MATIU 5

Arubarikadenɔmɛ Yesu ìbanɔ ũ

(Luk 6:20-23)

1Kũ Yesu pari pìnɔ è, à dìdi sĩ̀sĩia. Kũ à vùtɛ, a ìbanɔ sù a kĩnaa, 2akũ à nà yãdannɛnaaa à pì:

3Arubarikadenɔmɛ gbɛ̃ kũ ò ń kĩana dɔ̃nɔ ũ,

zaakũ kpata kũ à bò Luda kĩnaa de ń pɔ́ ũ.

4Arubarikadenɔmɛ pɔsiradenɔ ũ,

zaakũ Luda ni ń laakari kpátɛńnɛ.

5Arubarikadenɔmɛ zĩdabusarinɔ ũ,

zaakũ mɔ́kɔ̃nɔ mɛ́ onigɔ̃ andunia vĩ.

6Arubarikadenɔmɛ yãzɛde nidɛrinɔ ũ,

zaakũ mɔ́kɔ̃nɔ mɛ́ oni kã.

7Arubarikadenɔmɛ wɛ̃ndadɔ̃nnɛrinɔ ũ,

zaakũ Luda ni ń wɛ̃nda dɔ̃.

8Arubarikadenɔmɛ nɛ̀sɛpuradenɔ ũ,

zaakũ mɔ́kɔ̃nɔ mɛ́ oni wɛ́ si Ludalɛ.

9Arubarikadenɔmɛ ibɛrɛmidɛrinɔ ũ,

zaakũ oni ń sísi Luda nɛ́nɔ.

10Arubarikadenɔmɛ gbɛ̃ kũ òdi wari dɔḿma ń yãmanakɛna yãinɔ ũ,

zaakũ kpata kũ à bò Luda kĩnaa de ń pɔ́ ũ.

11Arubarikadenɔmɛ á ũ,

tó ò á sɔ̃sɔ̃, tó ò wari dɔ̀áwa,

tó ò yã vãni sĩnda pínki dìáwa ma yãi.

12À pɔnna kɛ à yáa dɔ, zaakũ á láada zɔ̃kɔ̃ ludambɛ. Lɛn ò wari dɔ̀ annabi kũ ò kú á ãnɔa lɛ.

Yesu ìbanɔmɛ wisi ũ kũ gupurao

(Maa 9:50; Luk 14:34-35)

13Ákɔ̃nɔ mɛ́ á wisi ũ andunianɛ. Tó wisi i nna tà, deran oni kɛ nà à gɔ̃ wisi ũ dɔɔ? À àre ke vĩ doro, séde ò kɔ́tɛ gbɛ̃nɔ táa oa.

14Ákɔ̃nɔ mɛ́ á gupura ũ andunianɛ. Wɛ̃tɛ kũ ò kàtɛ sĩ̀sĩi musu dì fɔ̃ àgɔ̃ utɛnaro. 15Òdi fitila na ò gbaka kútɛaro. Òdi a di a dibɔɔ musumɛ, de à gu pu gbɛ̃ kũ ò kú ɔnnnɔnɛ. 16À gu pu gbɛ̃nɔnɛ lɛ, de ò á yãmanakɛnanɔ e ò á De kũ à kú musu tɔ́ kpá.

Musa doka bɔkɔtɛnaa

17Àsungɔ̃ da ma su Musa doka kũ annabinɔ yãnɔ gboronlo. Mádi su gbororo, ma su de mà papamɛ. 18Yãpuran matɛn oárɛ, ludambɛ kũ zĩtɛo ni gɛ̃tɛ, ama doka pì wãnzãn fítinle ke a pɔ́ kete ke ni gɛ̃tɛro, yã sĩnda pínki ni kɛ. 19Abire yãi tó gbɛ̃ gì yã kũ ò dìtɛ pìnɔ dokei, bee a kũ à kĩ̀ańyĩ, tó àdi da gbɛ̃nɔnɛ ò kɛ lɛ, ade nigɔ̃ kĩańyĩ kpata kũ à bò Luda kĩnaa gbɛ̃nɔ tɛ́mɛ. Tó gbɛ̃ kũna, tó àdi dańnɛ lɛ sɔ̃, ade nigɔ̃ zɔ̃kɔ̃ kpata kũ à bò Luda kĩnaa gbɛ̃nɔ tɛ́. 20Matɛn oárɛ, tó á yãmanakɛna de ludayãdannɛrinɔ kũ Farisinɔ pɔ́laro, áni gɛ̃ kpata kũ à bò Luda kĩnaa gũnlo.

