BONAA 34
34
Gbɛ̀ anlo dufunɔ
1Dikiri pì Musanɛ: Ǹ gbɛ̀ anlo kɛ mɛ̀n pla lán a káakunɔ bà, mani yã kũ ò kú a káakupɔ kũ n wìnɔa kɛ̃ḿma. 2Ǹgɔ̃ kú soru gũn kɔnkɔ. Ǹ didi Sinai kpia ǹ zɛ ma arɛ a mìsɔ̃ntɛa. 3Gbɛ̃ke sún su kũnworo. Òsun gbɛ̃ke e gukea kpi pìia sero. Bee sã ke zù sún su pɔ́ ble a gɛ̃iro.
4Musa gbɛ̀ anlo à mɛ̀n pla lán a káakunɔ bà. À fùtɛ kɔnkɔ káakukaaku, akũ à dìdi Sinai kpia à gbɛ̀ anlo mɛ̀n pla pìnɔ kũna a ɔĩ lákũ Dikiri ònɛ nà. 5Dikiri kìpa túsukpɛ gũn à zɛ̀ a sarɛ, akũ à a zĩda tɔ́ sìsi. 6Kũ Dikiri tɛn gɛ̃ a arɛ, à a tɔ́ sìsi à pì: Dikiri, Dikiri Luda wɛ̃ndadɔ̃nnɛri sùruden ma ũ. Ma pɔ dì fɛ̃ likaro, má gbɛ̃kɛ kũ náanio vĩ zɔ̃kɔ̃. 7Madìgɔ̃ gbɛ̃kɛ vĩ kũ gbɛ̃nɔ ari ń buri lɛ́mmɛ, mani ń yã vãninɔ kɛ̃ḿma kũ ń taarinɔ kũ ń durunnanɔo. Ama madì tó taaride bo pãro. Madì denɔ yã vãni wí ń nɛ́nɔ musu kũ ń daikorenɔ kũ ń sãkpɛnɔ kũ ń nasionɔo. 8Musa wùtɛ a nɛ̀sɛlɛ kutɛna à donyĩ kɛ̀nɛ gɔ̃̀nɔ 9à pì: Dikiri, zaakũ ma n pɔnna lè, ǹ gɛ́ kũoo. Bee kũ gbɛ̃ pìnɔ sã gbãna, ǹ sùru kɛ kũoo ó yã vãninɔ kũ ó durunnanɔ musu ǹ ó sɛ́ n pɔ́nɔ ũ.
Luda bàka kunna kũ Isarailanɔ
(Bon 23:14-19)
10Dikiri pì: Ma bàka nigɔ̃ kú kãáomɛ. Mani yãbonsarɛ kɛ á pínki wára, kũ gbɛ̃ke dí a taka kɛ buri ke gũn andunian zikiro. Buri kũ ò likaáinɔ ni ma yãkɛna e, zaakũ mani yã naaside kɛ kãáo. 11Àgɔ̃ yã kũ ma òárɛ gbãra kũna, mani pɛ́árɛ Amɔrinɔa kũ Kanaanɔ kũ Itinɔ kũ Pɛrizinɔ kũ Ivinɔ kũ Yebusinɔo. 12À laakari kɛ! Àsun lɛ́dokɔ̃nɔ kɛ kũ bùsu kũ átɛn gɛ́ gɛ̃n denɔoro, de àsun tankutɛ kpákpa á zĩdanɛro yãi. 13À ń sa'okinɔ gboro à ń tãna gbɛ̀nɔ wíwi à Asɛra línɔ zɔ̃zɔ̃. 14Àsun kútɛ tãnanɛro, zaakũ makũ Dikiri ma tɔ́n Gɔ̃ba, madì gɔ̃ba kpá. 15À laakari kɛ! Àsun lɛ́dokɔ̃nɔ kɛ kũ bùsupidenɔoro, zaakũ tó òtɛn pãpã kɛ ń tãnanɔ yã musu, òtɛn sa oḿma, oni á sísi à ń sa'ona nɔ̀bɔ só kũńwomɛ. 16Àsun nɔ sɛ́ á nɛ́nɔnɛ ń tɛ́ro, zaakũ tó ń nɛ́nɔgbɛ̃nɔ tɛn pãpã kɛ ń tãnanɔ yã musu, oni tó á nɛ́nɔ pãpã kɛ kũńwo se. 17Àsun mɔ̀ pi tãna ũro.
