BONAA 40
40
Bizakuta sakɛnaa
1Dikiri pì Musanɛ: 2Ǹ kuta dɔ kũ à de dakarɛki kuta ũ mɔ káakun gɔrɔ káaku zĩ 3ǹ àkpati kũ doka gbɛ̀ anlonɔn kú a gũn ditɛn ǹ lábure kpái. 4Ǹ gɛ̃ kũ teburuo ǹ a tanɔ kátɛa zɛ́azɛa. Ǹ gɛ̃ kũ fitiladibɔɔo ǹ a fitilanɔ kɛkɛ. 5Ǹ wura turaretitikpataki ditɛ doka àkpati arɛ ǹ kuta kpɛ́lɛlɛ lábure kpá ǹ tataalɛ. 6Ǹ sa'opɔ kũ òdi ká tɛ́n à tɛ́ kũ oki ditɛ dakarɛki kuta kpɛ́lɛlɛa, 7ǹ dàga ditɛ dakarɛki kuta dagura kũ sa'okio ǹ í kán. 8Ǹ kara kpá ǹ likai, ǹ lábure kpá karaa pì lɛ́a.
9Ǹ pɔ́ sakɛnísi sɛ́ ǹ kú kpɛ́ pìia kũ pɔ́ kũ ò kú a gũnnɔ pínki ǹ ditɛ ma pɔ́ ũ kũ a zĩkɛbɔnɔ, oni gɔ̃ ma pɔ́ ũ. 10Ǹ nísi pì kú sa'oki pìia kũ a zĩkɛbɔnɔ pínki. Ǹ sa'oki pì ditɛ ma pɔ́ ũ, anigɔ̃ de ma pɔ́ ũ deńla. 11Ǹ nísi pì kú dàga pìia kũ a dibɔɔo, oni gɔ̃ ma pɔ́ ũ. 12Ǹ su kũ Harunao kũ a nɛ́nɔ dakarɛki kuta kpɛ́lɛlɛa ǹ ń zú o gwe. 13Ǹ sa'ori pɔ́kasanɔ da Harunanɛ, ǹ nísi kúa ǹ a ditɛ ma pɔ́ ũ, ani gɔ̃ ma gbàgbari ũ. 14Ǹ su kũ a nɛ́nɔ dɔ ǹ utagyabanɔ dadańnɛ, 15ǹ nísi kúkuḿma lákũ n kù ń dea nà, oni ma gbagba. Nísikummanaa pì mɛ́ ani tó ògɔ̃ de ma gbàgbarinɔ ũ ari ń buria. 16Musa kɛ̀ lákũ Dikiri ònɛ nà pínki.
17Ń bona Misila wɛ̃̀ plade mɔ káaku gɔrɔ káakua ò kuta pìi dɔ̀. 18Kũ Musa tɛn kuta pì dɔ, à a zɛbɔnɔ pɛ̀tɛpɛtɛ gĩa, akũ à a lípɛtɛnɔ pɛ̀pɛn à a líkpakpanɔ kpàkpan, akũ à lípɛtɛnɔ pɛ̀tɛpɛtɛ. 19À biza kùa, akũ à bára kùtɛa lákũ Dikiri ònɛ nà. 20À sèeda gbɛ̀ anlonɔ sɛ̀ à kà àkpatii pìi gũn, à àkpatii pì sɛ́linɔ dà a zãnɔ gũn, akũ à a nɛ́ kùtɛa. 21À gɛ̃̀o kpɛ́n, akũ à lábure kpà sèeda àkpatii pìii lákũ Dikiri ònɛ nà. 22À teburuu dìtɛ dakarɛki kutan lábure pì kpɛ́lɛlɛ kpa gugbãnduru kpa. 23À burodii kàtɛa Dikirinɛ zɛ́azɛa lákũ à ònɛ nà. 24À fitiladibɔɔ dìtɛ dakarɛki kutan arɛdɔkɔ̃ana teburuua gɛ̀nɔmidɔki kpa, 25à fitilanɔ nàna Dikiri arɛ lákũ à ònɛ nà. 26Akũ à wura turaretitikpataki pìi dìtɛ dakarɛki kutan lábure sarɛ, 27akũ à turaretiti gbĩ nnanna kpàtaa lákũ Dikiri ònɛ nà. 28Akũ à lábure kpà kuta pì lɛ́a.
29À sa'opɔ kũ òdi ká tɛ́n à tɛ́ kũ oki dìtɛ dakarɛki kuta kpɛ́lɛlɛa, akũ à sa'opɔ kũ òdi ká tɛ́n à tɛ́ kũ òa kũ flawaao lákũ Dikiri ònɛ nà. 30À dàgaa pìi dìtɛ dakarɛki kuta dagura kũ sa'okio, akũ à í kàn. 31Gwen Musa kũ Harunao kũ a nɛ́gɔ̃gbɛ̃nɔ dì ń ɔnɔ kũ ń gbánɔ pípin. 32Tó òtɛn gɛ̃ dakarɛki kutan, ke tó òtɛn na sa'okii, òdi ń ɔnɔ kũ ń gbánɔ pípin lákũ Dikiri ò Musanɛ nà. 33Akũ à karaa kpà à lìka kuta pìii kũ sa'okio, akũ à lábure kpà karaa pì lɛ́a. Lɛn Musa zĩ pìi kɛ̀ à làka lɛ.
Dikiri gakuri kipana bizakutan
(Nar 9:15-23)
34Akũ tɛ́luku pìi dà dakarɛki kuta pìla, Dikiri gakuri kuta pìi pà. 35Musa dí fɔ̃ à gɛ̃̀ dakarɛki kuta pìi gũnlo, kũ tɛ́luku dàala akũsɔ̃ kũ Dikiri gakuri kuta pìi pà yãi.
36Isarailanɔ táa'onaa gũn, tó tɛ́luku pìi gò kuta pìia, akũ òdi futɛ kũ táo. 37Tó tɛ́luku pì dí goaro, òdi futɛ kũ táoro, sé zĩ kũ à gòa. 38Fãnantɛ̃ Dikiri tɛ́luku dì da kuta pìla, gwãani sɔ̃ tɛ́ dìgɔ̃ kú tɛ́luku pìi gũn. Lɛn Isarailanɔ dì e lɛ ń pínki ń táa'onaa gũn pínki.
Currently Selected:
BONAA 40: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
