BONAA 32
32
Wura zùsanɛ bɔ̀rɔɔ
1Kũ gbɛ̃nɔ è Musa dí kipa kpia likalikaro, ò kàkara Harunai ò pìnɛ: Ǹ futɛ ǹ tãna kenɔ kɛwɛrɛ ò dowɛrɛ arɛ, zaakũ Musa kũ à ó bɔ́tɛ Misila pìi, ó dɔ̃ yã kũ à a lèro. 2Akũ Haruna pìńnɛ: À á nɔgbɛ̃nɔ wura pɔ́sãnɔ bɔtɛ kũ á nɛ́gɔ̃gbɛ̃nɔ pɔ́nɔ kũ á nɛ́nɔgbɛ̃nɔ pɔ́nɔ à suomɛnɛ. 3Akũ ń pínki a wura pɔ́sãnɔ bòbo ò kpà Harunaa. 4À sì à kàsa lán zùsanɛ bà, akũ à lɔ̀lɔ. Akũ ò pì: Isarailanɔ, á tãnan di! Àkũ mɛ́ à á bɔ́tɛ Misila. 5Kũ Haruna è lɛ, à sa'oki bò zùu pì arɛ, akũ à kpàkpaa kɛ̀ à pì: Dikiri dikpɛ kun zia. 6Kũ gu dɔ̀, gbɛ̃nɔ fùtɛ ò sa'opɔ kũ òdi ká tɛ́n à tɛ́ kũ òa kũ kɛnnakũkɔ̃o sa'opɔo. Gbɛ̃nɔ vùtɛ òtɛn pɔ́ ble òtɛn í mi, akũ ò fùtɛ òtɛn pãpã kɛ.
7Akũ Dikiri pì Musanɛ: Ǹ kipa ǹ gɛ́! N gbɛ̃ kũ n bo kũńwo Misilanɔ yàka. 8Ò kɛ̃̀ zɛ́ kũ ma mɔ̀ńnɛa likalika, ò wuraa kàsa tãna ũ lán zùsanɛ bà, ò kùtɛnɛ ò sa òa ò pì, Isarailanɔ tãna kũ à ń bɔ́tɛ Misilan gwe. 9Akũ Dikiri ɛ̀ra à pì Musanɛ: Ma è gbɛ̃ pìnɔ sã gbãnamɛ. 10Ǹ gomala de mà a pɔfɛ̃ kipaḿma mà ń kakatɛ, ama mani n burinɔ kɛ dasi. 11Akũ Musa kútɛ kɛ̀ Dikiri a Ludanɛ à pì: Dikiri, bɔ́yãin ntɛn pɔfɛ̃ kipa n gbɛ̃nɔa kũ n ń bɔ́tɛ Misila kũ n gbãna purao kũ n gã̀sã gbãnaoo? 12Misilanɔ ni pi ń kakatɛna yãin n ń bɔ́tɛ, de ǹ le ǹ ń dɛdɛ kpinɔ musu ǹ ń láka andunia gũn. Ǹ n pɔfɛ̃ kpátɛ ǹ yã kũ ń ye ǹ kipa n gbɛ̃nɔaa pì bo n nɛ̀sɛn. 13Ǹ dɔ n zɔ̀blerinɔ Ibrahĩ kũ Isaakuo kũ Isarailao yãn, zaakũ n la dàńnɛ kũ n zĩdao n pì, ĩni ń buri kara lán susunɛnɔ bà, ĩni bùsu kũ n a yã òńnɛ kpá ń burinɔa ògɔ̃ vĩ gɔrɔ sĩnda pínki. 14Akũ Dikiri yã kũ à pì áni kipa a gbɛ̃nɔaa pìi bò a nɛ̀sɛn.
