Luka 1
KUVI

Luka 1

1
1-4Ghanomi pāti Theophilū! dakkiti kanka nenze messiwaha zōkoḍi seba gattari mange herpati lehe, mā maddi mlīti kammanga kōsomi hunge rāẓali hāra zāna mānditeri lakka ninge bōdha kījati sangatika satteeniĕ ātaï inzihi nīnu punzali, evaska bahēti dakkiti ringe chinnikīhihi othe punzihi manni nānu zakke nī dōruti evaska kōsomi tāḍininga rāẓali nehai inzihi āẓitee.
5Iudaja dēshomiti ōḍu āti Herodu neẓungaña Abīja kūḍata manni Zakarīja inni ro puzāri maẓẓesi, evani dokkiri Aharonu māskaña rondi, ēdāni dōru Elisabethu.
6ī rīari prabhu wālati helloti lehee nājomi zīnga lehee doho hillaatari āhi tākihi Paramushreeni nōkita nīti gattari āhi maẓẓeri.
7Elisabethu bānzeni ātaki evaraki pōdipōda hillaatu; ōḍee ē rīari hāree dūtari.
8Zakarīja tani kūḍa māmūluti lehe Paramushreela nōkita pūzari pāna kīhi manzaliĕ.
9pūzari ōẓa lehe prabhu gūdita hazziwaha duppa hījali evanaki ōtu wate.
10duppa samēmita lōku samūhomi bahē pangata prārdhana kīhi manzaliĕ
11prabhu dūta duppazōmba tiini bakki niẓẓiwaha evanaki tōnzājaliĕ
12Zakarija evanaï messiwaha dagga āhi azzitasi ātesi.
13embatiĕ ē dūta evani tulle:— Zakarija azza aniko! nī prārdhana wēngite; nī dokkiri āti Elisabethu ninge mrīenaï pāne, evanaki Iohanu inni dōru ittidi.
14-16evasi prabhu nōkita kazzasi āhi, drāksha rasomi ātiwa hōẓu ātiwa unnaanaha tani talli bandita zarnati māthihi parishudhātmati nenzitasi āhi, Ishraēlungaña hāra zāna prabhu āti tami Paramushreeni bakki wethesi.
17ōḍee evasi tallitanziska hījanga kokkaripōdanga bakkië, wennaagatari nītigattari ēḍu gēnthali wethihi, prabhu kōsomi kāẓi manni lōku sidhomi kijali Elija ātmee blājue gattasi āhi evanaki tolliĕ hannesi lakka ninge rāhee hāre sardee āne; evasi zarnātaki hāra zāna rāha āneri.
18Zakarīja:— īdi nānu ēni āhi pu’ini? nānu budhatee, nā dokkiri hāree dūtai inzihi ē dūta tulle wessaliĕ
19dūta:— nānu Paramushreeni mūmbu nōkita, nī’ni Gabrielutee; nī tulle zōlki ājalië ī suvarta mānomi ninge punpikījaliĕ panditatee ātee.
20ōḍee nā hāḍanga ē kālomita mlīnu; nīnu evaskani namma hilludi lakka ī sangatika mlīni pateka nīnu zōlalāḍaanaha mūgigattati āhi manzi inzihi evani tulle westesi.
21lōku Zakarija kōsomi kāẓihi evasi gūdita wēḍa kittaki iẓintromi āteri.
22evasi pangata wātati evari tulle zōlalāḍaaki, gūdita evanaki darshanomi āte inzihi puẓẓeri, embatiĕ evasi evaraki seike kīhi mūgigattasi āhi maẓẓesi.
23evasi sēba kīni nēẓunga nenzitati tani izzo haẓẓesi.
24ē nēẓunga āti ḍāju evani dokkiri Elisabethu bandi āhi:— mānēikaña nange manni lazza pispi kījali
25nannaa daja kījati nēẓungaña prabhu īle kīhi kījatesi inzakoddihi tānu pāsa lēska etkeetaraki tōnzaaāte.
