ALIKƆLƆ̍SĀYI 4

1Abābā, ala̍ ā yɛ̍ɛ̄lā hwɔhi hwɔhi tāa afiyɛ yī ala̍ lɔkɔ nīi o̍ ngma̍ nīi ɔ̄chɛ ge̍ē ya̍ ma̍. Je̍ka aa̍ ala̍ titi lɛ Abābā ɔha̍ hɔ̄ abɔ̍ɔ la ichō?

Ɔna yī lɛlā

2Ala̍ e̍e hɛ̍ gbɛ̄ɛ̄ la ɔhā ojōji de Ɔwɔ ni̍. Ala̍ ā deyīrɛ grigri nīi ala̍ ge̍ē jɔhā da Ɔwɔ o̍be yī u̍ku̍rɔ̍. 3Ala̍ ā jɔhā de alɔ i̍ngi̍ngɔ̍ɔ hɛ̄ɛbɛ nīi Ɔwɔ ge̍ de yɛ̄grāa ɔnɛ̄ɛhɛhi de alɔ, hɛ̄ɛbɛ nīi alɔ ā bī ka ɛrɔ̄ yī nū nīi alɔ ā koko̍o yī lɛlā yī Ikra̍yisi nīi - lɛlā ɔtrɛ̍ba ma̍ de āchɛ. Ɔla̍ā - ohu̍ nīi n tū ma̍ la igbakɔbɔ a̍nɛ. 4Ala̍ ā jɔhā de u hɛ̄ɛbɛ nīi n ē kɛlā ɔla̍ā de ɔ̍ chāyenyi tɛri̍tɛri̍ lɔkɔ nīi o̍ ngma̍ nīi n ge̍ ya̍ ma̍.

5Ala̍ ā bī lɛlā ojo̍ōje̍ ka̍ka̍ la abɔ̄ hɛ̄ɛbɛ nīi ala̍ ge̍ jɔ̍ɔkɔ yɛ̍ɛ̄lā ba̍la āchɛ nīi i̍ chɛ̄ku Ikra̍yisi ni̍ ma̍. Yɛ̄grāa nīi ge̍ hɔ̄ de ala̍ ma̍, ala̍ ā bī ɔ̄ ya̍ yɛ̍yɛ̍. 6Oko̍o yī ala̍ ge̍ tū ibɛbɛ ba̍la ɔmā. Ala̍ jɔ̍ɔkɔ hīya ɔ̄chɛmɔ̄chɛ ɔkɔ yī lɛlā nīi ge̍ē ku kpakpa ma̍.

Ɔma̍kpɔɔ

7Iti̍kīkusi nīi - ɔɔ̍nɛ̍ yī alɔ lēchi̍ la abɔ̄ yī Ikra̍yisi ma̍ ge̍ē koko̍o yī lɛlā yī u wa̍a̍ ē de ala̍. Iti̍kīkusi - olu̍ku̍rɔ̍ nīi ɔ̄chɛ ē de ɔtū che ɔ̍ nɛ; olikpɛ̍ɛ yī alɔ la u̍ku̍rɔ̍ yī Ādā nūma̍ nɛ. 8Ɔla̍ā - ohu̍ nīi n yɛ ē de ɔ̍ ē tɛ̄rɔ̄ wā dikpo̍ ē ba̍ ala̍ a̍nɛ. O̍ ge̍ē wā ge̍ē koko̍o ē de ala̍ wa̍a̍ lɔkɔ nīi alɔ lɛ amu ma̍, hɛ̄ɛbɛ nīi ūkpɔ̄tū lɛ ala̍ yaya. 9Onɛ̍sīmusi, ɔɔ̍nɛ̍ yī alɔ lēchi̍ lēchi̍ ɔla̍ā nīi ɔ̄chɛ ē de ɔtū che ɔ̍ ma̍ ge̍ē wā ba̍la anu̍. Onɛ̍sīmusi tū la ogrēeyī yī āchɛ yī Ɔwɔ nīi hɔ̄ la ɛbɛ yī ala̍ ma̍. E̍ ge̍ē koko̍o yī lɛlā nīi yɛ amu ē ya̍ la ɛbɛ nūma̍ wa̍a̍ ma̍ ē de ala̍.

