Banndi 4
4
Tindinooje baabiiwo
1Ɓiɓɓe am, kettindee tindinoore baaba mooɗon,
Omtee noppi mon, keɓon caral.
2Sabo wo ekintinol lobbol kokkanmi on.
Taa njoppee janngingol am.
3Miin du, mi laatanakeno baaba am ɓiɗɗo,
inna am du ina horsinnoo kam.
4Ndeen baaba am janngini kam, wi'i:
— Tiiga haalaaji am ley ɓernde maa,
njogoɗaa jamirooje am heɓa mbuuraa.
5Heɓu hakkillo, heɓu paamal,
taa yeggitin haalaaji am,
taa tottita ko ƴuuri e hunnduko am.
6Taa yeeba hakkillo. Ngo haybete.
Yiɗu ngo, de ngo reenete.
7Heɓude hakkillo ɓuri huunde fuu,
heɓu hakkillo.
Ko keɓataa fuu, tinnoɗaa e heɓde paamal.
8Korsinaa hakkillo faa wooɗa, ndeen ngo mawninte,
si a wuundake ngo, ngo teddinte.
9Hakkillo wattan kufune darja dow hoore maa,
ngo mellete lefol teddeengal.
10Ɓiyam, hettina, jaɓu haalaaji am,
heɓa balɗe maa njuuta.
11Laawol hakkillo jannginmaami,
dow guurti dartaare ɗowumaami.
12Koyɗe maa tonngataako si aɗa yaha,
si a doggii du, a fergataako.
13Joga tindinoore, taa yoofu nde,
nanngu nde faa wooɗa,
sabo kayre woni nguurndam maa.
14Taa jokku laawol bonɓe,
taa wattu koyɗe maa e laawol luttuɓe.
15Taa ɓada ngol fey, selu ngol,
mboɗɗoɗaa ngol, njokkaa laawol feere!
16Ɓe ɗaanataako si ɓe ngaɗaay ko boni,
ɓe ŋoŋataa si ɓe ngaɗaay goɗɗo fergii.
17Ngam bonde tan haarnata ɓe,
toonyaade tan ɗomɗitata ɓe.
18Ammaa laawol fonnditiiɓe na nanndi e pooyngol,
ingol ɓeydoo yaynude faa hakkunde nyalooma.
19Laawol bonɓe na nanndi e nimre ɓaleere tik,
ɓe nji'ataa ko ferginta ɓe.
20Ɓiyam, hakkilan haalaaji am,
omtu noppi maa faa kettindoɗaa konngi am.
21Taa jaɓu ɗi mboɗɗoo gite maa,
joga ɗi ley ɓernde maa.
22Tiigiiɗo ɗi fuu heɓan nguurndam,
ɗi laatanto ɓanndu joomum cellal.
23Reenu ɓernde maa faa ɓura huunde fuu,
sabo ley mayre laawi nguurndam ƴuurata.
24Woɗɗin hunnduko maa e oonyaare,
ɗemngal maa du e haalaaji laaliiɗi.
25Ɓantu gite maa ƴeewaa yeeso maa,
taa gite maa ndaara nano naa nyaamo.
26Hakkil e laawol ngol njokkataa,
ndeen laawi maa fuu ngasan.
27Taa wosora nano naa nyaamo,
woɗɗin koyɗe maa e bone.
Currently Selected:
Banndi 4: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
