MATIU 8

Kusu werekɔ̃anaa

(Maa 1:40-45; Luk 5:12-16)

1Kũ Yesu kìpa sĩ̀sĩia, pari tɛ́i. 2Akũ kusu ke sù à kùtɛ a arɛ à pì: Dikiri, tó ń yei, ĩni fɔ̃ ǹ ma werekɔ̃a swáswa. 3Yesu ɔ bò à nàa à pì: Má yei. Ǹ gɔ̃ swáswa. Zaa gwe gɔ̃̀nɔ a kusu làka. 4Akũ Yesu pìnɛ: Ǹsun o gbɛ̃ke maro. Ǹ gɛ́ ǹ n zĩda mɔ sa'oriinɛ, ǹ sa'opɔ kũ Musa dìtɛ kpá n werekɔ̃ana sèeda ũ gbɛ̃nɔnɛ.

Sozanɔ gbɛ̃ zɔ̃kɔ̃ zĩkɛri werekɔ̃anaa

(Luk 7:1-10)

5Kũ Yesu tɛn gɛ̃ Kapɛnamu, akũ Romu sozanɔ gbɛ̃ zɔ̃kɔ̃ɔ sù a kĩnaa, a wɛ́ kɛ̀a 6à pì: Dikiri, ma zĩkɛri wútɛna bɛ, à kɔ̃̀nɔ kũ̀, mɛ̀ tɛn ũa manamana. 7Akũ Yesu pìnɛ: Mani gɛ́ mà a werekɔ̃a. 8Akũ gbɛ̃ zɔ̃kɔ̃ɔ pìi pìnɛ: Dikiri, mádi ká ǹ gɛ́ ma bɛaro. Ǹ yã o dé, ma zĩkɛri ni werekɔ̃a. 9Zaakũ makũ se, ò iko vĩ ma musumɛ, akũ má iko vĩ sozanɔa. Madì o ń gbɛ̃ donɛ à gɛ́, àdi gɛ́. Madì o a pãndenɛ à mɔ́, àdi su. Madì o ma zĩkɛriinɛ à adikũ kɛ, akũ àdi kɛ.

10Kũ Yesu yã pìi mà, à bò a sarɛ, akũ à pì gbɛ̃ kũ ò tɛ́inɔnɛ: Yãpuran matɛn oárɛ, mádi le gbɛ̃ke ma náani kɛ̀ lɛ Isarailanɔ tɛ́ro. 11Matɛn oárɛ, gbɛ̃nɔ ni bo ifãboki kpa kũ ifãlɛtɛ kpao dasidasi oni su pɔ́ ble kũ Ibrahĩo kũ Isaakuo kũ Yakubuo kpata kũ à bò Luda kĩnaa gũn. 12Gbɛ̃ kũ ò de yã ògɔ̃ kú kpataa pìi gũnnɔ sɔ̃, oni ń zu bàai gusira gũmmɛ. Gwen oni ɔ́ɔ dɔn ò ɔ di ń mìia. 13Akũ Yesu pì sozanɔ gbɛ̃ zɔ̃kɔ̃ɔ pìinɛ: Ǹ tá bɛ. À kɛnnɛ lákũ n ma náani kɛ̀ nà. Akũ a zĩkɛrii pì gbãna kũ̀ gɔrɔ kũ̀a gɔ̃̀nɔ.

Yesu gyãrenɔ werekɔ̃ana dasidasi

(Maa 1:29-34; Luk 4:38-41)

14Yesu gɛ̀ɛ Pita bɛa, akũ à è a nanɔ da wútɛna, àtɛn mɛ̀wãna kɛ. 15Kũ à ɔ nà a ɔa, akũ a mɛ̀ yĩda kũ̀, akũ à fùtɛ à pɔ́ble kɛ̀nɛ.

16Kũ ɔkɔsi kɛ̀, akũ ò sùnɛ kũ tãnadenɔ dasidasi, akũ à tãna pìnɔ gòḿma kũ yã'onaao, à gyãrenɔ wèrekɔ̃a ń pínki. 17Lɛn yã kũ annabi Isaya òo kɛ̀ lɛ à pì:

À ó gbãnasarikɛ sɛ̀,

à ó gyãnɔ kɛ̃̀wá.

