MATIU 13

Yãlɛkɔ̃ana kũ pɔ́wɛfãriio

(Maa 4:1-20; Luk 8:4-15)

1Gɔrɔ dokɔ̃nɔ pì zĩ Yesu bò bɛ à gɛ̀ɛ à vùtɛ sɛ̀bɛ lɛ́a. 2Ò kàkarai dasidasi, akũ à gɛ̃̀ à vùtɛ gó'itɛn, gbɛ̃nɔ gɔ̃̀ sĩ̀sĩia ń pínki. 3Akũ à yã lɛ̀kɔ̃ańnɛ dasi à pì: Búbari ke mɛ́ à bò à gɛ̀ɛ pɔ́wɛ fã. 4Lákũ àtɛn fã nà, akũ a kenɔ lɛ̀tɛ zɛ́ gũn, bãnɔ sù ò blè. 5A kenɔ lɛ̀tɛ gbɛ̀ sàraa musu, gu kũ à bùsu vĩ zɔ̃kɔ̃ro, akũ ò bɔ̀tɛ gɔ̃̀nɔ, kũ bùsuu gègete gwero yãi. 6Kũ ifãntɛ̃ fùtɛ, akũ ò tɛ́ kũ̀ ò gàga, kũ ò zĩni vĩro yãi. 7A kenɔ lɛ̀tɛ lɛ̀ɛ gũn, akũ lɛ̀ɛ fùtɛ à nàkaraḿma. 8A kenɔ sɔ̃ ò lɛ̀tɛ zĩtɛ mana gũn, ò fùtɛ ò nɛ́ ì, a kenɔ wɛ́ basɔsɔɔro, a kenɔ baaakɔ̃kɔ̃, a kenɔ baraakurikuri. 9Gbɛ̃ kũ à sã vĩ, à yã pì ma.

10Akũ Yesu ìbanɔ nài, ò a là ò pì: Bɔ́yãi ntɛn yã ońnɛ kũ yãlɛkɔ̃anaao? 11Akũ à wèḿma à pì: Luda á gbá zɛ́ à kpata kũ à bò a kĩnaa asirinɔ dɔ̃, ama adi ń gba zɛ́ro. 12Zaakũ gbɛ̃ kũ à pɔ́ vĩn Luda ni karanɛ ari àgɔ̃ dasi. Gbɛ̃ kũ à pɔ́ke vĩro sɔ̃, bee a fíti kũ à vĩn Luda ni síamɛ. 13Abire yãin matɛn yã ońnɛ kũ yãlɛkɔ̃anaao, de ò gu gwa pɔ́ke'enaa sari, òdi sã kpá yãmanaa sari, a dɔ̀rɔ dɔ̃naa sari.

14Luda yã kũ annabi Isaya òo kɛ̀ḿma à pì:

onigɔ̃ sã kpá yãkemanaa sari,

onigɔ̃ gu gwa pɔ́ke'enaa sari.

15Ò nɛ̀sɛ vĩro de òsun ɔ̃ndɔ̃ kũro yãi,

ń sã gbãna de òsun yã maro yãi,

ń wɛ́ kukurɛna de òsun gu ero yãi,

zaakũ ò ye ò arɛ dɔma mà ń gba aafiaro.

16Arubarikadenɔmɛ á ũ kũ á wɛ́ tɛn gu e akũsɔ̃ á sã tɛn yã ma. 17Yãpuran matɛn oárɛ, annabinɔ kũ gbɛ̃ mananɔn kun yã dasi, ò ye ò pɔ́ kũ átɛn enɔ e, odi ero, ò ye ò yã kũ átɛn manɔ ma, odi maro.

18À pɔ́wɛfãri yã mì dɔ̃ sà. 19Tó gbɛ̃ kpata kũ à bò Luda kĩnaa yã mà akũ adi dɔ̃ro, Setan dì su à pɔ́ kũ ò tɔ̃̀ a swɛ̃̀ɛ gũn pì síamɛ. Pɔ́wɛ kũ à lɛ̀tɛ zɛ́ gũn mìin gwe. 20Pɔ́wɛ kũ à lɛ̀tɛ gbɛ̀ sàraaa sɔ̃, abirekũmɛ gbɛ̃ kũ à yã mà à sì gɔ̃̀nɔ kũ pɔnnao ũ. 21Zaakũ à zĩni vĩro, àdi kɛ gɔrɔ plaro. Tó yã'ũmmana a lè ke tó ò wɛ́ tã̀a yã pì yãi, àdi fumɛ gɔ̃̀nɔ. 22Pɔ́wɛ kũ à lɛ̀tɛ lɛ̀ɛ gũn de lán gbɛ̃ kũ à yã mà à sì bà, ama andunia yã damukɛna kũ yena aruzɛkɛiio dì nakaraa, akũ àdi gɔ̃ àree sari. 23Pɔ́wɛ kũ à lɛ̀tɛ zĩtɛ mana gũn de lán gbɛ̃ kũ à yã pìi mà à a dɔ̀rɔ dɔ̃ bà. Àdi kɛ karana pɔ́ ũ, ń kenɔ basɔsɔɔro, kenɔ baaakɔ̃kɔ̃, kenɔ baraakurikuri.