26so lenzuta Gabrielu inni dharmudūta Galilajata manni Nazaretu inni nāto
27Davidu kūḍagattasi āhi Josepu inni ro mlehataki raïbēri āti laa tāna Paramushreeni walla panḍitasi ātesi, ē laa dōru Maria.
28ē dūta bitri wahiwaha ēdāni messiwaha:— daja pātatī! ninge subhomi! prabhu ninge tōḍu āha mannesi inzihi westesi.
29,30ēdi ē hāḍataki hāreeniĕ dagga āhi:— ī subhomi zōkoḍi ēnaiā inzihi onpa koddi manzaliĕ dūta:— Mariā! azza anika! Paramushreeni walla krupa mēḍa āti.
31īdikō nīnu bandi āhi mrīenaï patiwaha evanaki Jesu inni dōru ittidi.
32evasi kazzasi āhi wālati muheti gattani mrīesi innasi ānesi; prabhu Paramushreesi evani tanzi āti Davidu simhasanomi evanaki hīnesi.
33evasi Jakobu kūḍagattaraï pātupātutaki ēlinesi, evani rāzi mutpuli hillaagattai āhi manne inzihi ēdāni tulle westesi.
34ēdānaki Maria:— nānu mlehaï punnaagattatee; īdi ēni āhi mlīne inzihi dūta tulle inzaliĕ
35dūta:— parishudhātma nī mūhe wāne; wālati muheti gattani blāju ninnaa plīgine lakka zarnāni brōnda parishudhatasi āhi Paramushreeni mrīesi iẓẓasi ānesi.
36ōḍee nī gottagatti Elisabethu zakke tani budhihi wēḍata bandi āha manne; bānzeni iẓẓi ēdānaki sō lēnzu.
37Paramushreela westi imbini hāḍa ātiwa warrai ăe īnzihi īdāni tulle westesi.
38ēdānaki Maria:— īdikō nānu prabhu sēbagattatee; nī zōkoḍi lehe nange ājapeko iẓẓe, embatiĕ dūta ēdāni tānati haẓẓesi.
39ē nēẓungaña Maria ningiwaha Juda dēshomi lōni hōru bakkita manni ro nāto tobbe haẓẓiwaha
40Zakarija izzo rēẓiwaha Elisabethutaki zohora kitte.
41Elisabethu Mariati zohora‐bōlu wenzaliĕ ēdāni bandita manni brōnda getkitte, embati Elisabethu parishudhātma tulle nenzitai āhi danze īle inzihi iẓẓe:—
42ījaskaña nīnu dīvanomi pātati
nī banditi phalomi dīvanomi pāne.
43nā prabhu talli nā tāna wānai
nange ēni āhi mēḍa ājate?
44īdikō nī shubhomi zōkoḍi nā krījuta rījaliĕ
nā bandita manni brōnda rāhati getkitte.
45prabhu ēdānaki punpi kitti hāḍa mlīne
lakka nammiti ēdi dīvanomi pātai, iẓẓe.
46embatiĕ Maria īle inzihi iẓẓe:—
nā zīwu prabhuti dāmbara kīhi manne.
47evasi tani sēbagattani kākuli‐tossa kātatesi.
48,49nā ātma nā rakshinẓinasi āti Paramushreeni muhe rāha āne.
wālati blāju gattasi nange kazza kamma mēḍi kījatesi lakka imbatiĕ kūḍanga bahē nannaa tossagattai inzihi inneri.
evani dōru parishudhomiĕ.
50evanaï azzinari muhe evani kanikaromi pātu pātu pateka manne.
51evasi tani bhahati barsu tōstesi
evari hījati onpunga kōsomi garra gattaraï lanza tuh’nesi.
52simhāsanomingati bahni gattaraï trokhiwaha ōntuwa gattaraï ekhesi.
