Golle Lilaaɓe 7

Etiyen e waajoo dottiiɓe Yahuduuɓe

1Den hooreejo *Liimaamiiɓe ƴami mo: «Ka ɓe bati, non non ka laatii na?» 2Etiyen toontii, wi'i: «Banniraaɓe e baabiraaɓe, accee hakku, kettinee! Alla tedduɗo holliti hoore mum Iburaahiima no o wonnoo leydi Mesopotamiya, go o yaha o jooɗoo Harani. 3Alla wi'i mo: "Eggu leydi maa accaa saareeji maa, jahaa leydi ni kollan maa mi#7:3 Fuɗɗoode 12:1." 4Den Iburaahiima wurtii leydi Kaldiya, yahi jooɗoy Harani. Ɓaawo maayde baabiiko, Alla egginoy mo diga ton, waddi mo e leydi ni tawaɗon e muuɗum jooni. 5Alla hokkay mo jeyde e leydi nin baa yaaɓande koyŋal, amma o haɓɓanii mo alkawal no ni laatoto halal makko, kanko e lenyol makko, baa no o woodaano suka#7:5 Fuɗɗoode 12:7, 13:15, 17:8. 6Nani ɗo ka Alla wi'i: "Taanirakon maa feran hoota leydi janandi, ɓe laatoo maccuɓe, ɓe tooree faa duuɓi keme naay (400)." 7Amma lenyol ŋol ɗo laatini ɓe maccuɓe, mi hiitoto ŋol. Ɓaawo majjum ɓe burtoto leydi nin, ɓe cujidanammi der nokkuure nee ɗo#7:6-7 Fuɗɗoode 15:13-14, Wurtaago 3:12. 8Den Alla haɓɓidi e Iburaahiima alkawal. Juulnol laatii maane alkawal ŋal. Go Iburaahiima rimi Isiyaaku, juulni mo nyalaane jeetatawre, Isiyaaku juulni Yaakuubu, Yaakuubu bo juulni ɓiɓɓe muuɗum sappo e ɗiɗo (12). Kamɓe laatii kookiraaɓe lenyi Isira'iila sappo e ɗiɗi (12).

9Ɗon kookiraaɓe men ɓen waɗiri Yusufu miiraawo mum nawniraagu, ɓe cippi mo Misira. Amma Alla e wondi e makko, 10o wurtini mo e tooraaji makko fu, o waɗani mo moƴƴere, o hokki mo hakkillo yeeso Firawna, laamiiɗo Misira. Firawna on waɗi mo dawranoowo Misira e saare mum fu. 11Ɗon nun rafo waɗi der Misira e Kanaana fu. Ɓillaare mawni faa kookiraaɓe meeɗen dulli nyaamdu. 12No Yaakuubu nani nyaamdu na'on Misira, o lili ton kookiraaɓe men arande. 13No ɓe jahi ɗiɗawre Yusufu acci rimdaaɓe mum anniti ɗum. Diga ɗon nun Firawna anniti lenyol Yusufu. 14Den Yusufu lili, baaba mum Yaakuubu waddee kanko e saareeji makko fu. Limgal maɓɓe fu waɗan himɓe lasoy tato e sappo e joyo (75). 15Yaakuubu yahi Misira, o maayi ton kanko e kookiraaɓe meeɗen. 16Ɓe kooraa Sikemu, ɓe uwaa der yanaane ne Iburaahiima soodunoo to ɓiɓɓe Hamori der leydi Sikemu.

17No alkawal ŋal Alla haɓɓannoo Iburaahiima ɓattii hebbugo, himɓe meeɗen ɗuuɗi, heewi Misira. 18Wakkati mum laamiiɗo goɗɗo mo annaano Yusufu laamii leydi Misira. 19Laamiiɗo on ƴoyri lenyol meeɗen, toori kookiraaɓe meeɗen, o dooli ɓe ɓe boppa sukahon maɓɓe keccon kon maaya. 20Der wakkati on nun Muusa rimaa, laatii suka booɗuɗo, pottanɗo Alla. O umminaa lebbi tati e wuro baabiiko. 21No o woppaa, ɓii Firawna debbo hocci mo, o ummini mo hande suka makko. 22Non nun Muusa janŋiri annal Misirankeeɓe fu, o laatii gooduɗo baawɗe der haalaaji e gaɗuuji makko.

