirimani mwawo munakale joumbuwela jotakala wiraga: <Ii, yaka yolevelelana yanetanu na mbinli inawandamela.> Era eno we muhiya eno wahamukamihedile. Mwa enne liye anla wa Yehova zela jimuirele we, weyo unofwanyeyana yotega vamentoni va Yehova. 10So mbwenye inafwanela unvahege na mmirimani mwawo mwatene, mohowanganyeda. Tchoira Yehova Mulugu wawo unoureliha na mwasa wenno muwari mwa mabasawo matene vamohi na jatene jinahindege we.#15:10 Yehova Mulugu wawo unoureliha na mwasa wenno: Mulugu apanganne na aIzarayeli ira aliwa kaawendela tangaranga atu osimela, liye erege reliha johinda jiwa. Ku wonga Mulugu ohopangana ira aawelihede yenno yaavaha atu aliba simela. Yopangana yenno Mulugu awongile zela mutu wenno amboliha nfwaye kobiri ahanna yoing'anela ira unomuweliheda (Detoronomiyo 15:8-10), nari mutu wenno amboliha nfwaye kobiri ahampagalriha juru (Detoronomiyo 23:20), nari wenno amukutcha muzari anvahaga jengo pwi agamulabile yaka tanu na imohi (Detoronomiyo 15:12-18), nari wenno adjaga pwando, aadjiha atu osimela (Detoronomiyo 14:29), nari wenno unahiya jodja ja vang'ono mmindani mwaye ira atu osimela kaze kadodelege. (Detoronomiyo 24:19) Mutu wenno airana jokala ha jejo agomela relihiwa, Mulugu omuweliheda yengo yanvahile liye nfwaye osimela. Eto fwanyeya ira Yesu unikokomeza ira naakamihedege atu osimela, masiki ale nnaona hiyo ira kinawanda niweliheda. (Lukaji 6:34-35) 11Tchoira mwilamboni mwenyu aliba simela kiza kamala.#Matewuji 26:11; Markuji 14:7; Juwawu 12:8 Nona miyo nnouwandelani ira mutapule ndanda nenyu para mutu osimela nari mutu ofuna kamihediwa, monvaha na mmirimani mwenyu mwatene.
Gunyiwa wa azari
12<<Eto wagulihediwa mbalawo muEberewu wa mulombwana nari wa muhiyana, inafwanela liye aulabege yaka tanu na imohi. Mbwenye yafiya yaka yanetanu na mbinli, inafwanela umuhiye akumemo muuzarini mwaye vasayi vene. 13Eto wamuhiya ira akumemo muuzarini mwaye, kumuhiye eno adowaga manda ve. 14Mbwenye inafwanela adowaga, unvahemo mwa mabila awo na jodja jawo jibubudile we, na vinyu wawo, mokwakwanela na makalelo Yehova Mulugu wawo unaurelihe liye. 15Tchoira muumbuwele ira nyo mwali azari ilambo ya Ijipitu eto Yehova Mulugu wenyu ohoza, liye uwombolani. Nona peno miyo duwandelagani ira muiregena jeji.
16<<Mbwenye yafiya yaka yanetanu na mbinli ile, weyo wafunaga mukutcha muzari wawo, liye mbwenye na mwasa ouziveliwa weyo vamohi na atu atene a vande vawo eto na mwasa okala pama na nyo vande vale, liye awonga ira: <Miyo kannadowa>, 17vo mbwenye weyo umutukule liye, umudowena va mulango, utukule perepesu umpovolena nibaru naye. Era eno liye unokala muzari wawo kala no kala.#Ezodu 21:6 Makalelo anna eto ba mamohive munafuna nyo airagana azari a ahiyana.
18<<Mbwenye muzari wawo afuna jodowa, wamuhiya ira akumemo muuzarini mwaye, kukale otakaleliwene na mwasa omulanya. Tchoira va yaka tanu na imohi dilabile liye, ahakanlege umulabihaga munyaganyo, yotambilra yaye yakala fendo mbinli ya jatene jimunongele nyo muzari ule. Waira eno Yehova Mulugu wawo unoureliha mwa jatene jinairege we.#Levitiku 25:39-46
Makalelo odja anavinyama arandji reliwa
19<<Ahima a ng'ombe na ahima a mabila a alombwana oroma reliwa, inafwanela mubalre nnga a Yehova Mulugu wenyu. Mwanainyama wa ng'ombe oroma reliwa akala wa mulombwana kalabiwegena mabasa, nne kamusatege mawoya a mabila enyu oroma reliwa kagali a alombwana. 20Mbwenye mudjege vamentoni va Yehova Mulugu wenyu, va kada yaka, weyo vamohi na atu atene a vande vawo, nimburo neno nnasakulre Yehova. 21Mbwenye areliwa mwanainyama wa mulombwana oroma ohokala pama, otchikama, owu ohoona, nari okana yoviringana ili yatene, mwanainyama wenno kamuvelelege wa Yehova Mulugu wenyu. 22Anavinyama orangala ayo mudjege sidadi yenno inakala nyo, atu atene masiki anne anafwanyeya kagatakanle nari atu anne anafwanyeya kagali apamene anerege dja. Mudjege nnga munadjela nyo nase na nangoma. 23So sangiri niwa kamudje. Mutatilelege vati nnga mahindje.>>
Currently Selected:
Detoronomiyo 15: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
