Banndi 3
3
Hoolaade Laamɗo
1Ɓiyam, taa yeggitin tindinooje am,
joga jamirooje am ley ɓernde maa.
2Ɗe njuunnan nguurndam maa duuɓi keewɗi,
a heɓan jam ley nguurndam maa.
3Taa jaɓu hinney e hoolaare mboɗɗe.
Ɓilu ɗum e daande maa,
winndu ɗum dow alluwal ɓernde maa.
4Ndeen, a heɓan jaɓeede e innde gasunde,
yeeso Laamɗo e yimɓe.
5Hoola Joomiraaɗo e ɓernde maa fuu,
taa nyoƴƴaa dow paamal maa.
6Miccita Joomiraaɗo nder ko ngaɗataa fuu,
ndeen o dartinan laawi maa.
7Taa ndaaru hoore maa wo a jom hakkillo,
ammaa hulu Joomiraaɗo,
de mboɗɗoɗaa ko boni.
8Ndeen ɓanndu maa sellan,
ƴi'e maa du cemmbiɗan.
9Teddinir Joomiraaɗo jawdi maa,
sakkan mo ko ɓuri wooɗude nder tayri maa.
10Ndeen beembe maa keewan pet,
tummbuɗe maa du keewan faa ina ndufa.
11Ɓiyam, taa yawu eeltol Joomiraaɗo,
taa ɓernu si o felii ma.
12Sabo mo Joomiraaɗo yiɗi oon felata,
hono no baaba jiɗɗo ɓiyum warrata noon.
Haala nafaa hakkillo
13Keɓuɗo hakkillo e paamal,
kam barke woodanii.
14Sabo heɓude hakkillo na ɓuri heɓude cardi,
tino maggo na ɓuri kaŋŋe.
15Hakkillo na ɓuri kaaƴe dime,
ko muuyetee fuu waawaa fonndeede e maggo.
16Balɗe keewɗe na tawaa e nyaamo maggo,
jawdi e teddeengal du e nano maggo.
17Laabi hakkillo na ngasi,
to ngo wardi fuu, wo jam.
18Keɓuɗo ngo heɓii lekki nguurndam,
jogiiɗo ngo inndirte jom barke.
19Joomiraaɗo tagirii adunaaru e hakkillo,
o weƴƴitiri kammu e paamal.
20Anndal makko wurtini diyeele e leydi,
waɗi duule njippini saawandere.
21Ɓiyam, joga dabare lobbere e taykagol,
taa jaɓu ɗum woɗɗoo e gite maa.
22Kanjum wuurnata yonki maa,
ɗum laatante koɗol e daande maa.
23Ndeen a jokkan laawol maa e jam,
koyngal maa du fergataako.
24A fukkoto, a hulataa,
a ɗaanoto ɗoyngol mbelngol.
25Ko hulɓinii juhataa ma,
a hulataa halkere waroore dow bonɓe.
26Sabo Joomiraaɗo woni mo kooliɗaa,
o jaɓataa koyɗe maa caama nder tuugol.
No neɗɗo wondirta e gondo mum
27Taa sala wallude haajaaɓe walleede,
si junngo maa na woodi baawɗe majjum.
28Si aɗa woodi baawɗe waɗude huunde fu,
taa wi'u neɗɗo: «accu faa jaango de mi hokke.»
29Taa anniya waɗude gondo maa ko boni,
tawee imo jooɗodii e maaɗa e jam, imo hoolii ma.
30Taa habdu e neɗɗo ɓolum,
tawee toonyaaki ma.
No jom hakkillo wuurdata
31Taa jaɓu toonyotooɓe beege,
taa jokku laawol maɓɓe fay gootol.
32Sabo oonyiiɓe ina nyiddinii yeeso Joomiraaɗo,
ammaa imo holla dartiiɓe sirriiji makko.
33Kuddi Joomiraaɗo na woni dow wuro bonɓe,
de imo barkina wuro fonnditiiɓe.
34Imo jalnoroo jalnortooɓe mo,
ammaa imo moƴƴani leeƴinkiniiɓe.
35Teddeengal na woodani jom'en hakkillo,
de fuuyɓe kaa, semteende woni baka muɓɓen.
Currently Selected:
Banndi 3: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