23No Muusa waɗi duuɓi lasoy ɗiɗi (40), miilo warani mo o yaha o daara banniraaɓe makko, ɓiɓɓe Isira'iila no woniri. 24O yi'i Misirankeejo e toora gooto maɓɓe, o jaɓani neɗɗo makko, o fiyi Misirankeejo on, o wari. 25Oo miilunoo banniraaɓe makko faaman no Alla nun yiɗi hisingo ɓe diga e makko, amma ɓe paamay. 26Fini mum, o tawi ɗiɗo maɓɓe e haɓa. O yiɗi seennugo ɓe, o wi'i: "Igooɓe am, onon, oon banniraaɓe! Ko waɗi oon kaɓa?" 27Amma tooroowo banniraawo muuɗum yeeƴi Muusa, wi'i: "Moy waɗu maa ardiiɗo naa bo kiitantooɗo men? 28Naa a yiɗu nun warugo am hande no barirɗaa Misirankeejo keenya#7:27-28 Wurtaago 2:14?" 29No Muusa nani haala kan, doggi, yahi leydi Madiyan. O rimi ton ɓiɓɓe worɓe ɗiɗo.

30Duuɓi lasoy ɗiɗi (40) ɓaawo mum, malaykaajo Joomiraawo holliti hoore mum Muusa takkol waanne Sinay der ladde yorne, der nyoomere jaɓoore yiite. 31No Muusa yi'i ɗum, haaynaare nanŋi mo. Oo ɓattoo o daara, den daane Joomiraawo wi'i: 32"Min woni Alla kookiraaɓe maa, Alla Iburaahiima, e Isiyaaku, e Yaakuubu." Muusa darii e diwna, huli daarugo. 33Joomiraawo wi'i mo: "Ɓortu paɗe maa, gam to dariɗaa ɗo laati nun nokkuure seniine. 34Gam mi daarii, mi yi'ii toora himɓe am wonɓe Misira, mi nanii bojji maɓɓe, mi jippake rinɗingo ɓe. Jooni, war, mi lile Misira#7:30-34 Wurtaago 3:1-10."

35Muusa mo ɓe calinoo ɓe bi'i: "Moy waɗu maa ardiiɗo naa kiitantooɗo men?" Kanko Alla lili, waɗi mo ardiiɗo e paabotooɗo, diga e malaykaajo birnitaniiɗo mo der nyoomere. 36Kanko wurtini ɓe, o waɗi haaynaareeji e kaayeefiiji der leydi Misira, e der maayo kewi, e der ladde yorne faa duuɓi lasoy ɗiɗi (40). 37Muusa on bati ɓiɓɓe Isira'iila wi'i: "Alla umminanan on *Annabiijo caka banniraaɓe mooɗon hande am#7:37 Ekkitinooje 18:15." 38Wakkati ɓe kawti der ladde yorne, kanko laatii dariiɗo hakkune kookiraaɓe meeɗen e malaykaajo baddunooɗo mo dow waanne Sinay. Kanko jaɓi haalaaji gurnam, gam o hokka en ɗi.

39Amma kookiraaɓe meeɗen yiɗay nanango mo. Ɓe calii mo, hakkillooji maɓɓe witti Misira, 40ɓe bi'i Haruuna: "Waɗan men tooruuje ardotooɗe en, Muusa burtinɗo en leydi Misira on, en annaa ko waɗi mo#7:40 Wurtaago 32:1, 23." 41Der balɗe ɗen, ɓe gaɗi tooruure nandune e ga'el, ɓe caafi ne, ɓe belbelti sabbu golle ɗe juuɗe maɓɓe waɗi. 42Alla woppi ɓe, acci ɓe ɓe caafa naaŋe e lewru, e koode, hande no winniraa e dewtere annabiiɓe:

"Himɓe Isira'iila!