Pɔfɛ̃naa

21A mà ò pì yãdenɔnɛ òsun gbɛ̃ dɛro. Gbɛ̃ kũ à gbɛ̃ dɛ̀ɛ, oni yãkpatɛ kɛ kãao. 22Makũ sɔ̃, matɛn oárɛ, gbɛ̃ kũ à pɔ fɛ̃̀ a gbɛ̃dakeii kà ò yãkpatɛ kɛ kãao. Gbɛ̃ kũ à a gbɛ̃dake sɔ̃̀sɔ̃ɔ kà ò gɛ́ kãao gbãnadenɔ kĩnaa. Gbɛ̃ kũ à pì a gbɛ̃dakenɛ mìsaride sɔ̃ kà à gɛ̃ tɛ́n gyãwãnn. 23Tó n su ǹ Luda gba pɔ́ a gbagbakia, tó n dɔn gwe kũ n gbɛ̃dake n yã kũna, 24ǹ n gba tó sa'oki arɛ gwe, ǹ gɛ́ ǹ kútɛ kɛ n adenɛ gĩa, gbasa ǹ su ǹ sa o sà. 25Tó n ibɛrɛ tɛn gɛ́ kũnwo yãkpatɛkɛkia, ǹ kɛ likalika ǹ kɛ kãao nna zaa zɛ́n, de àsun n kpá yãkpatɛkɛriaro yãi. Tó ńdi kɛ lɛro, yãkpatɛkɛri pì ni n kpá dogariia, dogari ni n da kpɛ́siran. 26Yãpuran matɛn onnɛ, ĩni bo gwero ari ǹ gɛ́ fĩna boo pínki. Bee kɔbɔ ni gɔ̃ tɛ́nyĩro.

Zinakɛnaa

27A mà ò pì, àsun zina kɛro. 28Makũ sɔ̃, matɛn oárɛ, tó gbɛ̃ nɔgbɛ̃ gwà kũ laasun pãndeo, ade zina kɛ̀ kãaon gwe kɔ̀. 29Tó n ɔpla wɛ́ dì tó ǹ fu, ǹ a bo ǹ zukũna. N kurana n mɛ̀gu kei mana de ò n mɛ̀gu sĩnda pínki zu tɛ́nla. 30Tó n ɔpla dì tó ǹ fu, ǹ zɔ̃ ǹ zukũna. N kurana n mɛ̀gu kei mana de n mɛ̀gu sĩnda pínki tana tɛ́nla.

Yìgidɛnaa

(Mat 19:9; Maa 10:11-12; Luk 16:18)

31Ò pì dɔ, tó gbɛ̃ tɛn gí a nanɔi, à yìgidɛtakada kpáa. 32Makũ sɔ̃, matɛn oárɛ, gbɛ̃ kũ à gì a nanɔi, tó adi kɛ à gɔ̃pose kɛ̀nlo, a zã pì mɛ́ àdi tó à gɔ̃ zinakɛri ũ. Gbɛ̃ kũ à nɔ kũ ò gìii sɛ̀ sɔ̃, à zina kɛ̀n gwe.

Ladanaa

33A mà ò pì yãdenɔnɛ dɔ, ò yã kũ ò sì kũ Dikirio papa, òsun fuaro. 34Makũ sɔ̃, matɛn oárɛ, àsun la da sero. Àsun la da kũ ludambɛoro, zaakũ Luda kíblegbaamɛ, 35ke andunia, zaakũ Luda tìntimmmɛ, ke Yurusalɛmu, zaakũ Kína zɔ̃kɔ̃ wɛ̃tɛmɛ. 36Ǹsun la da kũ n mìioro, zaakũ ĩni fɔ̃ ǹ n mìkã mɛ̀n do pura kũ ke ǹ a sira kũro. 37Àgɔ̃ pi ee ke oi. Yã kũ à de abirekũla bò yã vãni gũmmɛ.

Fĩnabonaa

(Luk 6:29-30)

38A mà ò pì, ò wɛ́ fĩna bo kũ wɛ́o, saka kũ sakaao. 39Makũ sɔ̃, matɛn oárɛ, àsun fĩna bo gbɛ̃ kũ à vãni kɛ̀árɛaro. Tó gbɛ̃ n sãn kɛ̀ n ɔpla gasuua, ǹ a do dɔnɛ dɔ. 40Tó gbɛ̃ ye à n uta lokomma yãkpatɛ kɛ kũnwo, ǹ n uta zɔ̃kɔ̃ɔ tónɛ dɔ. 41Tó gbɛ̃ gã nàmma ǹ aso sɛ́arɛ kiloo do, ǹ gɛ́onɛ kiloo pla. 42Tó gbɛ̃ pɔ́ wɛ́ kɛ̀mma, ǹ kpáa. Ǹsun gbɛ̃ kũ à ye à pɔ sãkãmma tɛ̃ro.

Yena ibɛrɛɛi

(Luk 6:27-28, 32-36)

43A mà ò pì, àgɔ̃ ye á gbɛ̃dakei, à zã á ibɛrɛgu. 44Makũ sɔ̃, matɛn oárɛ, àgɔ̃ ye á ibɛrɛnɔi, à adua kɛ gbɛ̃ kũ òdi wɛ́ tãáwanɔnɛ, 45de à gɔ̃ á De kũ à kú musu nɛ́nɔ ũ yãpura. Zaakũ àdi ifãntɛ̃ bo gbɛ̃ vãninɔnɛ kũ gbɛ̃ mananɔ ń pínki, àdi legũ ma taarisaridenɔnɛ kũ taaridenɔ ń pínki. 46Tó gbɛ̃ kũ ò yeáinɔn á yeńyĩ, áni láada ke le Luda kĩnaa yá? Bee bɛ'ɔgɔsirinɔ dì kɛ lɛroo? 47Tó á gbɛ̃nɔn adì fɔ kpákpaḿma ńtɛ̃nɛ, bɔ́ á deo gbɛ̃ pãndenɔlaa? Bee kifirinɔ dì kɛ lɛroo? 48Abire yãi àgɔ̃ kun papana, lán á De kũ à kú musu kun papana nà.

Currently Selected:

MATIU 5: BB2005

Highlight

Copy

Compare