MATIU 14

Yahaya Da'itɛkɛri ganaa

(Maa 6:14-29; Luk 9:7-9)

1Gɔrɔ kũ̀a bùsuu pì kína Hɛrɔdu Yesu baaruu mà. 2Akũ à pì a ìbanɔnɛ: Gbɛ̃ pì bi Yahaya Da'itɛkɛriimɛ. À vù bona gan. Abire yãin à gbãna lè àtɛn daboyãnɔ kɛ. 3Zaakũ Hɛrɔdu Yahaya kũ̀ yã, à mɔ̀ɔ kàa, à a dà kpɛ́siran a vĩ̀ni Filipi nanɔ Hɛrɔdia yãi. 4Zaakũ Yahaya dìgɔ̃ pinɛ: N Hɛrɔdia kũna nɔ ũ zɛ́ vĩro. 5Hɛrɔdu ye à a dɛ, ama àtɛn vĩna kɛ gbɛ̃nɔnɛ, zaakũ ò a annabikɛ sì.

6Hɛrɔdu igɔrɔ làa kɔ̃kɔ̃ zĩ Hɛrɔdia nɛ́nɔkpare ũ wã̀ gbɛ̃ kũ ò sù gwenɔnɛ, akũ à kɛ̀ Hɛrɔdunɛ nna manamana. 7Akũ à lɛ́ sɛ̀ à pì: Ma la dà kũ mani n gba pɔ́ kũ n a wɛ́ kɛ̀ma pínki. 8Akũ a da yã kàkanɛ à pi: Ǹ ma gba Yahaya Da'itɛkɛrii mì dana tiree gũn la tera. 9Akũ kína pɔ yàka, ama kũ à la dà nibɔnɔ wára yãin à pì ò kpáa. 10Akũ à gbɛ̃ zĩ̀ ò Yahaya mìi zɔ̃̀ kpɛ́siran. 11Kũ ò sù kũ a mìio dana tiree gũn, ò kpà nɛ́ pìia, akũ à gɛ̀ɛo a danɛ. 12Akũ Yahaya ìbanɔ sù ò a gɛ̀ɛ sɛ̀ ò vĩ̀, akũ ò gɛ̀ɛ ò ò Yesunɛ.

Yesu pɔ́blekpana gɔ̃gbɛ̃ gbɛ̃nɔn dúbu sɔɔronɔa

(Maa 6:30-44; Luk 9:10-17; Yuh 6:1-15)

13Kũ Yesu yã pìi mà, akũ a gɛ̃̀ gó'itɛ gũn, àtɛn gɛ́ gusarɛ de àgɔ̃ kú ado. Kũ gbɛ̃nɔ mà, ò bò wɛ̃tɛ kũ wɛ̃tɛo dasi ò pɛ̀tɛi gɛ̀sɛ. 14Kũ Yesu bò gó gũn, à gbɛ̃nɔ è dasidasi, akũ ò kɛ̀nɛ wɛ̃nda, akũ à ń gyãrenɔ gbà aafia. 15Kũ ɔkɔsi kɛ̀, a ìbanɔ nài ò pì: Gu díkĩna bi sɛ̃̀ntɛpɔrɔtumɛ, akũsɔ̃ gu tɛn si. Ǹ gbɛ̃nɔ gbarɛ ò tá lakutunɔ gũn, ò pɔ́ble wɛtɛ ò lú. 16Akũ Yesu wèḿma à pì: Adi kɛ tilasi ò táro. À pɔ́ kpáḿma ò ble. 17Akũ ò pìnɛ: Burodi mɛ̀n sɔɔro kũ kpɔ̀ mɛ̀n plaon ó vĩ la. 18Yesu pìńnɛ: À mɔ́omɛnɛ la. 19À ò gbɛ̃ pìnɔnɛ ò vutɛ sɛ̃̀ɛa, akũ à burodi mɛ̀n sɔɔro kũ kpɔ̀ mɛ̀n pla pìio sɛ̀, à a wɛ́ sɛ̀ musu, à arubarikaa dàn. Akũ à burodii pìi lìlikɔ̃rɛ à kpà a ìbanɔa, ò kpàatɛtɛ gbɛ̃nɔnɛ. 20Ò pɔ́ blè ò kã̀ ń pínki. Akũ ò a kpara kũ ò gɔ̃̀nɔ sɛ̀tɛ tãnko mɛ̀n kuri awɛɛpla pà. 21Gɔ̃gbɛ̃ kũ ò pɔ́ blènɔ kà gbɛ̃nɔn dúbu sɔɔro taka, nɔgbɛ̃nɔ kũ nɛ́nɔ baasi.

Yesu táa'ona sɛ̀bɛla

(Maa 6:45-56; Yuh 6:16-25)

22Yesu gã nà a ìbanɔa gɔ̃̀nɔ ò gɛ̃ gó'itɛn, ò donɛ arɛ gɛna sɛ̀bɛɛ bara dire ari àgɔ̃ pari gbarɛ. 23Ń gbarɛnaa gbɛra, à dìdi sĩ̀sĩi musu à adua kɛ ado. Gu tɛn si, à kú gwe ado. 24Gó'itɛ pìi kà zã̀ kũ í lɛ́ao, akũ í tɛni góro pì yĩpayĩpa kũ zàga'ĩa kàkańyĩ yãi. 25Gudɔo Yesu gɛ̀ɛ ń kĩnaa, àtɛn táa o íla. 26Kũ ò a è àtɛn táa o íla, akũ swɛ̃̀ɛ kɛ̃̀ńgu ò pì: Gyãwãndemɛ! Ò wiki lɛ̀ kũ vĩnao, 27akũ Yesu pìńnɛ gɔ̃̀nɔ: À á laakari kpátɛ, makũmɛ! Àsun tó vĩna á kũro. 28Akũ Pita pìnɛ: Dikiri, tó mɔkɔ̃mmɛ, ǹ tó mà táa o íla mà su n kĩnaa. 29Akũ Yesu pì: Ǹ mɔ́! Akũ Pita bò gó gũn, àtɛn táa o íla, àtɛn gɛ́ a kĩnaa. 30Kũ à è ĩa tɛn káka, akũ vĩna a kũ̀. Àtɛn vlɛ̃, akũ à wiki lɛ̀ à pì: Dikiri, ǹ ma sura ba. 31Gwe gɔ̃̀nɔ Yesu ɔ bò à a kũ̀, akũ à pìnɛ: Ludanaanikĩanade! Bɔ́yãi n sikaa kɛ̀ɛ? 32Kũ ò gɛ̃̀ gó gũn, ĩa zɛ̀. 33Akũ gbɛ̃ kũ ò kú gó gũnnɔ donyĩ kɛ̀nɛ ò pì: Luda Nɛ́mɛ n ũ yãpura.

Yesu gyãrenɔ werekɔ̃ana zaa Gɛnɛsarɛti

34Kũ ò bikũ̀ bara, ò kà Gɛnɛsarɛti bùsun. 35Gwedenɔ Yesu dɔ̃̀, akũ ò a baaruu dàgula bùsuu pìn gu sĩnda pínki, akũ ò mɔ̀nɛ kũ gyãrenɔ ń pínki. 36Ò wɛ́ kɛ̀a de ò ɔ na bee a uta lɛ́a. Akũ gbɛ̃ kũ ò ɔ nàanɔ wèrekɔ̃a ń pínki.

Currently Selected:

MATIU 14: BB2005

Highlight

Copy

Compare