Fuɗɗoode 47

1Yusufu yahi bati Firawna wi'i: Mawniraaɓe am e baaba am warii diga leydi Kanaana. Ɓe garii e baali maɓɓe, e be'i maɓɓe, e na'i maɓɓe, e ko ɓe goodi fu. Ɓe na'on jooɗii der leydi Gosan. 2Yusufu etti himɓe joyo, caka mawniraaɓe mum, yaari ɓe to Firawna. 3Firawna wi'i mawniraaɓe Yusufu ɓen: Ume woni golle mon? Ɓe toontii mo ɓe bi'i: Menen maccuɓe maa, men laati nun durooɓe baali hande no baabiraaɓe amen. 4Ɓe bi'i mo kade: Men garu nun men jooɗoo leydi ɗoo, gam durande walaa kade der leydi Kanaana, gam mareefuuji amen, gam rafo sattii sanne. Jooni, men eelete nun, accu men jooɗoo der leydi Gosan. 5Firawna wi'i Yusufu: Baaba maa e mawniraaɓe maa wartii to maa. 6Nani leydi Misira fu der juuɗe maa. Joonnu baaba maa e mawniraaɓe maa der nokkuure ɓurune wooɗugo der leydi Misira fu. Accu ɓe jooɗoo der leydi Gosan. To aa anni bo waawuɓe durande na'on caka maɓɓe, halfin ɓe mareefuuji am.

7Ɓaawo mum, Yusufu waddi baaba mum Yaakuubu to Firawna, holli mo. Ɗon nun Yaakuubu barkiɗini Firawna. 8Firawna ƴami Yaakuubu wi'i: Duuɓi noy nun gooduɗaa? 9Yaakuubu toontii mo wi'i: Duuɓi am ɗi goodumi diga dimaami waɗii duuɓi hewre e laso e sappo (130). Mi woosoto nun bo hande no baabiraaɓe am woosortonoo. Duuɓi am ɗuuɗay, amma daɗey der bone nun gonumi, gam ɗi jottaaki duuɓi baabiraaɓe am. 10Yaakuubu barkiɗini kade Firawna, go ɓe burtii ɓe jawti. 11Yusufu joonni baaba mum e mawniraaɓe mum der leydi Ramusesi to ɓuri wooɗugo der leydi Misira, hande no Firawna batirnoo mo. 12Yusufu hokki baaba mum, e himɓe mum, e mawniraaɓe mum fu nafa jaka no ɗuuggo maɓɓe foti.

No Yusufu golliri wakkati rafo satti

13Jooni kan, nafa heennyii der leydi Misira fu. Rafo mawnii der leydi Misira e Kanaana fu. Himɓe e maaya gam sabbu rafo. 14Himɓe leydi Misira e leydi Kanaana soodidirii ceede mum fu alkamaari to Yusufu. O yesi ceede ɗen der wuro Firawna. 15No ceede leydi Misira e leydi Kanaana fu heennyi, himɓe leydi Misira wari to Yusufu ɓe bi'i mo: Hokku men nafa men nyaama, gam ume daarataa men emen maaya rafo gam sabbu ceede amen heennyii? 16Yusufu wi'i ɓe: To on galaa ceede, kokkee am mareefuuji mon, den mum mi hokka on nafa. 17Ɓe gaddani Yusufu pucci maɓɓe e baali maɓɓe, e na'i maɓɓe, e babbi maɓɓe. Go Yusufu hokki ɓe nafa. Non non o waɗirani ɓe batta nafa e mareefuuji maɓɓe der duuɓol ŋol fu.

18No duuɓol ŋol yawti, ɓe bittoy kade to Yusufu ɓe bi'i: Menen maccuɓe maa, men cuuɗataa maa goɗɗum. Ceede amen heennyii, men kokkidii maa bo mareefuuji amen. Men koddoraaki fu goɗɗum sey ɓalli amen e gese amen tan. 19Taa accu men kalka menen e leydi amen, aa daara. Soodu men, menen e leydi amen fu, den kokkaa men nafa, men laatoo maccuɓe Firawna, leydi amen bo laatanoo mo. Hokku men aawdiiri men aawa gam men keɓa ko men nyaamata, to men maayu, leydi amen fu laatoo bille. 20Yusufu soodani Firawna gese leydi Misira fu. Himɓe leydi Misira fu sippi leydi mum, gam sabbu rafo mawnii. Leydi nin fu laatanii Firawna. 21Yusufu yesi himɓe der nokkuuje feere feere der leydi Misira fu ɓe laatoo maccuɓe. 22Amma gese *liimaamiiɓe kan soodaaka, gam Firawna yesanii ɓe sariya ɓe kokkee nafa ka ɓe nyaamata. Gam sabbu sariya kan, kamɓe ɓee goodi ko ɓe nyaamata, kan acci ɓe cippay gese maɓɓe. 23Yusufu wi'i himɓe Misira: Diga hanne, mi soodii on onon e gese mon fu, gam laatoɗon maccuɓe Firawna. Mi hokkan on aawdiiri aawon der gese mon ɗen. 24Amma to on duggii, joowon nafa kan joowe joy. Kokkon Firawna joowere mum woore. Etton joowe naay koriiɗe, gam keɓon ko aawoton gese mon e ko nyaamoton onon e himɓe wuro mon fu. 25Ɓe bi'i: Yonkiiji amen daɗii gam sabbu moƴƴere ne gaɗanɗaa men. Jooni, men laatoto maccuɓe Firawna. 26Non non Yusufu yesiri sariya der leydi Misira diga nyanne mum faa warugo hanne. Sariya kan wi'i: Demuɗo der leydi Misira fu, joowa ko ruggi fu joowe joy, hokka Firawna joowere mum woore. Sey gese *liimaamiiɓe tan nun woni Firawna jeytay.

Ko Yaakuubu yiɗi waɗaneego to maayii.

27Yaakuubu, noddeteeɗo kade Isira'iila e himɓe mum jooɗii der leydi Misira, der ladde Gosan. Ɓe keɓi jawdi, ɓe dimi ɓe ɗuuɗi. 28Yaakuubu jooɗii duuɓi sappo e jeeɗiɗi der leydi Misira. Duuɓi makko o waɗi fu waɗii duuɓi hewre e lasoy ɗiɗi e jeeɗiɗi (147). 29No Isira'iila faanii maayugo, o noddi Yusufu ɓiyiiko, o wi'i mo: Mi eelete nun, gaɗanaa am moƴƴere, gattaa juunŋo maa hakkune asaale am. Kunanoɗaa am a waɗanan am ko ƴamu maa mi fu, a uwataa am der leydi Misira ɗoo. 30To mi maayii tawoymi kookiraaɓe am, ettaa am burtinaa leydi Misira, jahaa uwaa am der yanaane kookiraaɓe am, der leydi Kanaana. Yusufu toontii wi'i: Mi waɗan hande no batuɗaa. 31Yaakuubu wi'i: Hunanan ka, Yusufu hunanii mo. Ɓaawo mum Yaakuubu jiccii dow hoore banni mum, o yetti Alla.

Currently Selected:

Fuɗɗoode 47: BFB

Highlight

Copy