1 Korinto 7

Jowakula ja Pawulo zela jofuka janna aKorinto zela telana

1Va nnafuna diwakule jowonga jidilrembenle nyo. Zela nkani otela, yali pama mulombwana ahatele. 2Mbwenye voira mulombwana ahatele eto muhiyana ahateliwe, unokana funafuna ira araruwe, inafwanela mulombwana uli watene akayena muhiyanaye eto muhiyana uli watene akayena mamunaye.#7:2 mulombwana ahatele eto muhiyana ahateliwe, unokana funafuna ira araruwe: Mazwala anoniwandela ira adiye kagona vamohi, anararuwa. Ira adiye kahararuwege, Pawulo ohowonga ira: inafwanela mulombwana uli watene akayena muhiyanaye eto muhiyana uli watene akayena mamunaye. Nona inafwanela muzombwe na namwali karome telana kahanagone vamohi. 3Inafwanela mulombwana agumanege na muhiyanaye eto muhiyana agumanege na mamunaye nnga vinera atu katelana. 4Tchoira muhiyana kanna utongi zela maningo aye eka mbwenye unatonga maningo a muhiyana gu mulombwana. Sawasawa eto mulombwana kanna utongi zela maningo aye eka mbwenye unatonga maningo a mulombwana gu muhiyanaye. 5Kakalevo unafuna nkonda nfwaye. So muwari movwanana, mwafuna, so mmalege tempu ya vang'ono mwahanagumane ira mukayena ora yolobela mopwaseya. Mwamala eno, inafwanela mugumanege akoka tawiha ira Satana unaze aunyengeni mwasiwa kamunawanda vihiyiha jabure. 6Dawongaga eno kannaurumani. So nnawonga ira mwafuna.

7Miyo dohofuna nnga atu omuroromela Yesu kakale adiye nnga miyo. Mbwenye dihiiziwa ira kahi eno, mwasiwa kada mutu ukana yolemelela yaye yenno Mulugu invahile liye. Mutu mmohi uvahiwe ila, nfwaye uvahiwe ila. 8Zela pandini wa adiye na amakwele, inafwanela kawendege eno ohotelene owu ohoteliwene nnga miyo. 9Mbwenye mutu aviona ira miyo jofuna jaga jihiindjiva, inafwanela atele owu hehi ateliwe. Mwasiwa yapama ku tela owu teliwa hiyaniha no wenda na iluveluve yongonana nfwaye.

10Zela nyo muli otelanene na wanle, nnafuna durumeni eni. Eto unaurumani kahi miyo. Unaurumani gu Nabwiya. Kakalevo muhiyana unafuna muhiya mamunaye. 11Mbwenye muhiyana amuhiya mamunaye, inafwanela awendeve ohoteliwene owu hehi, awele aze awandane na mamunaye akoka. Eto pandi ya mulombwana, kakalevo mulombwana ofuna mwalana na muhiyanaye.

12Eto zela amohiwa, miyo nnafuna diwonge, unawonga gu miyo hiya Nabwiya, ira mbalihu akana muhiyanaye ohomuroromela Yesu, arumela wenda na liye, inafwanela mulombwana ahamulanye. 13Eto murongolihu akana mamunaye ohomuroromela Yesu, arumela wenda na liye, inafwanela muhiyanole ahamuhiye mamunaye.#7:13 inafwanela muhiyanole ahamuhiye mamunaye: Ku wonga inafwanela muhiyana akaleve na mamunaye hiya vendaga joweliha pete ira kamwalane. 14Tchoira mulombwana ohomuroromela Yesu unotchenihiwa muwari mowenda na muhiyanaye omuroromela Yesu. Eto muhiyana ohomuroromela Yesu unotchenihiwa muwari mowenda na mamunaye omuroromela Yesu. Eto kamwalana, ahimiwa anotakala mbwenye kakala vamohi, anokala otchena.#7:14 mulombwana ohomuroromela Yesu unotchenihiwa muwari mowenda na muhiyanaye omuroromela Yesu: Ku wonga ira ukala upama Mulugu unamuirela liye mutu wenno ahanamuroromela Yesu na mwasa owenda na nfwaye omuroromela Yesu. Eto muhiyana omuroromela Yesu amwalana na mamunaye ohomuroromela Yesu, ahimiwa anozuzuma. Mbwenye kakalave vamohi, ahimiwala anokala pama muwari mokala na babiwa vamohi na mmiwa. Mazwala kinawonga ira mutu unovulusiwa muwari mwa nfwaye, nari. 15Mbwenye mutu ohomuroromela Yesu afuna jomwalana, airena mofuna mwaye. Jaireya eno, mulombwana omuroromela Yesu nari muhiyana omuroromela Yesu ahala, umala kutchiwa. Tchoira Mulugu uniitanne ira hiyo niwendege na murendele. 16We muhiyana omuroromela Yesu, unaiziwa avi akala mamunawo unoza amuroromele Yesu muwari mwa weyo? Kunonne. Eto weyo mulombwana omuroromela Yesu, unaiziwa avi akala muhiyanawo unoza amuroromele Yesu muwari mwa weyo? Kunonne.

