Maroma 8

1Dichi dinu, antu ekala mudi Kristu Yesu hikwekala kuyihisha namuloŋaku. 2Muloŋa lushimbi lwaSpiritu lwawumi wekala mudi Kristu Yesu, lunaŋamwini dehi kulushimbi lwanshidi nakufwa. 3Muloŋa nshimbi chiakaŋenyi nanochu chijazeyeli hansaŋu yachisemwa chaheseki, Nzambi hakutemesha Mwanindi yomweni akadifwani namuntu wachisemwa chanshidi, akekali himulambu wahanshidi, akatanyishi nachu nshidi muchisemwa chaheseki. 4Kulonda mwaloŋela nshimbi mulumbuluki mudetu twabulana kwenda mwaya chisemwa chaheseki, chiŋa mwaya Spiritu. 5Muloŋa antu endaŋa mwaya chisemwa chaheseki atoŋojokaŋaa yuma yachisemwa chaheseki. Antu endaŋa mwaya Spiritu atoŋojokaŋaa yuma yaSpiritu. 6Yitoŋojoka yachisemwa chaheseki hikufwa, ilaŋa yitoŋojoka yaSpiritu hiwumi nikuwunda. 7Muloŋa vitoŋojoka yachisemwa chaheseki yekala nawulumbu naNzambi; hiyovwahilaŋa nshimbi jaNzambuku, hela kutweshamu nehi. 8Antu achisemwa chaheseki hiyakutwesha kutiyisha Nzambi kuwahaku.

9Neyi Spiritu yaNzambi washakama mudenu, komana mudi aSpiritu, himudi achisemwa chahesekuku. Neyi muntu wabula Spiritu yaKristu, himuntu winduku. 10Neyi Kristu wekala mudenu, mujimba wafwa dehi hansaŋu yanshidi; hakwila spiritu nahandi hansaŋu yakuloŋa. 11Neyi Spiritu yayenowu wasaŋwili Yesu mudi afu washakama mudenu, yena wasaŋwili Kristu Yesu mudi afu wukuhandisha nawa ninyijimba yenu yakufwa, naSpiritu yindi washakama mudenu.

12Nochu dinu, enu ana kwetu, hitukweti mukudi wachisemwa chaheseki mwaka twendi mwaya chisemwa chahesekuku. 13Muloŋa neyi mukwenda mwaya chisemwa chaheseki, mukufwa; ilaŋa neyi mukufwisha nyidimu yachisemwa chaheseki naSpiritu, mukuhanda. 14Muloŋa antu ejima alombola ŋawu kudi Spiritu yaNzambi, diwu anyana kaNzambi. 15Muloŋa himwatambwili spiritu yawuduŋu mwaka mutiyi cheŋi womaku; mwatambwili spiritu yakwikala anyana, yowu twatambikaŋa nachu netu, Aba, Tata! 16Yomweni Spiritu washimunaŋa wunsahu hamu naspiritu yetu, nindi muyanyana kaNzambi. 17Neyi tuyanyana komana tudi answana; answana aNzambi akuswana chimu naKristu, neyi tukumona nindi makabi, kulonda akatulemeshi chimu nindi nawa.

18Nafu ukuli nami makabi akatataka hiyanateli kweseka nakulema kwamba kamwekana kudetuku. 19Kuleŋa kwejima kwachiŋililaŋa nakudihudika chamba kamwekana anyana kaNzambi. 20Muloŋa kuleŋa kwejima chi kwelili kwakuhemesha, hichakudikeŋelaku, chiŋa mwomwaya muchima wanowu wakwilili chochochu nakuchiŋeja. 21Kulonda kuleŋa kwakweni kufumi muwuduŋu wakutoka kwiŋili muwaana wawanyana kaNzambi wowu waana walema. 22Tuneluki netu kuleŋa kwejima kwa abaŋa nakufunyisha hamu, nikulelu. 23Hidimu hohu bweŋuku, ninetu aweni, tukweti nyikabu yatachi yaSpiritu, twaabaŋa munyichima yetu nawa, nakuchiŋilila chitwakela anyana chikupu, kwokukuula kwamba kakúulawu nyijimba yetu. 24Tunahandili kuchiŋeja; ilaŋa kuchiŋeja chuma chakumona dehi hikuchiŋejaku. Hinyi wachiŋejaŋa chuma chamonayi dehi? 25Ilaŋa neyi twachiŋejaŋa chuma chakubula kumona, henohu dinu tukutatakena nakuchichiŋilila.

26Mwomumu nawa niSpiritu watukwashaŋa hitwazeyazeyaloŋa; muloŋa hituneluki mutwadi kulombaku, ilaŋa Spiritu yomweni watulembelelaŋa nakwaba kwakweni kwakaŋanya kushimuna. 27Niyena washinshikaŋa munyichima yawantu, neluki mwatoŋojokaŋayi Spiritu, muloŋa walembelelaŋa akwakujila mwaya muchima waNzambi.

28Tuneluki netu yuma yejima yakaiakelaŋa hamu, nakuletela antu akeŋa Nzambi kuwaha, wowu atambikiliyi mwafuukwiliyi dehi. 29Muloŋa antu asambili laŋayi dehi kwiluka, wayikunjikila ŋahu dehi nawa, nindi abalumuki kwikala neyi chekalayi Mwanindi; kulonda yena akekali wedi mukachi kawana kwindi amavulu. 30Awa asambili laŋayi dehi kukunjika, wayitambikili nawa; awa atambikiliyi wayibalumwini kwikala aloŋa nawa; awa abalumwiniyi kwikala aloŋa hakuyilemesha nawa.

31Ichi dinu, yumiyi tukwakula netwidi? Neyi Nzambi nekali wetwetu, wukwi kala chilumbu chetu hinyi? 32Yena wabulili kwanakena Mwanindi omweni, hakumuhana hansaŋu jetwetu ejima, abuli kutulunjikila hadi yena yuma yejima makasa ayedi? 33Antu atondayi Nzambi, akuyiholokela kudinyi? Yomweni Nzambi diyi wayibalumunaŋa kwikala aloŋa. 34Akuyihisha kudinyi? Yomweni Kristu Yesu diyi wafwili, eŋa chalala, diyi asaŋwiluwu mudi afu, diyi wekala kuchikasa chaNzambi chachidiilu, diyi watulembelelaŋa nawa. 35Wukutwambula kukukeŋa kwaKristu hinyi? Yihuŋu tahindi? Kumona kukala tahindi? Makabisha tahindi? Nzala tahindi? Wuvu tahindi? Yuma yafwana tahindi? Mpoku yakabali tahindi? 36Chochanasonekuwu nawu, Hansaŋu yeyi atujahaŋa mwaana wonsu, atufuukulaŋa neyi anyikoku ateji kujaha. 37Kwakulehi! Muyuma yejimiyi tunekali akwakwimika mushindu nikubadikamu, naŋovu jayena watukeŋeli. 38Muloŋa neluki chikupu nami hela kufwa, hela wumi, hela aŋelu, hela mawanta, hela yuma yakatataka, hela yuma yamba kenza, hela yuma yikweti Ŋovu, 39hela kuleha kwakwiwulu, hela kukunama, hela chuma chacheŋi chaleŋeluwu chimu, hiyikutwesha kutwambula kukukeŋa kwaNzambi kwekala mudi Kristu Yesu, Mwanta wetuku.

Currently Selected:

Maroma 8: MW62

Highlight

Copy