MATIU 10

Yesu zĩ̀ri gbɛ̃nɔn kuri awɛɛplanɔ ditɛnaa

(Maa 3:13-19; Luk 6:12-16)

1Yesu a ìba gbɛ̃nɔn kuri awɛɛplanɔ sìsi, akũ à ń gba iko ò tãnanɔ goḿma, ò gyãrenɔ werekɔ̃a kũ gbãnasaridenɔ ń pínki. 2Zĩ̀ri gbɛ̃nɔn kuri awɛɛpla pìnɔ tɔ́nɔn dí: Gbɛ̃ káaku Simɔ kũ òdi pinɛ Pita kũ a dakũna Anduruo, Zebedi nɛ́ Yamisi kũ a dakũna Yuhanao, 3Filipi, Batɔlɔmiu, Tomasi, bɛ'ɔgɔsiri Matiu, Alafeu nɛ́ Yamisi, Tadeu, 4Simɔ Kokaride kũ Yudasi Isikariɔti kũ à bò a kpɛo.

Yesu zĩ̀rinɔ zĩnaa

(Maa 6:7-13; Luk 9:1-6)

5Kũ Yesu tɛn gbɛ̃nɔn kuri awɛɛpla pìnɔ zĩ, à pìńnɛ: Àsun gɛ́ buri pãndenɔ kĩnaaro. Àsun gɛ̃ Samaria wɛ̃tɛnɔ gũnlo. 6À gɛ́ Isaraila kũ ò sã̀tɛ lán sã bànɔ kĩnaa. 7À gɛ́ àgɔ̃ waazi kɛ àgɔ̃ gɛ́o à pi: Kpata kũ à bò Luda kĩnaa kà kãni! 8À gyãrenɔ werekɔ̃a, à gɛ̀nɔ vu bona gan, à kusunɔ werekɔ̃a swáswa, à tãnanɔ goḿma. Lákũ a lè pɔ́kekpanaa sari nà, à kɛńnɛ pɔ́kesinaa sari. 9Àsun ɔgɔ da á bɔ̀kɔnlo. 10Àsun bɔ̀kɔlokona sɛ́ro ke uta plade ke kyate ke gòo, zaakũ zĩkɛrii kà à a pɔ́ble le. 11Wɛ̃tɛ kũ áni kán sĩnda pínki ke lakutu, à gbɛ̃ mana wɛtɛ à kipaa, àgɔ̃ kú gwe ari à gɛ́ gɛ̃o zɛ́la. 12Tó a gɛ̃ ɔnn, à fɔɔ nna kpáḿma. 13Tó ɔndenɔ kà, á fɔɔ nna ni gɔ̃ńnɛ. Tó odi ká sɔ̃ro, á fɔɔ nna ni ɛra à sukpaáwa. 14Gu kũ odi gbãnakɛ kpáái ke odi sã kpá á yãiro, à bo ɔn ke lakutu pìi gũn à lukutɛ̃ warawara á gbánɔa. 15Yãpuran matɛn oárɛ, yãkpatɛkɛgɔrɔ zĩ wɛ́tãmmana kũ Sɔdɔmu kũ Gɔmɔradenɔ ni le nigɔ̃ sã̀na de wɛ̃tɛ pì denɔ pɔ́la.

Yã kũ ani Yesu ìbanɔ le onnɛnaa

(Maa 13:9-13; Luk 21:12-17)

16Matɛni á zĩ lán sãnɔ bà lɛwannanɔ tɛ́mɛ. Àgɔ̃ laakari vĩ lán mlɛ̃̀nɔ bà, àgɔ̃ de yãkekɛrisaridenɔ ũ lán potɛ̃nɛnɔ bà. 17À laakari kɛ bisãsirinɔi, zaakũ oni á kũkũ ò á na yãkpatɛkɛrinɔnɛ ń ɔ̃i, oni á gbɛ̃gbɛ̃ ń aduakɛkpɛnɔ gũn. 18Oni gɛ́ kãáo bùsu gbɛ̃ zɔ̃kɔ̃nɔ kũ kínanɔ kĩnaa ma yãi. Ánigɔ̃ deńnɛ ma sèedadenɔ ũ kũ buri pãndenɔ. 19Tó ò á kpáḿma, àsun yã kũ áni o damu kɛro ke yã kũ áni liḿma. Zĩ kũ̀a Luda mɛ́ ani yã kũ áni o da á lɛ́n. 20Adi kɛ ákɔ̃nɔ mɛ́ áni yã oro, á De Nini mɛ́ ani yã da á lɛ́n.