Inafwanela kada mutu awendegena makalelo Mulugu unvahile liye

Zela azari wanle

Malambo a mundulrimu ilambo yakala atu wewule, kohokalawo azari. Mutu akana mangawa, muwari mohokana kobiri yopagalri, liye odowa merkado, viguliha kala muzari. Mutu afuna ira: <<Nnafuna dimukayena muzari>>, odowa merkado, liye afwanya atu kavigulihaga. Liye musakulra wenno anfuna liye, liye mugula, mudowana vande vaye. Amudowana vande vale, muzari ule ahinda mabasa afuna muruma mbwiyaye ule. Liye katambilra yengo. So erave laba, vahiwaga udja na jowara na vogona bahi.

Muzari ule akalave na mbwiyaye ule fiyeda awande pagalri mangawa anna liye. Tchoira mutu apata kobiri yenno yaguliwena liye, owanda viwombola muuzarini mwaye. Pawulo awendaga aalaleyaga atu ohiyana-hiyana, amohiwa kavulusiwaga, kafwanyeya kagali azari, atu okana ambwiyiwa a mwilamboni ya vati. Nona Pawulo ohokana mazu afuna liye wonga muwari moakokomeza atwale.

17Nlamulo nnawonga miyo muwari mwa makuru matene a atu omuroromela Yesu ti ni. Zela jotela ji, zela joineliwa, inafwanela kada mutu aimele na makalelo anno Nabwiya anvahile liye eto aimele nnga vali liye Mulugu amuitanaga ira amuroromele Yesu.#7:17 aimele nnga vali liye Mulugu amuitanaga: Mazwala kinatapulela ira akala mutu Mulugu amuitanaga ira avulusiwe, ali okwimene, owu hehi ali mbava, owu hehi ali mutu oraruwa, inafwanela awendegeve no kwima waye na umbava waye no raruwa waye, nari. Muselu unawonga atu kahi wenno. Pawulo ohowonga mazwala moakokomeza atu tchoira liye kafuna nnga muhiyana amutawe mamunaye ira: <<Mamunaga kanamuroromela Yesu. Nnafuna ditawe, diteliwe na mulombwana mmohiwa omuroromela Yesu.>> Pawulo eto kafunne ira muzari amutawe mbwiyaye ira: <<Miyo tchineneva nnamuroromela Yesu. Mulugu udikutcha jotega jaga. Miyo podi dowaga jaga.>> Tchoira nnovwa ira muwari movulusiwa mule, Yesu univulusele ira niiregena japama. (Efezo 2:10; Roma 6:1-2) Pawulo eto ohawandela akuda Korinto ira kamutamangihe maliba raruwa afwanyeya muwari mwa aliwa. Nione 1 Korinto 5:1-2,12-13. 18Akala ukala mutu umanle ineliwa,#7:18 ineliwa: Ineliwa unawongiwa va kahi nnga ineliwa wa tempu ili hiyo ila. Wanle Mulugu ohomuwandela Abarahamu ira: mwana wa mwanapongwe uli watene unabaliwege vande vawo, akwakwanihaga malambo matanu na mararu, inafwanela aineliwe. (Jenesesi 17:10-14) Eto aineliwa ali ahima a alombwana ve, kakwakwaniha malambo matanu na mararu. Ku wonga mwana agali nnyenya na mmandani. Nione Levitiku 12:3. Ku wonga ja lunga jinera azombwe eto ja zoma na anamwali jinera atu tempu ili hiyo ila kajinna pandi na Mulugu. amala Mulugu amuitana ira amuroromele Yesu, kazuzume ira atu kahaiziwe ira uhumala ineliwa, nari. Akala ukala mmohiwa ali ahanaineliwe, amala Mulugu amuitana ira amuroromele Yesu, kazuzumele ira aineliwe. 19Tchoira ineliwa kunna mabasa. Masiki eto haineliwa kunna mabasa. Inna mabasa ku irana malamulo a Mulugu.

