MATIU 7

Kɔ̃ taari'enaa

(Luk 6:37-38, 41-42)

1Àsun gbɛ̃ taari ero, Luda ni á taari e sero. 2Zaakũ lákũ ndì gbɛ̃ taari e nà, lɛn Luda ni n taari e lɛ. Zaka kũ n yɔ̃ońnɛ ani yɔ̃onnɛ. 3Bɔ́yãi ntɛn sɛ̃̀buru kũ à da n gbɛ̃dake wɛ́n ei, akũsɔ̃ ntɛn límukutu kũ à da n wɛ́n yã daroo? 4Kũ límukutu da n wɛ́n, à kɛ̀ dera ĩni pi n gbɛ̃dakenɛ à tó ǹ sɛ̃̀buru kũ à da a wɛ́n bonɛɛ? 5Manafikide! Ǹ límukutu kũ à da n wɛ́n bo gĩa, gbasa ǹ gu e swáswa de ǹ le ǹ sɛ̃̀buru kũ à da n gbɛ̃dake wɛ́n bonɛ.

6Àsun Luda pɔ́ kpá kifirinɔaro,

de òsun ɛra ò á kari kɛro yãi.

Àsun á gbɛ̀ bɛ̀ɛrɛdenɔ zu alɛdɛnɔnɛro,

de òsun táa o'oaro yãi.

Wɛ́kɛnaa

(Luk 11:9-13)

7À wɛ́ kɛ, Luda ni kpááwa. À wɛtɛ, áni le. À gbà lɛ́, Luda ni wɛ̃árɛ. 8Zaakũ gbɛ̃ kũ à wɛ́ kɛ̀ɛn òdi kpáa, gbɛ̃ kũ à wɛ̀tɛ sɔ̃ àdi le, gbɛ̃ kũ à gbàa lɛ̀ɛn oni wɛ̃nɛ. 9Á tɛ́, dí mɛ́ ani gbɛ̀ kpá a nɛ́a, tó à burodi wɛ́ kɛ̀aa? 10Tó à kpɔ̀ wɛ́ kɛ̀a sɔ̃, ani mlɛ̃̀ sɛ́ à kpáa yá? 11Bee kũ á vãnikɛo, á pɔ́ mana kpana á nɛ́nɔa dɔ̃. Oni á De kũ à kú musu pɔ́ mana kpana gbɛ̃ kũ ò wɛ́ kɛ̀anɔa pɔ́ o dɔ yá?

12À kɛ gbɛ̃nɔnɛ lákũ á ye ò kɛárɛ nà. Musa doka kũ annabinɔ yãnɔ mìin gwe.

Zɛ́lɛ kpakoto

(Luk 13:24)

13À zɛ́lɛ kpakoto sɛ́. Zɛ́ kũ a lɛ́ yàasa akũ à mɛ̀poroki vĩ dì gɛ́ kũńwo kakatɛnaa gũmmɛ. Abirekũn pari tɛn sɛ́. 14Zɛ́ kũ àdi gɛ́ kũńwo wɛ̃̀ndii gũn lɛ́ kpakoto à nakɔ̃ana, akũsɔ̃ gbɛ̃ kũ ò lè ò sɛ́nɔn dasiro.

Gbɛ̃ dɔ̃na a yãkɛnaaa

(Luk 6:43-44; 13:25-27)

15À laakari kɛ annabi ɛ́kɛnɔi. Òdi su á kĩnaa kũ sã bárao dana, ama lɛwanna nàdɛrinɔmɛ ń ũ. 16Áni ń dɔ̃ ń yãkɛnaaa. Òdi geepi bo lɛ̀ líaro. Òdi kaka e babare láaro. 17Lí mana dì nɛ́ nna i, lí vãni dì nɛ́ gina i. 18Lí mana dì fɔ̃ à nɛ́ ginaa ìro, lí vãni dì fɔ̃ à nɛ́ nna ìro. 19Òdi lí kũ àdi nɛ́ mana iro zɔ̃ ò zu tɛ́ gũmmɛ. 20Lɛmɛ áni ń dɔ̃ ń yãkɛnaaa lɛ.

21Adi kɛ gbɛ̃ kũ àdigɔ̃ ma sísi Dikiri, Dikiri, mɛ́ ani gɛ̃ kpata kũ à bò Luda kĩnaa gũnlo, sé gbɛ̃ kũ àdi ma De kũ à kú musu pɔyenyĩna kɛɛ. 22Yãkpatɛkɛgɔrɔ zĩ pari ni pimɛnɛ: Dikiri, Dikiri, o Luda yã òńnɛ kũ n tɔ́o bi! O tãnanɔ gòḿma kũ n tɔ́o bi! O daboyãnɔ kɛ̀ dasi kũ n tɔ́o bi! 23Mani pińnɛ súsu: Má á dɔ̃ zikiro. À gomala yãvãnikɛrinɔ!

Kpɛ́bori gbɛ̃nɔn planɔ

(Luk 6:47-49)

24Abire yãi gbɛ̃ kũ à ma yã dínɔ mà, akũ à zĩ kɛ̀a de lán gbɛ̃ laakaride kũ à a kpɛ́ bò gbɛ̀ɛa bàmɛ. 25Kũ legũ mà, í dàgula, ĩa kàka à sù kpɛ́ pìia, akũ adi lɛ́tɛro, kũ ò a ɛ̃ pɛ̀tɛ gbɛ̀ɛa yãi. 26Gbɛ̃ kũ à ma yã dínɔ mà, akũ adi zĩ kɛaro de lán mìsaride kũ à a kpɛ́ bò bùsu'atɛ̃a bàmɛ. 27Kũ legũ mà, í dàgula, ĩa kàka à sù kpɛ́ pìia, akũ à gbòro à lɛ̀tɛ gbìrim.

Yesu ikoo

28Kũ Yesu yã birenɔ ò à làka, a yãdannɛnaa bò pari sarɛ, 29zaakũ adi yã dańnɛ lán ludayãdannɛrinɔ bàro, à dàńnɛ kũ ikoomɛ.

Currently Selected:

MATIU 7: BB2005

Highlight

Copy

Compare