Fuɗɗoode 31
31
1Yaakuubu nani sukaaɓe Labani e wi'a: Yaakuubu teetidii jawdi baaba men, go o laatii joom jawdi. 2Yaakuubu yi'i bo no Labani daaray mo kade hande no arande. 3Ɗon nun Alla Joomiraawo wi'i Yaakuubu: Wittu e leydi baabiraaɓe maa to dimaɗaa, mi wondan e maa. 4Yaakuubu lili o noddanee Rahiilu e Leya ɓe gara e ladde to o durata. 5O wi'i ɓe: Mi faamii no baaba mon daaray am kade hande no arande. Amma Alla Joomiraawo baaba am e wondi e am. 6Onon e ko'e mon, oon anni no mi gollanake baaba mon e semme am fu. 7Amma enon fu, baaba mon dartii jammaago am. O wayliti joddi am faa de sappo. Amma Alla nootaaki o waɗanammi ko halli. 8To o wi'i: Malleeji nun laatotoo joddi maa, baali ɗin fu riman nun malleeji, to o wi'ii bo norɗi nun laatotoo joddi maa, baali ɗin fu riman nun norɗi. 9Alla teetii hoggo baaba mon, hokkimmi ŋo.
10Wakkati mareefuuji ɗin teddata, mi hoyɗii. Der koyɗool ŋol, ɓantumi gite, ji'umi gori majji fu e laatii norɗi e malleeji. 11Ɗon nun malaykaajo Alla noddimmi der koyɗool ŋol wi'i: "Yaakuubu"! Nootiimi, bi'umi: Na'am. 12O wi'i: Ɓantu gite maa daaru no ginniiji be'i, e jawdiiji caamooji mareefuuji ɗin fu laati nun malleeji e norɗi, gam mi yi'ii ko Labani waɗani maa fu. 13Min woni Alla cuppitaniiɗo maa faa Beteli, to tigguɗaa hayre, baanjuɗaa ne nebbam, go kaɓɓanɗaa am alkawal. Jooni, umma wurta diga leydi nii ɗo, wittu leydi ni dimaɗaa.
14Rahiilu e Leya toontii mo wi'i: Emen goodi hinaa geɗu, naa bo ko men ronata e wuro baaba amen? 15O daaray men hinaa hande hoɓɓe, gam o sippii men, o nyaami ceede amen. 16Jawdi ni Alla teeti diga to baaba amen laatake ni amen e ni sukaaɓe amen. Jooni, waɗu ko Alla wi'i maa fu.
17Yaakuubu ummii, waɗɗini sukaaɓe mum e rewɓe mum dow jeeloobi. 18O etti jawdi makko fu e hoggo ŋo o heɓi faa Paddan Aramu, o yanti laawol o hooti to Isiyaaku baabiiko faa leydi Kanaana. 19No ɓe jawtata, Rahiilu wujji tooruure baaba mum Labani, noddeteene terafimu, gam wakkati mum, Labani yawtiino taƴoygo leeɓi baali mum. 20Non non Yaakuubu jammorii Labani, o yawti o batay mo. 21O etti ko o woodi fu o doggidi, o ŋabbi maayo noddeteeŋo Efurata, o yawtiri far to waanne Galaadi.
No Labani hewtoroy Yaakuubu
22No Yaakuubu yawti, nyalaane mum tatawre Labani bataa no o doggii. 23Labani etti banniraaɓe mum, ɓe tokki laawol Yaakuubu. Ɓe jahi faa balɗe jeeɗiɗi, go ɓe kewtii mo faa waanne Gileyati. 24Amma Alla baddi Labani der koyɗool jemma, wi'i mo: Accu batugo Yaakuubu gokka.
25Labani hewtii Yaakuubu. Foti Yaakuubu e tiggi bukaaru mum dow waanne Gileyati. Labani e himɓe mum bo wari tiggi bukaaji mum ɗon. 26Ɗon nun Labani ƴami Yaakuubu wi'i: Gam ume gaɗanɗaa am non? Gam ume go jammiɗaa am jawtinoyɗaa sukaaɓe am hande nanŋaaɓe e konu? 27Gam ume doggoyɗaa e suuɗaago? Go jammiɗaa am, a waynaaki am? To a batiino am, mi acceteno jawtaa e belɗum ɓerne, jimi e waɗee, bawɗi e gurumiiji e fiyee. 28A accay mi waynoo sukaaɓe am e taaniraaɓe am, mi wuunooɓe go jawtaa. Gaɗuɗaa hande ŋaaɓiiɗo ni. 29Mii woodi baawɗe waɗango maa kalluɗum. Amma, keenya, Alla Joomiraawo baaba maa wi'immi mi hakkila to mi wi'ee gokka. 30Mii anni, a yawɗi nun kootaa wuro baaba maa, gam aa woodi yurumeene maggo. Amma gam ume nun bujjuɗaa tooruure am?