20Inafwanela kada mutu aimele na makalelo nnga Mulugu anfwannyena liye ora imuitanne liye ira aze amuroromele Yesu. 21Akala uitaniwe wagali muzari, kusimbwe kukumuwa, ukaleve eno. Mbwenye wawanda viwombola muuzarini mule, ili yapama uviwombole. 22Tchoira wenno uitaniwe na Nabwiya agali muzari, umala kutchiwa. Sawasawa eto ule uitaniwe agali vande vaye, ahali muzari, gu muzari wa Kiristu. 23Tchoira nyo muhuguliwa na peresu yokwima. Nona kamukalegeve azari a atu amohiwene a ilambo ya vati. 24Nona abalaga, inafwanela mutu aimele vevo Mulugu vanfwannye liye, awendegeve eto na Mulugu.

Jokokomeza para adiye

25Va nnafuna duwakuleni zela nkani wa adiye. Zela nkani wa adiye, miyo kadinna nlamulo nawongile Nabwiya. So nnga dili mutu ororomeleya muwari mwa tangaranga da Mulugu, moonelramo mwaga nnafuna diwonge eni. 26Dera diumbuwelemo, nnaonamo ira na mwasa wa makatamiho a malambwala,#7:26 makatamiho a malambwala: Ira Pawulo awonge mazwala, inakala nnga atu omuroromela Yesu ora yenno koharahariwa. inafwanela kada mutu aimele evale vaimenle liye. 27Akala ukana muhiyanawo, kusake jomulanya. Akala kunna muhiyanawo, kumusake muhiyana. 28Masiki eno, ule unafuna mutela muhiyanaye, amutela, kategile. Eto muhiyana unafuna teliwa, ateliwa kategile. Eto fwanyeya ira makatamiho anakana aliba tela mwilamboni ya vati muno kahi mang'ono. Nnawongela eno ira durambeliheni makatamiho anno.

29Miyo abalaga, inafuna miyo duwelruzeni tchi ila. Tempu ibanlre Mulugu imala gwadeya gwadeya. Nona roma peno dowa sogolro, ule utenle, kabalre ira: <<Miyo dihitela.>> 30Mutu unatomola kuto, kabalre muselu unanlela liye. Mutu uli ohagalalene, kabalre hagalala waye. Ule unagula yaye, kabalre ira: <<Peno dihigula yengo.>> 31Ule unahinda mabasaye a ilambo ya vati, aiziwe ira: <<Ilukuluwa kahi mabasa anahinda miyo ala.>> Tchoira jatene ja ilambo ya vati jiliwo tchineneva jinadowa mamalelo.#7:31 jatene ja ilambo ya vati jiliwo tchineneva jinadowa mamalelo: Pawulo awonga ejo mwasiwa tela nari jokana nari jinanlela hiyo nari jinahagalalela hiyo, jatene jinogoma.

