Banndi 8
8
No hakkillo anndiniri hoorem
1Kettindee, hakkillo na nodda,
paamal ina toowna daande mum.
2Hakkillo na tawaa dow gereeji toowɗi ɗakkol laawol,
ingo woni to laawi kawrata.
3Ingo darii ley dammbuɗe huɓeere,
ingo gooyna to gampuuje naaruɗe huɓeere, ingo wi'a:
4— Miɗo nodda on, onon tagaaɓe,
daande am na yaha to neɗɗo fuu.
5Onon ɓe ƴoƴaa, njaɓee caral,
onon fuuyɓe du, ngaɗee paamal.
6Kettindee, sabo wo ko teddi kaalanmi,
hunnduko am ina wurtina ko fonnditii.
7Wo goonga ɗemngal am haalata,
ko boni na nyiddinii yeeso am.
8Haalaaji hunnduko am fuu na ndartii,
oonyaare e fewre fuu ngalaa e majji.
9Ɗi fuu, iɗi ndartanii jom hakkillo,
iɗi laaɓani wooduɓe anndal.
10Njiɗee tindinoore am faa ɓura cardi,
ɓurnee anndal dow kaŋŋe dimo.
11Sabo hakkillo na ɓuri kaaƴe dime,
nder ko muuyetee fuu walaa ko waawi fonndeede e maggo.
12Miin hakkillo, miɗo wondi e anndal ko haani,
miɗo mari paamal e taykagol.
13Hulude Joomiraaɗo woni wanyude bone.
Miɗo wanyi mawnitaare e mantaare
e bonde e haalaaji oonyiiɗi.
14Miin mari tindinoore e dabare lobbere,
paamal e baawɗe ina ngoni to am.
15E am laamiiɓe laamortoo,
ardiiɓe du kiitorto fonnditaare.
16E am ɓiɓɓe laamu ardortoo,
e am tedduɓe du ngaɗirta ko fonnditii.
17Miɗo yiɗi yiɗuɓe kam,
filotooɓe kam njiitan kam.
18To am jawdi e teddeengal ngoni,
miin jeyi barke e jawdi tabitoori.
19Barke am na ɓuri kaŋŋe dimo,
Tino am na ɓuri cardi dimɗundi.
20Miɗo yaha dow laawol dartaare,
dow laawi goongalaaku njaaɓammi.
21Miɗo ronna yiɗuɓe kam jawdi,
miɗo hebbina desirɗe maɓɓe.
22Joomiraaɗo tagii kam illa puɗɗam,
miin woni artuɗo ley golleeji makko illa jamaanuuji ndeen.
23Miɗo woni illa fuɗɗoode,
fadde duuniyaaru tageede miɗo wonnoo.
24Illa luggeefi tagaaka ndimaami,
illa ilduɗe ngalaa, miɗo woni.
25Mi tagaama fadde baamle ɓangineede,
miɗo arti tile waɗeede,
26illa leydi e ladde tagaaka,
illa sollaare fuɗɗaay, miɗo woni.
27Wakkati kammuuli tagetenoo, miɗo woni,
miɗo darii wakkati keeri luggeefi ndiidetenoo.
28Yeeso am o tagi duule e kammu,
o darni diyeele luggiɗinɗe.
29Nde o diidannoo keeri maayo,
heɓa taa ndiyam maggo faltoo ndeen, miɗo tawaa ɗoon.
Nde o daɗɗannoo joƴƴinirɗe leydi, miɗo woni.
30Miɗo wondunoo e makko hono baawɗo nyiɓugol.
Miɗo welna ɓernde makko nyannde fuu,
wakkati fuu miɗo weltoo to makko.
31Adunaaru ndu o tagi na seyoroo ɓernde am,
miɗo weltoo hakkunde ɓiɓɓe-Aadama.
32Joonin, ɓiɓɓe am, kettindanee kam,
barke woodanii jogiiɗo laawi am.
33Kettindanee tindinooje am, de laatoɗon jom'en hakkillo,
taa tottitoɗon ɗe.
34Belɗo hoore woni kettindaniiɗo kam,
jooɗiiɗo dammbugal am nyannde fuu, na heɗii.
35Sabo jiituɗo kam fuu wuuran,
heɓan moƴƴere Joomiraaɗo.
36Ammaa mo heɓaay kam, bonnanii hoore mum,
banyuɗo kam fuu wo maayde yiɗi.
Currently Selected:
Banndi 8: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