Duuɓi lasoy ɗiɗi (40) ɗi gaɗuɗon der ladde yorne,

min gaɗanɗon sadakaaji, e kiiseteeɗi na?

43On doonake bukaaru tooruure Moloku#7:43 Moloko woni tooruure Amorinkeeɓe.,

e hoodere tooruure mooɗon Refan#7:43 Refan woni tooruure Finikiyankeeɓe,

tooruuje ɗe gaɗuɗon oon caafa.

Gam mum mi egginan on mi yaara on yeeso Babiila#7:42-43 Amosu 5:25-27."

44Kookiraaɓe meeɗen e woodunoo bukaaru seedaaku der ladde yorne. Muusa waɗii nu hande no Alla batiri mo. O waɗii nu hande no Alla holliri mo nu#7:44 Der bukaaru to Alla fottanno himɓe mum, huune ko seedotoo no Alla haɓɓii alkawal mum e himɓe mum wonoo der mayru hande jon alluwaaje dooka Alla e sawru Haruuna, e maannu daaru Iburaninkeeɓe 9:4.. 45Bukaaru nun non kookiraaɓe meeɗen roni, eggidi e mayru wakkati Yoosuwa ardii ɓe, naanni nu der leydi ni ɓe teeti to lenyi ɗi Alla riiwi yeeso maɓɓe. Ton nu woni faa jaamanu Dawda. 46Dawda heɓii moƴƴere Alla, eeli, heɓa laawol mahana Alla mo Yaakuubu suudu. 47Amma Suleymaanu nun mahani mo ŋol.

48Amma, Alla mo dow jooɗataako der cuuɗi ɗi himɓe mahi, hande no *annabiijo batiri wi'i: Joomiraawo wi'i:

49"Kammu laatii gurol laamorde am,

leydi laatii yesirde koyɗe am.

Suudu ŋole mahanton am?

E nokkuure ney ciwtotoomi? #7:49-50 Esaaya 66:1-2

50Juunŋo am bane tagi kujje ɗee fu na?"

51Etiyen wi'i kade: Onon turtooɓe, ɓe ɓerɗe jorɗe e taaɗuɓe noppi, wakkati fu oon caloo nanango Ruuhu Ceniiɗo. On laati nun hande kookiraaɓe mooɗon. 52*Annabiijo moy woni mo kookiraaɓe mooɗon tooray? Ɓe barii artunooɓe batugo haala garki Gooŋaajo, kanko jammiɗon baruɗon mo jooni. 53Onon nun heɓi *tawreeta Muusa ka malaykaaɓe waddi, go on tokkay ka.»

Maayde Etiyen

54No ɓe nani haalaaji ɗin, mone Etiyen waɗi ɓe faa ɓee kirƴontira nyiiƴe. 55Amma Etiyen hebbi Ruuhu Ceniiɗo, tiggitii dow yi'i tedduŋal Alla, yi'i Yeesu bo e darii nyaamo Alla. 56O wi'i: «Daa, mii yi'a kammu e maɓɓitii, Ɓii neɗɗo e darii nyaamo Alla.»

57Go ɓe fu ɓe kalɓi e semme, ɓe cukki noppi maɓɓe, ɓe ummanii mo, 58ɓe burtini mo siire, go ɓe janti faɗɗugo mo kaaƴe. Ɓe ɓorti gineeji maɓɓe, ɓe deenini ɗi gojankeejo gom bi'eteeɗo Sol. 59No Etiyen faɗɗetee kaaƴe, oo du'oo oo wi'a: «Joomiraawo am Yeesu, jaɓu yonki am!» 60Den o jiccii, o halɓi e semme, o wi'i: «Joomiraawo, taa yowan ɓe hakke ɗee ɗo!» No o bati ka, o maayi.

Currently Selected:

Golle Lilaaɓe 7: BFB

Highlight

Copy