10Ari̍si̍tākusi nīi tū amu la igbakɔbɔ ba̍la ami ma̍ tɛ̄rɔ̄ yī ɔma̍kpɔɔ hu ala̍ wa̍a̍. Ima̍aki nīi - ɔyɔ̍ɔ̄ɔ̍nɛ̍ yī Iba̍nābasi ma̍ titi tɛ̄rɔ̄ yī ɔma̍kpɔɔ hu ala̍ wa̍a̍. Lɛlā yī nū nīi n ka de ala̍ hīka o̍ ge̍ ga wā abɔ̍ɔ la ɛbɛ yī ala̍, ala̍ ku̍ ɔ̄ ba̍ ɔtū hwɔhi hwɔhi ma̍, je̍ka ala̍ po̍? 11Anu̍ Ijo̍shua nīi e̍ ē hī ɔ̄ ka Ijɔ̍si̍tusi ma̍ titi tɛ̄rɔ̄ ɔma̍kpɔɔ hu ala̍ wa̍a̍. Aa̍ āchɛ ɛta̍ nūma̍ re̍ka āchɛ yī Iju̍u lōri̍īwā nīi yɛ ē ya̍ u̍ku̍rɔ̍ ba̍la ami wu̍chē yī Ɔchwɔ̄lɛ̍ Oro̍ōre̍ yī Ɔwɔ a̍nɛ. E̍ tū u wɔbɔ̄ gba̍a̍.

12Ɛpa̍frāasi nīi - Ologrēeyī yī āchɛ yī Ɔwɔ yī ɛbɛ yī ala̍, nīi - hɔ̍chɛ̍ yī Ikra̍yisi Iji̍sɔ̄ɔsi i̍ngi̍ngɔ̍ɔ ma̍, anu̍ titi tɛ̄rɔ̄ yī ɔma̍kpɔɔ hu ala̍. O̍ ē jɔhā gba̍a̍ ē de ala̍ myɛ̄grāa-myɛ̄grāa: Ɔwɔ ɔ̍lɔ ge̍ ya̍ nīi ala̍ ɔ̍lɔ ge̍ yarɛ brii. Ala̍ ɔ̍lɔ ge̍ de jɛ̄ angrɔ̄ɔ chɛ̄ lɛlā yī Ikra̍yisi hwɔhi hwɔhi, yɛ̍ɛ̄lā i̍ngɔ̍ɔ ke̍e̍ gɔ̄grāa lɔkɔ nīi Ɔwɔ ɔ̍lɔ chikpo̍ ma̍. 13Ami ɔlɔjā ge̍ē koko̍o yī u̍ku̍rɔ̍ nīi o̍ ya̍ i̍ngɔ̍ɔ gba̍a̍ ma̍ ē de ala̍, ba̍la onīi o̍ ya̍ de Alileyode̍siya ba̍la Alihɛra̍pɔ̄lisi ma̍ ē mɛ. 14Ilu̍uku olobo̍chi̍ ɔla̍ā nīi hi alɔ ɔtū gba̍a̍ ma̍ ba̍la Idɛ̍māasi tɛ̄rɔ̄ yī ɔma̍kpɔɔ hu ala̍ wa̍a̍.

15Ala̍ ā ma̍ aɛ̍nɛ̍ yī alɔ abɔ̍ɔ la Ileyode̍siya kpɔɔ de alɔ. Ala̍ ā ma̍ Ini̍mīfa ba̍la ogrēeyī yī āchɛ yī Ɔwɔ nīi ē kū la wɔlɛ̍ yī nū ma̍ kpɔɔ de alɔ 16Ala̍ ge̍ de īpū nūma̍ ma̍ mɛ̍, ala̍ ā ya̍ lɛbɛ nīi ogrēeyī yī āchɛ yī Ɔwɔ abɔ̍ɔ la Ileyode̍siya titi ge̍ ma̍ ɔ̄ i̍ngi̍ngɔ̍ɔ. Yɛ̄grāa ɔla̍ā ala̍ titi, ala̍ ma̍ īpū nīi Alileyode̍siya ge̍ē de ē tɛ̄rɔ̄ hu ala̍ ma̍. 17Ala̍ ā ka de Aki̍pūusi hīka o̍ ge̍ plɛ̍ɛ̄lā nūma̍: “Jo̍ōkū hwɔhi hwɔhi nīi a ā kwɛ̍ɛjī la u̍ku̍rɔ̍ nīi e̍ de de wɔ la ɛrɔ̄ nīi a yɛ ē chrāa Ādā ma̍!”

18Ɛbɛ nūma̍, n ta̍ īpū la abɔ̄ yī ami ɔlɔjā: AMI IPƆ̍ƆLI TƐ̄RƆ̄ YĪ ƆMA̍KPƆƆ HU ALA̍! Ala̍ e̍e mwanyī yī agba̍ nīi tū um amu we̍ ma̍ ni̍ oo!

Ɔpiyɛ nīi Ɔwɔ ē de ma̍ ge̍ hɔ̄ ba̍la ala̍ wa̍a̍.

Currently Selected:

ALIKƆLƆ̍SĀYI 4: YBASR

Highlight

Copy