Gbɛ̃ kũ ò ye ò tɛ́ Yesuinɔ

(Luk 9:57-62)

18Kũ Yesu è pari kàkaraai, akũ à pì a ìbanɔnɛ: Ò bikũ sɛ̀bɛɛ bara. 19Akũ ludayãdannɛri ke sù à pì Yesunɛ: Dannɛri, gu kũ ntɛn gɛ́n sĩnda pínki manigɔ̃ tɛ́nyĩ. 20Yesu pìnɛ: Gbɛ̃gbonnɔ ń tò vĩ, bãnɔn ń sà vĩ, Bisãsiri Nɛ́ sɔ̃ à ĩampaki vĩro.

21Akũ ìba pãnde pìnɛ: Dikiri, ǹ tó ari ma de kpágui gĩa. 22Akũ Yesu pìnɛ: Ǹ tɛ́mai. Ǹ tó gɛ̀nɔ ń gɛ̀nɔ vĩ.

Yesu zàga'ĩa zɛnaa

(Maa 4:35-41; Luk 8:22-25)

23Yesu gɛ̃̀ gó'itɛ gũn, akũ a ìbanɔ tɛ̀i ò dà zɛ́n. 24Kãnto zàga'ĩa gbãna kàka sɛ̀bɛla, í tɛn vĩvĩ àtɛn káka ń gón. Yesu tɛn i o, 25akũ a ìbanɔ nài, ò a vù ò pì: Dikiri, ǹ ó sura ba, ótɛn kakatɛmɛ. 26Akũ à pìńnɛ: Ludanaanikĩanadenɔ! À kɛ̀ dera á vĩna vĩ lɛɛ? Akũ à fùtɛ à gì ĩanɛ kũ ío, akũ gu kɛ̀ kítikiti. 27Yã pìi bò gbɛ̃ pìnɔ sarɛ ò pì: Gbɛ̃ kpate taka burin dí? Bee ĩa kũ ío dì a yã mamɛ.

Tãnanɔ gbarɛna alɛdɛnɔa

(Maa 5:1-20; Luk 8:26-39)

28Kũ Yesu bikũ̀ bara dire Gadara bùsun, tãnade gbɛ̃nɔn pla kenɔ bò miranɔ tɛ́, ò sù ò dàalɛ. Ò pãsĩ manamana, gbɛ̃ke dì fɔ̃ à bɔtɛ gwero. 29Ò wiki lɛ̀ ò pì: Bɔ́n ó vĩ kɔ̃ ɔĩ, Luda Nɛ́? N su wɛ́ tãwá la ari a gɔrɔ gɔ̃ kán yá? 30Alɛdɛ kpàsa zɔ̃kɔ̃ kú kũńwo zã̀ dire, òtɛn pɔ́ ble. 31Akũ tãna pìnɔ kútɛ kɛ̀ Yesunɛ ò pì: Tó n pɛ̀wá, ǹ ó gbarɛ alɛdɛ kpàsa dire gũn. 32Akũ Yesu pìńnɛ: À gɛ́. Akũ ò gòḿma ò gɛ̃̀ alɛdɛnɔ gũn. Akũ alɛdɛ kpàsaa pìi wì kũ bàao pínki, ò sòro sĩ̀sĩgororooa, ò sì sɛ̀bɛn, akũ ò gàga í gũn gwe. 33Akũ alɛdɛdãrinɔ bàa lɛ̀ ò gɛ̃̀ wɛ̃tɛ gũn, ò yã pìnɔ bàbańnɛ kũ yã kũ à tãnadenɔ lèeo pínki. 34Akũ wɛ̃tɛdenɔ bɔ̀tɛ ò gɛ̀ɛ da Yesulɛ ń pínki. Kũ ò a è, ò kútɛ kɛ̀nɛ kũ à bońnɛ ń bùsun.

Currently Selected:

MATIU 8: BB2005

Highlight

Copy

Compare