Póróvep 2
2
Eyáré nyí Bubong budakye
1Wǎn ejí, kwâa ńkyí me mu n-tángê e ǒ. *Dachi a-ráp ne banyá ńkyí me mu n-sét ng ǒ n/fu, chi*. 2Fwôo atông ké chwǒm-bubong, a-kan eringe nyí adanyît kánkyí. 3Tîm arông eringe nyí adajá byinyídíng. Tîm arông eringe nyí adanyît kyikû-chwǒm. 4Kyé byinyídíng wǎ eringe nyí adakyé akpuga, nang kiǐtí-chwǒm ńkyí nkyi rôorôo. 5Â a/chi éné, wo a/chi a-nyît eringe kyi/byí, â onet mu o-kyâ Óburúkpâbí ofê ne okwâa eyên kyi-kim ne Osówo o/chi o-byí ǒ dyishí. 6Óburúkpâbí nké mu o-kyâ bubong. Byinyídíng ne chwǒm enyît mbyi byi-fím m ne nyǐ. 7Nyǐ mu o-kyâ banet ḿbé mbe ba-chi i kanong ne ba-sét ng ntûntû ochwâp, ne mu o-ku ng kámbé. 8Nyǐ mu o-ku ng banet ḿbé mbe ba-tî ng barî-banet kanong, ne mu o-bám m banet ḿbé mbe ne nyǐ ké kyikû.
9Â wo amu a-jwo ng mě, wo a/chi a-nyît ńkyí nkyi ntûntû, ńkyí kyi*fí ne acît* ne nkyi kerededet. Wo a/chi a-nyît ńkyí adakûchi. 10Wo a/chi a-firi ne bubong, ne byinyídíng eyên byi/chi byi-kye ǒ bunyîn-dyityém. 11Kafâ eri kyi-kim ne chwǒm ne chwǒm enyît eyên byi/chi byi-ku ǒ 12ne bii*bángê ǒ a-chi chwǒm ńkyí kii*nwa*. Mbyí byi/chi byi-chi ǒ aa*kim ne banet ḿbé badaraa byibî-byiraa* 13ne banet ḿbé baa/né dyikpen ńdyí kanong echi, ba-kú ba-kyú u ké kyifip ńkyí byibî, 14ne banet ḿbé bunyîn-dyityém mbu kámbé ké byibî-byěm echi, ḿbé mbe ba-ri ng bunyîn ké byibî, 15ne banet ḿbé onet oo*man efé dyityém ne mbé*.
16Wo a/chi a-man ené kyibî-onyinyi nang kyirá mú mu o-kan n o/fu, nyǐ o-chi i ǒ a-bángê ne nyǐ ké bunyîn-ejá emen, 17mú o*fí o-kyâ otyép emen ofê* ne mu o-ráp ng ocím emen mú o/ryí ké bushú-Osówo. 18Â a/ce ké kyise-onyinyi ámu, wo amu a-cen n ké kiǐfáng-bukyû. Â a/ce ányi, ányi aa/fárâng oshê-bakúsí. 19Onet o*fí mú oo/ce ǎ edari o-bwa esim*. Onet ámu oo*bwa to esim ne banyá ké bukwóp ḿbú dyikpen*. 20Ké bubwô ámbu, cen ké kyiká-bucen ńkyí banet ḿbé banong, a-kyú dyikpen ńdyí banet ḿbé mbe ba-chi i kanong. 21Banet ḿbé mbe ba-chi i kanong, ḿbé ba*fí ne ébîn* nké ba/chi ba-kyú ké esí nyí eten ńnyín. 22Nké Osówo o/chi o-ju byibî-banet ké esí eten ńnyín, o-fîm banchi byibî wǎ byichí ḿbyí badafîm kámbyí ké eriri.
Currently Selected:
Póróvep 2: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
