Banndi 6
6
Haala yoɓande goɗɗo nyamaande
1Ɓiyam, si a dekii nyamaande goɗɗo dow maa,
si a waɗii amaana yoɓude nde,
2si hunnduko maa wattii ma e junngo goɗɗo,
si haalaaji maa nanngii ma fu,
3inan ko ngaɗataa faa kisaa,
ngam a saamii nder junngo goɗɗo:
Yahu, leeƴin hoore maa,
ŋaaroɗaa mo o yaafe.
4Haɗu gite maaɗa ɗoyngol,
taa fukka powtaa.
5Reenu hoore maa e tuugol hono foondu,
hono lewla e junngo loohotooɗo.
Haala dow jaayɗo
6Aan jaasuɗo, yahu to mettelli,
ndaara no ɗi ngollirta, ngaɗaa hakkillo.
7Ɗi ngalaa ardiiɗo,
ɗi ngalaa kaananke,
ɗi ngalaa doolɗoowo ɗi ngolla.
8Ammaa iɗi cegiloo nyaamdu majji ƴaamnde,
iɗi kawrina neema majji wakkati tayri.
9Aan jaasuɗo, faa ndeye accataa fukkaade?
Faa ndeye pinataa, aan jiɗɗo ɗoyngol?
10Ɗoyngol seeɗa, ŋoŋugol seeɗa,
piilondirol juuɗe faa fowta,
11waɗan talkaaku e waannde njippoo dow maaɗa,
hono teetoowo naa gujjo.
Haala dow jikku mbonngu
12Bonɗo wo meereejo,
o yahan imo sankita fewre tan.
13Wo maƴƴinoowo gite,
kaaliroowo koyɗe,
capportooɗo kolli,
14ɓernde muuɗum ina oonyii, laaɓaa.
Wakkati fuu ko boni o segiltoo,
imo ummina hamre.
15Saabe majjum, halkere juhan mo.
Wakkati gooto nde halkowan mo, o ummataako fey.
16Kujje jeegom, fay jeɗɗi na nyiddinii yeeso Joomiraaɗo.
Kujje jeegom arane ɗeen ngoni:
17Gite daarirooje yawaare,
hunnduko penoowo,
juuɗe ittooje yonki ɓolum,
18ɓernde segiltoonde dabareeji bonɗi,
koyngal karwantoongal laawol bonngol,
19ceedootooɗo mo fewre hoyi to mum.
Jeɗɗaɓerde ndeen woni: aawoowo hamre hakkunde banndiraaɓe.
Gongingol ɗiɗaɓol dow debbo jaayɗo
20Ɓiyam, joga jamirooje baaba maa,
taa yoppu janngingol inna maa.
21Joga ɗe ley ɓernde maa wakkati fuu,
haɓɓu ɗe e daande maa.
22Ɗe ɗowete ley yaadu maa,
ɗe ndeenete ley ɗoyngol maa,
si a finii, ɗe tindinte.
23Sabo jamirooje wo lampal,
janngingol wo jayngol,
eeltugol du wo laawol nguurndam.
24Ngol reenete e debbo bonɗo,
ngol woɗɗinte haalaaji eytooji ɗi debbo goɗɗo (pijoowo).
25Taa muuye mo saabe ŋari makko,
taa jaɓu o hiilire maƴƴugol gite makko,
26ngam woykuuru waɗan laatoɗaa hono heltere buuru,
debbo pijoowo wo yonki maa pay loohotoo.
27Yalla si neɗɗo wattii yiite ley jiiba mum,
kolte mum mbulataa naa?
28Si neɗɗo yaaɓii pette,
koyɗe mum mbulataa naa?
29Noon ɗum laatorantoo tefoowo dee goɗɗo,
meemuɗo mo fuu hisataa jukkungo.
30Dafaaɗo, de wujji neema faa nyaama, huyfintaake.
31Ammaa si o nanngaama, o yoɓan ɗum nde jeɗɗi,
o hokkan jawdi wuro makko fuu,
32sakko jeenidoowo e dee goɗɗo.
Joomum walaa hoore,
jiɗɗo halkude yonki mum tan waɗata ɗum.
33Piiɗe e huyfineede caaman dow joomum,
semteende joomum mooytataake abada.
34Sabo kiram ɓeydan tikkere goro debbo oon,
wakkati o yomnitotoo ndeen, yurmeende walaa.
35Walaa ko o hokketee faa sura mo,
fay dokke ɗuuɗɗe keƴataa.
Currently Selected:
Banndi 6: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