31Yaakuubu toontii mo wi'i: Mi huluno nun, gam mi annaa naa a teetiran am sukaaɓe maa. 32Amma mo to mum ɗum tawi tooruure maa, joomum waree. Wiɗita gineeji am yeeso himɓe fu, taa yi'ii ko gooduɗaa ɗon fu, ettaa. Nani Yaakuubu annaa no Rahiilu nun wujjoy tooruure nen.
33Labani naati bukaaru Yaakuubu, e bukaaru Leya, e bukaaji Biliha e Jilipa, amma o yi'ay goɗɗum. No o wurtii, o naati bukaaru Rahiilu. 34O wiɗitii, o yiitay. Nani no Rahiilu etti tooruure nen, o wattu ne nun der kirike jeelooba, o jooɗorii. 35Ɗon nun Rahiilu wi'i baaba mum: Taa monnan baaba to mi ummanaaki maa, gam mi jogi nun. Labani wiɗitii bukaaru nun fu, yi'ay tooruure mum.
36Mone waɗi Yaakuubu, o woolani Labani o wi'i: Boofol ŋole gaɗumi, naa bo gacce ɗee gaɗumi go aa tokkimmi e caatal? 37No biɗitiɗaa gineeji suudu am, a tawii ɗon ginewol wuro maa na? Waddu ŋol ɗoo yeeso himɓe am, e yeeso himɓe maa, ɓe ceedanoo en. 38Duuɓi laso (20) nun gaɗumi to maa, diga den mum bo, baala maa, naa bo be'a maa woppay e juunŋo am. Mi nyaamanay maa bo jawdiiri gom e hoggo maa. 39Daɗey mi wartiranay maa mareefu ŋu barooga ladde nyaami, mi yoɓan ŋu nun. To maarefuwel gom wujjaama jemma, naa bo nyalooma, a wi'an nun mi yoɓa ŋel. 40Nyalooma, naaŋe e fiyammi, jemma bo mii nana peewol, mi ɗaanataako gam sabbu durande. 41Duuɓi laso (20) nun gaɗumi to maa. Golliimi duuɓi sappo e naay (14) gam sabbu sukaaɓe maa rewɓe, duuɓi jeego'o bo, durumi baali maa. Enon fu go baylitinɗaa joddi am faa de sappo. 42To hinaa gam sabbu Alla Iburaahiima e diwninoowo baaba am Isiyaaku e wondi e am, a yoofanno am nun juuɗe baanji. Keenya, Alla yi'ii yurumeene am e toora am, go o hiitanii am.
Labani e Yaakuubu haɓɓidontirii alkawal
43Labani toontii Yaakuubu wi'i: Sukaaɓe rewɓe ɗiɗo ɓee ɗo laati nun sukaaɓe am. Sukaaɓe maɓɓe ɓee ɗo bo laati nun taaniraaɓe am. Hoggo baali ŋoo ɗo bo laati nun hoggo baali am. Ko ji'uɗaa ɗoo fu, min nun woodi ɗum. Amma hanne, ume nun baawanmi waɗango sukaaɓe am rewɓe ɓee ɗoo, e taaniraaɓe am ɓee ɗoo? 44Jooni, war kaɓɓen alkawal, den mum ŋal laatoo seedaaku hakkune am e maa. 45Yaakuubu etti hayre, tiggi ne e nokkuure nen gam waɗugo maane.
46O wi'i banniraaɓe makko: Kawritee kaaƴe. Ɓe kawriti kaaƴe ɓe gaɗi joowere. Ɓaawo mum ɓe nyaami dow joowere nen. 47Labani noddi joowere kaaƴe nen Yegari Saduta. Yaakuubu bo noddi ne Galaadi. 48Labani wi'i: Joowere kaaƴe nee ɗo laatake seedaaku hakkune am e maa, kan acci ne noddaa Galedi. 49Ne nodda bo kade Misipa, gam Labani wi'i: Alla reena moy men fu to en ceedii. 50To a hollii sukaaɓe am bone, naa bo taa ɓaŋii rewɓe woɓɓe kade, tagaaɗo bane hiitantoo en ka, Alla nun hiitantoo en ka, gam mum, hakkil. 51Labani wi'i Yaakuubu: Joowere kaaƴe nee ɗoo, e hayre tiggaane nee ɗoo laatake seedaaku hakkune am e maa. 52Ɗe laatoo seedaaku no mi ƴartataako ɗe mi yaha to maa, mi waɗanee kalluɗum, an bo a ƴartataako ɗe garaa to am, gaɗanaa am kalluɗum. 53To en gaɗii ɗum, Alla Iburaahiima e Alla Nahori, laatiiɗo Alla baaba maɓɓe nun laatotoo kiitantooɗo en ka. Yaakuubu bo hunorii e inne Alla. Yeeso Alla on nun baabiiko Isiyaaku diwni.
54Ɗon nun Yaakuubu waɗani Alla kiiseteeɗi dow waanne, go o noddi banniraaɓe makko ɓe nyaamidi. Ɓaawo mum ɓe baali dow waanne nen.
Currently Selected:
Fuɗɗoode 31: BFB
Highlight
Share
Copy
Want to have your highlights saved across all your devices? Sign up or sign in
Bible Fulfulde Bénin © SIM International 2015, 2024.