18Àgɔ̃ Burodi Futɛnasari dikpɛ kɛ. Àgɔ̃ burodi futɛnasari só gɔrɔ suppla mɔ kũ òdi pi Abibu gũn lákũ ma dìtɛárɛ nà, zaakũ mɔ pìi gũn a bɔtɛ Misila. 19Á daudunɔ bi ma pɔ́nɔmɛ ń pínki kũ á pɔ́kãde nɛ́ sà káakunɔ ń pínki, zù ke pɔ́ ketenɔ. 20Àgɔ̃ zaaki nɛ́ sà káaku bo kũ são. Tó ádi boro, à a waka fĩ à dɛ. Àgɔ̃ á daudunɔ bo. Gbɛ̃ke sún su ma kĩnaa ɔkoriro. 21Àgɔ̃ zĩ kɛ gɔrɔ suddo à kámma bo a gɔrɔ supplade zĩ, bee búwigɔrɔ ke pɔ́kɛ̃gɔrɔn yá.
22Àgɔ̃ Pɔ́kɛ̃na dikpɛ kɛ gɔrɔ kũ a na burapɔ káaku kɛkɛnaaa. Àgɔ̃ Pɔ́dufublena dikpɛ kɛ wɛ̃̀ lakanaaa. 23Wɛ̃̀ kũ wɛ̃̀ɛo gɔ̃gbɛ̃ sĩnda pínki gɔ̃ su makũ Dikiri Isarailanɔ Luda arɛ gɛ̃̀n aakɔ̃. 24Mani pɛ́árɛ burinɔa mani á bùsu lɛ́ karaárɛ. Gbɛ̃ke ni á bùsu ni dɛ gɔrɔ kũ átɛn su makũ Dikiri á Luda arɛ wɛ̃̀ kũ wɛ̃̀ɛo gɛ̃̀n aakɔ̃ro. 25Àsun pɔ́futɛna kpáma lɛɛlɛ kũ sa'opɔ aruoro. Àsun Vĩnla sa'ona nɔ̀bɔ ditɛ gu dɔ̀aro. 26Àgɔ̃ gɛ́ makũ Dikiri á Luda ɔnn kũ á burapɔ káakunɔ. Àsun blènɛ nɔ̀bɔ kuku kũ a da yɔ̃'ioro.
27Akũ Dikiri pì Musanɛ: Ǹ yã pìnɔ kɛ̃ takadan, zaakũ ma bàka kunna kũnwo kũ Isarailanɔ yãnɔn gwe. 28Musa kú kũ Dikirio gwe ari gɔrɔ bupla fãnantɛ̃ kũ gwãanio pɔ́blenaa sari pɔ́minaa sari. Akũ Dikiri a bàka kunna kũńwo yã mɛ̀n kurinɔ kɛ̃̀ gbɛ̀ anlo pìnɔa.
Musa ãn tɛ́kɛnaa
29Kũ Musa kìpa Sinai kpia, à gbɛ̀ anlo mɛ̀n pla kũ doka kɛ̃aa pìnɔ kũna a ɔĩ. À dɔ̃ kũ a ãn tɛn tɛ́ kɛ ń yã'ona kũ Dikirio yãiro. 30Kũ Haruna kũ Isarailanɔ a è ń pínki, a ãn tɛn tɛ́ kɛ, vĩna ń kũ ò nai. 31Akũ Musa ń sísi. Haruna kũ gbɛ̃ zɔ̃kɔ̃nɔ ɛ̀ra ò sù a kĩnaa, akũ à yã ò kũńwo. 32Abire gbɛra Isarailanɔ nài ń pínki, akũ à yã kũ Dikiri dìtɛarɛ Sinai kpi musu òńnɛ pínki. 33Kũ à yã òńnɛ à làka, à fáta kù a ãnnwa. 34Tó à gɛ̃̀ à yã o kũ Dikirio, àdi fáta go ari à ɛra à bo. Tó à bò, àdi yã kũ Dikiri dìtɛarɛ o Isarailanɔnɛ, 35akũ òdi e a ãn tɛn tɛ́ kɛ. Musa dì ɛra à fáta kú a ãnnwa ari à ɛra à gɛ̃ à yã o kũ Dikirio.
Currently Selected:
BONAA 34: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
