Banndi 11
11
1Etirde nde fotaay na nyiddinii yeeso Joomiraaɗo,
de etirde fotunde kaa na weli mo.
2Mawnitaare rimata semteende,
leeƴinkinaare du hakkillo.
3Dartaare ɗowata goongalaaɓe,
jammbotooɓe du, jammba halkan ɗum'en.
4Jawdi nafataa nyannde kiite,
fonnditaare kam hisinta yonki e maayde.
5Dartaare goongalaaɓe moƴƴinan laawol muɓɓen,
bonɗo kaa saamiran bone muuɗum.
6Dartaare teetinan yonki dartiiɗo,
jammbotooɓe kaa, muuyɗe muɓɓen liɓan ɗum'en.
7Nde bonɗo maayii fu, jikke mum timmii,
hoolaare baawɗe muuɗum du halkan.
8Ponnditiiɗo hisan ɓillaare,
de bonɗo kaa, saaman ley toon.
9Haala bonɗo na bonna neɗɗo,
de ponnditiiɗo kaa, anndal muuɗum hisinan ɗum.
10Si fonnditiiɓe keɓii fu, huɓeere seyoto,
de peekaali seyo nanete si bonɓe kalkii.
11Huɓeere teddinirte saabe barke dartiiɓe,
kunnduɗe bonɓe kam'en cankitata nde.
12Pamɗinoowo goɗɗo wo puuyɗo,
gooduɗo anndal kaa, na deƴƴinoo.
13Nyo'oowo woɓɓe na suurta suuraare,
koolniiɗo kaa, na nannga hunnduko mum.
14Rafi ardagol gasungol na liɓa leydi,
de tindinooɓe heewɓe ina njaara ndi yeeso.
15Dekuɗo hoorem nyamaande janano, yi'an torra majjum,
ammaa caliiɗo waɗude noon reenan hoore mum.
16Debbo lobbo heɓan teddeengal,
nyannguɓe kaa wo jawdi teetata.
17Moƴƴuɗo nafii hoore mum,
toonyiiɗo du fooɗanan hoorem bone.
18Bonɗo heɓataana jawdi fewreeri,
de aawɗo fonnditaare heɓan mbarjaari goongalaari.
19Jokkuɗo fonnditaare wuuran,
de jokkuɗo bonde kaa maayan.
20Jom'en ɓerɗe oonyiiɗe na nyiddinii yeeso Joomiraaɗo,
de jom'en ɓerɗe laaɓɗe, kam'en o welnanta.
21Sikke walaa, bonɗo hiitete,
ammaa dartiiɓe kaa kisan.
22E ɗume debbo ŋarɗuɗo mo walaa yaage nanndi?
Hootonnde kaŋŋe dow hinere ngiroowu.
23Ko fonnditiiɓe njiɗi wo ko wooɗi,
de bonɓe kaa, tikkere tan hewtoto ɗum'en.
24Goɗɗo na feccira jawdi mum, de ndi ɓeydoo,
goɗɗo du na yoorida e mayri, de ndi ɓuytoo.
25Barkinoowo, barkinte,
ɗomɗintinoowo, ɗomɗintinte.
26Ommbooɓe beembe muɓɓen faa nde coggu tiiɗii, yimɓe kuɗan ɗum'en,
ammaa barke woodanii sonnooɓe ndi.
27Pilotooɗo ko wooɗi, heɓan moƴƴere,
pooɗantooɗo bone, bone saaman dow muuɗum.
28Kooliiɗo jawdi mum halkan,
ponnditiiɗo kaa, wilitan hono haako hecco.
29Pooɗoowo bone dow ɓaade mum hettan henndu,
puuyɗo du laatoto maccuɗo jom'en hakkillo.
30Gaɗe ponnditiiɗo, wo ɓikkoy lekki kokkoohi nguurndam,
keɓoowo ɓerɗe yimɓe du na woodi hakkillo.
31Ponnditiiɗo ina heɓa barjaari mum ley duuniyaaru,
sakko bonɗo e jom hakke.
Currently Selected:
Banndi 11: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