Yãlɛkɔ̃ana kũ fɔ̃nɔo

24Yesu yã pãnde lɛ̀kɔ̃ańnɛ à pì: Lákũ kpata kũ à bò Luda kĩnaa de nàn dí: Gbɛ̃ke ése mana tɔ̃̀ a bura. 25Gɔrɔ kũ òtɛn i o, akũ a ibɛrɛɛ sù à fɔ̃nɔ wɛ́ fã̀ ése pìn, akũ à gɛ̃̀ zɛ́la. 26Kũ ése nɔ̀ɔ sì, àtɛn pia, akũ fɔ̃nɔ pìi bò gupuraa. 27Akũ burade zĩkɛrinɔ sù ò pìnɛ: Dikiri, pɔ́wɛ manan n tɔ̃̀ n buranloo? Fɔ̃nɔ gɛ̀ɛ à bò máa? 28Akũ à pìńnɛ: Ibɛrɛ mɛ́ à abirekũ kɛ̀. Akũ zĩkɛrinɔ pìnɛ: Ń ye ò gɛ́ wotowoton yá? 29Akũ à pì: Oi! Tó átɛn wotowoto, áni woto kũ éseomɛ. 30À tó ò futɛ lɛɛlɛ ari pɔ́kɛ̃gɔrɔ. Mani o pɔ́kɛ̃rinɔnɛ ò fɔ̃nɔ pì kɛ̃ gĩa, ò a bàka yĩ tɛ́ pɔ́ ũ, gbasa ò ése kɛ̃ ò ká ma dɔ̃̀n.

Yãlɛkɔ̃ana kũ musadi wɛ́o

(Maa 4:30-32; Luk 13:18-19)

31Yesu yã pãnde lɛ̀kɔ̃ańnɛ à pì: Kpata kũ à bò Luda kĩnaa de lán musadi wɛ́ kũ gbɛ̃ sɛ̀ à tɔ̃̀ a buraa bàmɛ. 32A wɛ́ kete de pɔ́wɛnɔla pínki, ama tó à fùtɛ, àdi kɛ zɔ̃kɔ̃ de dò pɔ́nɔla pínki. Àdi lí kɛ ari bãnɔ dì su ò didi a gã̀nɔa.

Yãlɛkɔ̃ana kũ lùbɛnɛɛo

(Luk 13:20-21)

33Yesu yã pãnde lɛ̀kɔ̃ańnɛ à pì: Kpata kũ à bò Luda kĩnaa de lán lùbɛnɛ kũ nɔgbɛ̃ sɛ̀ à kà flawa zaka lɛ́ aakɔ̃ gũn à yã̀katɛ pínki bà.

Pɔ́ kũ à tò Yesu yã lɛ̀kɔ̃ańnɛ

(Maa 4:33-34)

34Yesu yã birenɔ ò gbɛ̃nɔnɛ kũ yãlɛkɔ̃anaao. Adi yãke ońnɛ yãlɛkɔ̃anaa sariro, 35de yã kũ annabii ò kɛ yãi, zaakũ à pì:

Mani lɛ́ wɛ̃ mà yãlɛkɔ̃ana ońnɛ,

mani yã kũ à utɛna zaa anduniakatɛna gɔrɔ ońnɛ.