53hakkili taraï nehi rānda tulle panzi kīhiwaha
dhanomi gattaraï warri keska tulle panḍa tuh’nesi.
54,55Abrahamutakiĕ evani pōdipōdatakiĕ pātu pātu pateka tani kanikaromi tōstani onpa koddiini inzihi mā akkunga tulle hello hitti lehe evasi tani sēba gatti Ishraēlutaki sājomi kittesi.
56embatiĕ Maria ramārami tīni lēnzu ēdani tulle manzihi ḍāju tani izzo wenḍe haẓẓe.
57brūta wēḍa wātati Elisabethu mrīenaï pāte.
58prabhu ēdāni muhe hāree karma ātesi inzihi, ēdāni pāditariĕ gottangee wenziwaha ēdāni tulle rāha āteri.
59āta nēẓuta evari ē brōndati pōtki dāẓali wāhiwaha, tanzi dōruti lehe Zakarīja inni dōru evanaki itti manzaliĕ
60talli:— ēlekīhi kahi; evanaki Johanu inni dōru ittali inzihi weste.
61ēdānaki evari:— nī gottangaña ē dōru gattasi imbaasi hilluusi inzihi ēdāni tulle wessihi
62evanaki ēni dōru ittali mānḍi manzikī? inzihi evani tanzitaki kēju seika kīhi weẓẓeri.
63evasi ro rāẓini pāna ta’mu inzihi — evani dōru Johanu inzihi rāẓitesi; ēdānaki evari bahē iẓintromi āteri.
64zēẓoĕ evani gūti hungiwaha wentori wīḍiwaha, evasi Paramushreelaï lākihi zōlali māthesi.
65ēdānaki evari zuttupattuti nīḍimanni bahētaraki azzi hōte. ē sangatika bahē Judaja hōru bakkiti bahētaki wēngitu.
66prabhu kēju evanaki tōḍu āha maẓẓe lakka ē sangatika weẓẓari bahē:— ī brōnda ēnitasi ānesiā inzihi ēdāni hījata itta kodditeri.
67ōḍee evani tanzi Zakarīja parishudhātma nenzitasi āhi īle inzihi wēkhesi:—
68-75Ishraēlu prabhu āti Paramushreesi lākitasi āpesiko.
evasi tani lōkutaki betta āhiwaha evaraki rakshanomi pānpi kittesi.
tani sēbagatti Davidu gōtromita mangetaki rakshana mēlu iẓẓihe:—
mā īrsagattaritiĕ mammaa lāginari kējutiĕ tappinẓiwaha rakshana pānpi kījatesi.
īdāni kōsomi evasi dakkitiĕ tani parishudha gūrka gūtiti zōlitesi.
evasi mā akkungki daja kījali; tani parishudha odambaḍi iẓẓihe:— mā tanzi āti Abrahamu tulle tānu kitti ottu onpa koddali
māro īrsa gattariti pispikīnai āhi
māro nīḍini pateka azzi hillaaki
evani nōkita parashudhomi ningee nīti ningee evanaï sēba kīnanaki daja tōsali ī rakshana panpi kittesi.
76-79ōḍee hē brōndāti! nīnu wālati blāju gattani gūrūti innati ādi; mā Paramushreeni kazzā zōkoḍilehe evari pāpomikani rakshinẓinanaki tani lōkutaki rakshana ghnānomi evasi hīnilehe
evani zīngani mliphali nīnu prabhu nōkita tākidi. mā pā’anangani samādhānomi zījuta tāki kīni lehe anderitee hāki‐hījenitee kuggā mannariki uzzeḍi hīni lehe ē kazzā zōkoḍi kōsomi evasi lekkoti mange gaḍili hōpu hōtali dāja kījateri.
80brōnda padda āhi ātmata blāju pātiwaha Ishraelutaki tōnzāni pateka zāḍata maẓẓesi.

Published by the British and Foreign Bible Society in 1916.


Learn More About Luka Suvarta 1916 (Kuvi Kond)