15Musa ɛ̀ra à kìpa kpia, à doka gbɛ̀ anlo mɛ̀n pla pìnɔ kũna a ɔĩ. Yã kɛ̃na gbɛ̀ɛ pìnɔa kpa plapla pínki. 16Luda mɛ́ à gbɛ̀ anlo pìnɔ à, àkũ mɛ́ à yã kɛ̃̀ḿma. 17Yɔsua gbɛ̃nɔ wiki mà, akũ à pì Musanɛ: Ǹ zĩ̀ wiki ma dɔ bùran. 18Musa pì: Kùwiki mɛ́ à dɔ gwero, wɛ̃nda ɔ́ɔ dɔn gwe sɔ̃ro, gbɛ̃nɔ lɛ̀sinaan matɛn ma. 19Kũ à kà kãni kũ bùraao, à è òtɛn ũ wã zùsa pì arɛ, akũ à pɔ fɛ̃̀. À gbɛ̀ anlo kũ à kũnaa pìnɔ pã̀tɛ kpigɛrɛɛi gwe, ò wìwi. 20Akũ à zùsa kũ ò pìi pìi sɛ̀ à dà tɛ́n. À a títi bò, akũ à kà ín à kpà Isarailanɔa, ò mì. 21Akũ Musa Haruna là à pì: Bɔ́n gbɛ̃ pìnɔ kɛ̀nnɛ, gbasa n tò ò durunna zɔ̃kɔ̃ dí taka kɛ̀ɛ? 22Akũ à wèa à pì: Ǹsun pɔ fɛ̃ro, mare. Ń gbɛ̃ pìnɔ dɔ̃, kũ ò vãni. 23Mɔ́kɔ̃nɔ mɛ́ ò pìmɛnɛ mà tãna ke kɛ à dońnɛ arɛ. Ò pì Musa kũ à á bɔ́tɛ Misila pìi, ò dɔ̃ yã kũ à a lèro. 24Akũ ma pìńnɛ gbɛ̃ kũ ò wura vĩnɔ bɔtɛ ò suo. Kũ ò sùo, akũ ma kà tɛ́n, akũ à bò zùsanɛ́ bɔ̀rɔɔ pì ũ.
25Musa è Haruna tò gbɛ̃nɔ tɛni ń pɔyeina kɛ, akũ ò gɔ̃̀ lalandi pɔ́ ũ ń ibɛrɛnɔnɛ. 26Akũ à zɛ̀ bùra zɛ́lɛa à pì: Gbɛ̃ kũ ò kú Dikiri kpanɔ su ma kuru. Akũ Levi burinɔ kàkara a kuru. 27À pìńnɛ: Dikiri Isarailanɔ Luda pì, á baadi a fɛ̃nɛda loko à dodo bùraai zɛ́lɛ kũ zɛ́lɛo, á baadi a gbɛ̃nɔ kũ a gbɛ̃nnanɔ kũ a gbɛ̃dakenɔ dɛdɛ. 28Levi burinɔ kɛ̀ lákũ Musa dàńnɛ nà. Gbɛ̃ kũ ò ń dɛdɛ zĩ pìianɔ kà gbɛ̃nɔn dúbu aakɔ̃ taka bà. 29Akũ Musa pì Levi buri pìnɔnɛ: Lákũ a bo á nɛ́nɔ kũ á gbɛ̃nɔ kpɛ nà, a á zĩda kpà Dikiria gbãra, Dikiri arubarikaa dàágu gbãran gwe.
Musa kutɛkɛna Dikirinɛ Isarailanɔnɛ
30Kũ gu dɔ̀ Musa pì Isarailanɔnɛ: A durunna zɔ̃kɔ̃ɔ kɛ̀, bee kũ abireo mani ɛra mà didi kpia mà gɛ́ Dikiri kĩnaa dɔ, òdigɔ̃ dɔ̃ro ke mani le mà kútɛ kɛnɛárɛ á durunna yã musu. 31Akũ à ɛ̀ra à gɛ̀ɛ Dikiri kĩnaa à pì: N yã nna! Gbɛ̃ pìnɔ durunna zɔ̃kɔ̃ɔ kɛ̀, ò tãna ke kɛ̀ ń zĩdanɛ kũ wuraao. 32Ǹ sùru kɛ! Ǹ ń durunna kɛ̃ḿma. Tó lɛnlo, ǹ ma tɔ́ warawara takada kũ n kɛ̃̀ɛ gũn. 33Dikiri pìnɛ: Gbɛ̃ kũ à durunna kɛ̀mɛnɛ tɔ́n mani warawara ma takada gũn. 34Ǹ gɛ́ kũ gbɛ̃nɔ gu kũ ma ònnɛn sà. Ma Malaika ni donnɛ arɛ. Bee kũ abireo tó ma wɛ́tãmmana gɔrɔ kà, mani wɛ́ tãḿma ń durunna yãi. 35Akũ Dikiri gagagyã kà gbɛ̃nɔgu zùsanɛ kũ ò tò Haruna pìi pì yãi.
Currently Selected:
BONAA 32: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