32Miyo nnafuna dukokomezeni nyo ira mwahakukumuwe zela ja ilambo ya vati. Tchoira mulombwana wenno uli mudiye unowanda zuzumela ja Nabwiya, aumbuwelaga makalelo bavi ofwanela ira Nabwiya aziveliwege joira jaye. 33Mbwenye utenle unakukumuwela ja ilambo ya vati. Unokana youmbuwela ira: <<Dire avi ira dimuzivelihe muhiyanaga?>> 34Unofuna ja wu na ja wu. Sawasawa muhiyana uli mudiye unakukumuwela ja Nabwiya bahi. Unowanda umbuwela makalelo otchena bavi anafuna liye wenda na mmirimani mwaye na maningo anna liye. Mbwenye ule uteliwe unakukumuwela ja ilambo ya vati. Unokana youmbuwela ira: <<Dire avi ira dimuzivelihe mamunaga?>> 35Miyo jatene ejo kannautongani ira mwahatele. So miyo nnawonga ira mukale pama ira mukayena makalelo ofwanela ira kada mutu alabe jofuna ja Nabwiya kwaranya jengo jatene.

36Zela mutu wenno umbanyenlre mwendaye,#7:36 Zela mutu wenno umbanyenlre mwendaye: Ira Pawulo alrembe mazu anna, liye unawakula yofuka ya aKorinto. Inakala nnga wewo wohokala mulombwana ambanyenlre mwendaye, no mala liye wanganyedaga ira: <<Kodi ili pama dimutele? Owu hehi dimuhiye?>> Ila tchi yowakula ya Pawulo zela nkani wenno. anfunave pama, aona ira: <<Miyo dihimala mbanyelra. Eni liye ukana idadi yoteliwa, ira dimuhiye wene kinakala>>, akala inofuneya amutele, inafwanela amutele nnga munafunela liye. Inafwanela katelane, tchoira telana kahi yotega.#7:36 MaBibiliya amohiwa anawonga ira: Akala ukala baba unna mwanaye wa muhiyana eto unna idadi yoteliwa, afuna muteliha, inafwanela amutelihe. Sawasawa vs 37-38, maBibiliya amohiwa anawonga zela baba muteliha mwanaye hiya muzombwe mutela mwendaye ambanyenlre liye. Mazwala anorutcha tapulela na iGerego. 37Mbwenye ule uli ngi ngi ngi mmirimani mwaye ahafunaga mutela, akala liye kanagondjihiwa na iluveluve yaye, akala liye umala sakulra mmirimani mwaye ira amuhiye, inafwanela ahamutele. Liye eto usakanya pama. 38Fwanyeya ira ule unamutela mwendaye, usakanya pama. Eto ule ahanamutela unosakanya pama kwaranya.

39Muhiyana uteliwe uli omangiwene na mamunaye wenno pakana siku nnafuna kwa mamunaye. Mbwenye mamunaye agakwile, liye unowanda teliwa na mulombwana wenno unanfuna liye. Malringana katelane muwari mwa Nabwiya.#7:39 katelane muwari mwa Nabwiya: Ku wonga ambinlene kakale atu omuroromela Yesu. Tempu ili hiyo ila inafwanela atu omuroromela Yesu katelane atu omuroromela Yesu ve, hiya mutela mutu wa unde nari teliwa na mutu wa unde owu olobela eto ahali omuroromela Yesu. Nione Detoronomiyo 7:3; 1 Korinto 9:5; 2 Korinto 6:14. 40Mbwenye miyo dera diing'anemo, muhiyanole ahateliwe akoka, unokana hagalala ulukulu kwaranya hagalala wafuna liye kana ateliwa. Dawongaga eno, nnaona ira nnawonga muwari mokana Munemba wa Mulugu.#7:40 muhiyanole ahateliwe akoka, unokana hagalala ulukulu kwaranya: Tchoira muhiyana umanle ulula eto ulemenle mawendelo a mamunaye wa wanle podi za rutchiwa na mawendelo a mamunaye muxa. Pawulo eto ohowonga ira makwele wa muhiyana akala kanna idadi yapama, inafwanela ateliwe akoka ira aabale ahimaye, agarati vande vaye mopwaseya. (1 Timoteyo 5:14)

Currently Selected:

1 Korinto 7: iLolo

Highlight

Copy