21Vĩ̀ni kũ dakũnanɔ ni kɔ̃ kpáḿma ò dɛ. Denɔ ni bo ń nɛ́nɔ kpɛ. Nɛ́nɔ ni bo ń denɔ kũ ń danɔ kpɛ ò ń dɛ. 22Gbɛ̃ sĩnda pínki ni zãágu ma yãi, ama gbɛ̃ kũ à zɛna gbãna ari a gɔrɔ lɛ́a ni surabana le. 23Tó òtɛn wɛ́ tãáwa wɛ̃tɛ ken, à bàa lɛ́ à tá a pãnden. Yãpuran matɛn oárɛ, áni gɛ́ Isarailanɔ bùsu wɛ̃tɛnɔ gũn à láka pínkiro, Bisãsiri Nɛ́ ni gĩnakɛ à su. 24Ìbaa dìgɔ̃ de a dannɛrilaro. Zĩ̀rii dìgɔ̃ de a dikirilaro. 25Tó ìba a yãdannɛri lenaa lè ke tó zĩ̀ri a dikiri lenaa lè, abirekũ mɔ̀ lɛ. Tó ò tɔ́ kpà ɔn bedenɛ Bɛlɛzɛbubu, tɔ́ kũ a vãni de abirekũlan oni kpá a ɔndenɔnɛ.

Zɛna kũ Yesuo gbɛ̃nɔ arɛ

(Luk 12:2-9)

26Àsun vĩna kɛńnɛro. Pɔ́ke kun utɛna kũ ani bo gupuraaro. Asiriyã ke kun kũ oni gí dɔ̃iro. 27À yã kũ matɛn oárɛ gusiran o gupuraa. À yã kũ átɛn ma á sã gũn kpàkpa kɛ gãnulɛa. 28Gbɛ̃ kũ òdi mɛ̀ kakatɛ, ama òdi fɔ̃ ò nini dɛ̀ronɔ, àsun vĩna kɛńnɛro. À vĩna kɛ Ludanɛ, kũ ani fɔ̃ à nini kũ mɛ̀ɛo kakatɛ tɛ́ gũn pínki. 29Òdi bãntoro mɛ̀n pla yía kɔbɔ donloo? Ama ń ke dì lɛ́tɛ zĩtɛ á De yãdɔ̃naa sariro. 30Bee á mìkãnɔ, à a lɛ́ dɔ̃. 31Abire yãi àsun vĩna kɛro. Á bɛ̀ɛrɛ de bãntoro dasinɔla.

32Gbɛ̃ kũ à zɛ̀ kũmao gbɛ̃nɔ arɛ, mani zɛ kãao ma De kũ à kú musu arɛ. 33Gbɛ̃ kũ à ledi kpàmai gbɛ̃nɔ arɛ sɔ̃, mani ledi kpái ma De kũ à kú musu arɛ.

Kɛ̃kɛ̃kɔ̃ana Yesu yãi

(Luk 12:51-53; 14:26-27)

34Ásungɔ̃ da ma su de gbɛ̃nɔ gɔ̃ nna kũ kɔ̃o andunia gũnnlo. Mádi su de gbɛ̃nɔ gɔ̃ nna kũ kɔ̃o yãinlo, sé futɛna kũ kɔ̃o. 35Ma sumɛ, de gɔ̃gbɛ̃ bo a de kpɛ, nɔgbɛ̃ bo a da kpɛ, nɔzãre bo a zã da kpɛ. 36Gbɛ̃ bedenɔ ni gɔ̃ a ibɛrɛnɔ ũ. 37Gbɛ̃ kũ à ye a de ke a dai demala dí ká àgɔ̃ de ma ìba ũro. Gbɛ̃ kũ à ye a nɛ́gɔ̃gbɛ̃ ke a nɔgbɛ̃i demala dí ká àgɔ̃ de ma ìba ũro. 38Gbɛ̃ kũ adi a lígbãndurukpana sɛ́ àgɔ̃ tɛ́omairo, ade dí ká àgɔ̃ de ma ìba ũro. 39Gbɛ̃ kũ à a wɛ̃̀ndi kũna, ade ni kurai. Gbɛ̃ kũ à gì a wɛ̃̀ndiii ma yãi sɔ̃, ade nigɔ̃ wɛ̃̀ndi vĩ.

Láada yã

40Gbɛ̃ kũ à á sí ma simɛ. Gbɛ̃ kũ à ma si sɔ̃, ade gbɛ̃ kũ à ma zĩ sìmɛ. 41Gbɛ̃ kũ à annabii sì a annabikɛ yãi ni annabi láada le. Gbɛ̃ kũ à gbɛ̃ mana sì a manakɛ yãi ni gbɛ̃ mana láada le. 42Bee í yĩdan, gbɛ̃ kũ à nɛ́ dínɔ doke gbà ma ìbakɛ yãi, yãpuran matɛn oárɛ, ade ni kura a láadairo.

Currently Selected:

MATIU 10: BB2005

Highlight

Copy

Compare