Fɔ̃nɔ yã bɔkɔtɛnaa

36Akũ Yesu gbɛ̃nɔ tò gwe à tà bɛ. A ìbanɔ nài ò pì: Ǹ bura fɔ̃nɔ yã bɔkɔtɛ kɛwɛrɛ. 37Akũ à pìńnɛ: Pɔ́wɛmanatɔ̃ri bi Bisãsiri Nɛ́mɛ. 38Bura bi anduniamɛ. Pɔ́wɛ mana bi kpata kũ à bò Luda kĩnaa gbɛ̃nɔmɛ. Fɔ̃nɔ bi Setan gbɛ̃nɔmɛ. 39Ibɛrɛ kũ à ń tɔ̃ bi Ibilisimɛ. Pɔ́kɛ̃na bi andunialakagɔrɔmɛ. Pɔ́kɛ̃rinɔ bi malaikanɔmɛ. 40Lákũ òdi fɔ̃nɔ kɛ̃ ò ká tɛ́n nà, lɛn ani kɛ lɛ andunialakagɔrɔa. 41Bisãsiri Nɛ́ ni a malaikanɔ gbarɛ ò gbɛ̃kɛkɛrinɔ kũ yãvãnikɛrinɔ bɔtɛ a kpata gbɛ̃nɔ tɛ́ ń pínki, 42ò ń ká tɛ́ pãsĩ gũn. Gwen oni ɔ́ɔ dɔn ò ɔ di ń mìia. 43Akũ gbɛ̃ mananɔ nigɔ̃ tɛ́ kɛ lán ifãntɛ̃ bà kpata kũ à bò ń De kĩnaa gũn. Gbɛ̃ kũ à sã vĩ à yã pì ma.

Yãlɛkɔ̃ana kũ aruzɛkɛo

44Kpata kũ à bò Luda kĩnaa de lán aruzɛkɛ kũ à utɛna zĩtɛ gũn bàmɛ. Kũ gbɛ̃ke bòa, à kɛ̀kɛ à ùtɛ, akũ pɔnna gũnn à tà à pɔ́ kũ à vĩnɔ yìa pínki, akũ à zĩtɛ pìi lù.

Yãlɛkɔ̃ana kũ gbɛ̀ bɛ̀ɛrɛdeo

45Lákũ kpata kũ à bò Luda kĩnaa de nàn dí dɔ. Lagatari mɛ́ àtɛn òso mananɔ wɛtɛ. 46Kũ à òso ɔgɔde lè, akũ à tà à pɔ́ kũ à vĩnɔ yìa pínki, akũ à òsoo pìi lùo.

Yãlɛkɔ̃ana kũ táaruo

47Lákũ kpata kũ à bò Luda kĩnaa de nàn dí dɔ. Ò táaru kpà sɛ̀bɛn, à kpɔ̀ buri sĩnda pínki kũ̀. 48Kũ à pà, ò gàtɛ ò bikũ̀o bara, akũ ò vùtɛ ò a mananɔ plɛ̀plɛ ò kà tãnkon, ò a vãninɔ kɔ̀tɛ. 49Lɛn anigɔ̃ de lɛ andunialakagɔrɔ. Malaikanɔ ni su gbɛ̃ vãninɔ sɛ́tɛ ò ń bo gbɛ̃ mananɔ tɛ́, 50oni ń ká tɛ́ pãsĩ gũn. Gwen oni ɔ́ɔ dɔn ò ɔ di ń mìia. 51Akũ Yesu ń lá à pì: A yã birenɔ mìi dɔ̃̀ sà pínki yá? Ò wèa ò pì: Ee! 52Akũ à pìńnɛ: Tó yãdannɛri kpata kũ à bò Luda kĩnaa yã dàda, anigɔ̃ de lán bede kũ àdi pɔ́ dufu kũ a zĩo bo a laasii gũn bàmɛ.

Nazɛradenɔ gina Yesui

(Maa 6:1-6; Luk 4:16-30)

53Kũ Yesu yã birenɔ lɛ̀kɔ̃ańnɛ à làka, à bò gwe, 54à gɛ̀ɛ a bɛ wɛ̃tɛn, akũ èe yã daańnɛ ń aduakɛkpɛn. A yã bò ń sarɛ ò pì: Mákpan gɔ̃gbɛ̃ pì ɔ̃ndɔ̃ kũ daboyã birenɔ lènn? 55Lí'ari nɛ́n díroo? A da tɔ́n Mariamaroo? A dakũnanɔn Yamisi kũ Yusufuo kũ Simɔo kũ Yudao ũroo? 56A dãrenɔ kú kũoo laroo? À yã birenɔ lè mámɛ pínkii? 57Akũ ò gìi. Yesu pìńnɛ: Annabii dìgɔ̃ bɛ̀ɛrɛɛ sariro, sé a bɛ wɛ̃tɛn kũ a ɔnnwo. 58Adi daboyã kɛ gwe dasiro, kũ òtɛni a náani kɛro yãi.

Currently Selected:

MATIU 13: BB2005

Highlight

Copy

Compare